SAUMI NA TARO VAKAIVOLATABU
E vakainaki na buli ni vuravura?
A buli na vuravura meda marautaka kina na bula
Eso na ka e vakavuna meda bula rawa kina e vuravura. Kena ivakaraitaki, e levu kina na wai. Ni sowiri vakalakala na vuravura, e veirauti kina na batabata kei na katakata ni waitui. E itataqomaki tale ga na macawa kei na idre ni vuravura mai na rarama veivakaleqai ni matanisiga. E vakatubuqoroqoro na nodra cakacaka vata na kau kei na manumanu e vuravura. Qori era vakabauta kina e levu ni vakainaki na buli ni vuravura.—Wilika Aisea 45:18.
Ia o na rairai lomatarotarotaka: ‘Vakacava e okati tale ga ena inaki qori na rarawa kei na veika tawadodonu?’—Wilika Vakarua 32:4, 5.
Ena vakayacori beka na inaki me baleta na vuravura?
Na inaki ni kena buli na vuravura, oya mera marautaka kina na bula o ira era dau veidokai ra qai lomani koya e buli ira. Qori na vuna e vakainaki vakalevu kina na noda bula ni vakatauvatani kei na kau se manumanu. Eda rawa ni kilai koya e buli keda, eda qoroya qai vakatotomuria na nona loloma kei na nona lewa dodonu.—Wilika Dauvunau 12:13; Maika 6:8.
E rawa ni vakayacora kece na nona inaki o koya e buli keda. Eda nuidei gona ni na vakaotia o koya na rarawa kei veika tawadodonu, me vinaka vakaoti kina noda marautaka na bula e vuravura.—Wilika Same 37:11, 29; Aisea 55:11.