TARO NA DAUWILIWILI

Era lesi vakacava na qase kei na dauveiqaravi ena ivavakoso?

Ena imatai ni senitiuri G.V., e tukuna na yapositolo o Paula vei ira na qase era veiqaravi ena ivavakoso e Efeso: “Ni qarauni kemuni kei na qelenisipi e lesi kemuni kina na yalo tabu moni kena ivakatawa, ni vakatawa na ivavakoso ni Kalou e volia sara ga ena dra i Luvena.” (Caka. 20:28) E vakaitavi vakacava na yalo tabu ena nodra lesi nikua na qase kei na dauveiqaravi?

Kena imatai, na yalo tabu e uqeti ira na dauvola iVolatabu mera volatukutukutaka na ivakatagedegede ena vinakati vei ira na qase kei na dauveiqaravi. E rauta ni 16 na ivakatagedegede e vinakati vei ira na qase ni ivavakoso e volatukutukutaki ena 1 Timoci 3:1-7. Eso tale na ivakatagedegede e tiko ena Taito 1:5-9 kei na Jemesa 3:17, 18. E volai ena 1 Timoci 3:8-10, 12, 13 na ivakatagedegede mera rawata na dauveiqaravi ni ivavakoso. Kena ikarua, o ira na tacida era vakatura na yaca kei ira era veilesi era na kerea na veidusimaki ni yalo tabu i Jiova me rawa nira kila ke rawata toka e dua na tacida na ivakatagedegede vakaivolatabu. Kena ikatolu, o koya e vakaturi e dodonu me laurai ena nona bula na itovo e okati ena vua ni yalo tabu. (Kala. 5:22, 23) Kena ibalebale, na yalo tabu ni Kalou e vakaitavi ena ka kece e okati ena nona lesi e dua.

Ia o cei ena lesi ira na tacida qori? Ena gauna sa oti, e dau vakau kece ena valenivolavola ni tabana na yaca era vakaturi mera qase se dauveiqaravi. Era tiko e kea eso na tacida e lesia na iLawalawa Dauvakatulewa mera dau dikeva na vakatutu qori ra qai veilesi ke veiganiti. Oti ena volavola na valenivolavola ni tabana ina ilawalawa qase ni ivavakoso qori. E nodratou itavi na qase me ratou tukuna vua e lesi ni sa vakadonui me veiqaravi. Ratou na tarogi koya ke taleitaka me veiqaravi, se tiko eso na vuna ena sega kina ni ciqoma na itavi. Ni oti qori, ena kacivaki sara ena ivavakoso.

Ia e caka vakacava na veilesi qori ena imatai ni senitiuri? Ena so na gauna eratou veilesi sara ga na yapositolo, me vaka na nodratou lesia e vitu na tagane me ratou qarava na wasei ni kakana vei ira na yada. (Caka. 6:1-6) De dua ratou sa veiqaravi rawa tiko vaqase na tagane qori ni bera ni lesi vei ratou na itavi qo.

E sega ni vakamacalataki sara vakamatailalai ena iVolatabu na veilesi ena gauna e liu, ia eda rawa ni kila toka vakacaca na sala e caka kina. E tukuni ni gauna erau lesu mai kina o Paula kei Panapasa ena imatai ni nodrau ilakolako vakadaukaulotu, “erau sa qai lesia eso na qase ena ivavakoso yadua, erau masu rau lolo vata kei ira, erau sa qai tataunaki ira vei Jiova, o koya era sa mai vakabauta.” (Caka. 14:23) Ni oti e vica na yabaki, e volavola o Paula vua na nona itokani daukaulotu o Taito, ena nona kaya: “Au a biuti iko tiko mai Kiriti mo vakadodonutaka eso na leqa e kea, mo lesi ira tale ga na qase ena koro yadua me vaka au vakaroti iko kina.” (Taito 1:5) O Timoci e dau salavata vakalevu kei Paula ena cakacaka vakaulotu, e rairai soli tale ga vua na itavi ni veilesi. (1 Tim. 5:22) Macala gona nira veilesi sara ga na ivakatawa dauveilakoyaki, sega ni o ratou na yapositolo kei ira na qase e Jerusalemi.

