SAUMI NA TARO VAKAIVOLATABU
O cei e lewa tiko na vuravura?
Ke lewa na vuravura na Kalou, vakacava ena vakilai e levu na rarawa?
Era vakabauta e levu ni lewa tu na vuravura na Kalou dina. Ke vaka kina, vakacava ena vakilai e vuravura e levu na rarawa? (Vakarua 32:4, 5) E tukuna na iVolatabu ni lewa tiko na vuravura e dua na iliuliu ca.—Wilika 1 Joni 5:19.
A mai lewai keda tu vakacava e dua na iliuliu ca? Ena itekitekivu ni bula ni kawatamata, a saqata na Kalou e dua na agilosi qai uqeti rau na imatai ni veiwatini me rau cakava tale ga qori. (Vakatekivu 3:1-6) Ni rau digitaka me rau vakarorogo vua na agilosi talaidredre o Setani, e sa nodrau iliuliu kina o koya. Na Kalou Kaukaua Duadua e dodonu me liutaki keda, ia e vinakata meda digitaka na nona veiliutaki nida lomani koya. (Vakarua 6:6; 30:16, 19) Ka ni rarawa nira sa vakacalai e levu mera vakatulewa cala me vakataki rau na imatai ni veiwatini.—Wilika Vakatakila 12:9.
O cei ena walia na noda leqa?
Vakacava ena vakalaiva na Kalou me veiliutaki tiko ga na iliuliu ca o Setani? Sega! Na Kalou ena vakayagataki Jisu me muduka na ka ca kece e sa cakava o Setani.—Wilika 1 Joni 3:8.
Ena vakarusai Setani o Jisu ena kaukaua ni Kalou. (Roma 16:20) Ena qai liutaki keda na Kalou, qai vakalesuya mai na bula marau kei na vakacegu a nakita taumada.—Wilika Vakatakila 21:3-5.