Saumi Na Taro Vakaivolatabu
A veivakaturi dina o Jisu?
E vakaturi Lasarusa o Jisu, dina ni sa siga va nona mate
E vakamatatataka na iVolatabu ni vakaturi ira dina na mate o Jisu. Era sega ni italanoa buli, nira kilai na vanua kei na gauna era yaco kina. Kena ivakaraitaki ena vulaikatakata ni yabaki 31 G.V., era muri Jisu e dua na ilala levu mai Kapenaumi me yaco i Neini. Nira yaco yani era sotava tale e dua na ilala levu. O rawa ni nuitaka na italanoa ni veivakaturi e yaco tarava ni volaitukutukutaki sara ga ena Vosa ni Kalou na iVolatabu, ra qai vakadinadinataka na ilala levu qori.—Wilika Luke 7:11-15.
O Jisu a vakaturi nona itokani tale ga o Lasarusa, dina ni sa mate tu me va na siga. O rawa ni vakabauta na itukutuku ni ka e cakava o Jisu ena siga qori ni levu tale ga era vakadinadinataka.—Wilika Joni 11:39-45.
Cava e veivakaturi kina o Jisu?
E vakaturi ira na mate o Jisu ni dau yalololoma. E cakava tale ga qori me vakaraitaka ni sa solia tu vua o Tamana e Dauveibuli na kaukaua me vakamalumalumutaki mate.—Wilika Joni 5:21, 28, 29.
Na nona veivakaturi o Jisu ena gauna qori eda nuitaka kina na nona yalayala me baleta na gauna se bera mai. Ena vakaturi ira e levu, wili kina o ira na tawayalododonu era se sega tu ni bau kilai koya na Kalou dina. Ena soli kina vei ira na gauna mera vulica na veika baleta na Kalou o Jiova ra qai lomani koya.—Wilika Cakacaka 24:15.