E Gadrevi na Nomu Veivuke
1 “Vinaka vakalevu na veika kece dou vakayacora ena vuku i keimami. Sa dau yaga dina vakalevu.” Na vosa oqo e vakaraitaka na noda vakavinavinakataka na nodra veivuke na qase ni ivavakoso kei ira na dauveiqaravi vakaitalatala. Ni tubu tiko ga na isoqosoqo i Jiova, e sa qai gadrevi gona kina vakalevu na tagane matua mera veiqaravi ena voleka ni 100,000 na ivavakoso e vuravura raraba. Kevaka o dua na tacida tagane papitaiso, e gadrevi na nomu veivuke.
2 “Tadolova”: E rawa vakacava ni o tadolova yani e so tale na itavi ena ivavakoso? (1 Tim. 3:1, NW) E bibi na nomu ivakaraitaki vinaka ena basoga ni nomu bula kece. (1 Tim. 4:12; Taito 2:6-8; 1 Pita 5:3) Vakaitavi vakalevu ena cakacaka vakavunau, qai vukei ira tale e so mera cakava vaka kina. (2 Tim. 4:5) Kauaitaki ira dina eda vakabauta vata. (Roma 12:13) Mo dau gumatuataka na vuli iVolatabu, qai vakavinakataka na “iwalewale ni nomu veivakavulici.” (Taito 1:9, NW; 1 Tim. 4:13) Gumatua ni vakayacora na itavi era lesia vei iko na qase. (1 Tim. 3:10) Ke o ulunivale, ‘lewai ira vakavinaka na nomu lewenivuvale.’—1 Tim. 3:4, 5, 12.
3 Na veiqaravi vaqase kei na dauveiqaravi vakaitalatala e gadrevi kina na cakacaka vagumatua, kei na nomu vakuai iko ena so na ka. (1 Tim. 5:17) O koya gona ke o via tadolova na itavi oqori, e gadrevi mo dau yalomalumalumu ena veiqaravi. (Maciu 20:25-28; Joni 13:3-5, 12-17) Vakananuma na itovo i Timoci, qai vakadamurimuria. (Fpai. 2:20-22) Me vakataki Timoci ga, me tukuni iko na nomu itovo vinaka. (Caka. 16:1, 2) ‘Ena laurai levu na nomu tubu’ vakayalo ni o bucina na itovo vakarisito mo vakayacora vinaka kina na itavi e lesi vei iko, kei na nomu muria na ivakasala ena vakavinakataka na nomu veiqaravi.—1 Tim. 4:15, VV.
4 Ra iTubutubu, Tuberi Luvemuni Mera Dau Veivuke: E rawa nira vakavulici na gone nira se gonelalai mera veivuke. Tuberi ira mera dau vakarorogo ena soqoni, mera dauvunau, mera ivakaraitaki vinaka tale ga ena Kingdom Hall vaka kina e koronivuli. Vakavulici ira mera vakaitavi ra qai marautaka na veivuke, me vaka na samaki ni Kingdom Hall, vukei ira na sa qase, kei na so tale. Mera vakila sara ga o ira na marau ni soli ka. (Caka. 20:35) Na veituberi vaka oqo ena vukei ira mera painia, dauveiqaravi vakaitalatala se qase ni ivavakoso ena veisiga mai muri.