Nida vakasamataka tiko na ivakaraitaki vakaivolatabu qori, sa veisautaka kina na iLawalawa Dauvakatulewa ni iVakadinadina i Jiova na sala era lesi kina na qase kei na dauveiqaravi. Me tekivu ena 1 Seviteba, 2014, ena muri na ituvatuva ni veilesi qo: Ena dikeva vinaka na ivakatawa ni tabacakacaka na yaca e vakaturi ena nona tabacakacaka. Ni sikova tiko na ivavakoso, ena saga me kilai ira vinaka na tacida era vakaturi, ke rawa, ena cakacaka vakavunau kei ira. Ni oti nona veivosaki kei ratou na qase ena ivavakoso me baleta na yaca eratou vakatura, e nona itavi na ivakatawa ni tabacakacaka me lesi ira na qase kei na dauveiqaravi ena ivavakoso ena nona tabacakacaka. Ena sala qo e muri vakavoleka kina na ituvatuva ena imatai ni senitiuri.

Ia o cei e qarava na vo tale ni itavi ni veilesi? “Na dauveiqaravi yalodina e vuku” e nona itavi bibi me vakania na lewenivuvale. (Maciu 24:45-47) Qo e wili kina na nona vakadidike ena iVolatabu salavata kei na veidusimaki ni yalo tabu, me rawa ni vakarautaka na idusidusi yaga e yavutaki vakaivolatabu me cicivaki kina na ivavakoso e vuravura raraba. Na dauveiqaravi yalodina tale ga e lesi ira na ivakatawa ni tabacakacaka kece kei ira na lewe ni Komiti ni Tabana. E itavi ni valenivolavola ni tabana yadua me vakarautaka na veivuke e vinakati me vakayacori kina na nona veidusimaki na dauveiqaravi yalodina. E itavi ni ilawalawa qase yadua me dikeva vinaka na ivakatagedegede vakaivolatabu me baleti ira na tagane era vakatura ena ivavakoso ni Kalou. Na ivakatawa ni tabacakacaka e tiko na nona itavi bibi, qori me dikeva vinaka qai masulaka na yaca era vakatura na qase, oti me qai lesi ira na tagane era rawata na kena ivakatagedegede.

Nida kila na sala e caka kina na veilesi, eda na kila vinaka na itavi ni yalo tabu ena tikina qo. Eda nuitaki ira da qai dokai ira gona vakalevu era lesi ena ivavakoso vaKarisito.—Iper. 13:7, 17.

O cei o rau na ivakadinadina e cavuti ena Vakatakila 11?

E cavuti ena Vakatakila 11:3 e rua na ivakadinadina erau na parofisai me 1,260 na siga. E tukuni tale ga ni manumanu kila ena “vakamalumalumutaki rau, ena vakamatei rau.” Ia ni oti ga e “tolu veimama na siga” erau na vakabulai tale, era na kurabuitaka kece na vakararai tu.—Vkta. 11:7, 11.

O cei o rau na ivakadinadina qo? Eda na kila ena itukutuku matailalai e tukuni me baleti rau. Kena imatai, e tukuni ni rau “vakaibalebaletaka na rua na vuniolive kei na rua na itutu ni cina.” (Vkta. 11:4) Eda lai nanuma kina na itutu ni cina kei na rua na vuniolive e vakamacalataki ena parofisai i Sakaraia. Na rua na vuniolive qori e dusia e “rua sa lumuti,” oya na Kovana o Serupepeli kei na Bete Levu o Josua, ni rau “tu e na mata i koya na Turaga ni vuravura taucoko.” (Saka. 4:1-3, 14) Kena ikarua, e tukuni ni rau cakamana na ivakadinadina qo me vaka ga na cakamana nei Mosese kei Ilaija.—Vakatauvatana Vakatakila 11:5, 6 kei na Tiko Voli Mai na Lekutu 16:1-7, 28-35 kei na 1 Tui 17:1; 18:41-45.

E tautauvata vakacava na tikinivolatabu qori? E vakamacalataka ruarua nira veiliutaki tiko na lumuti ni Kalou ena gauna dredre ni veivakatovolei. Me vakayacori gona na parofisai ena Vakatakila wase 11, o ratou na tacida lumuti eratou veiliutaki ena gauna e tauyavu kina mai lomalagi ena 1914 na Matanitu ni Kalou eratou vunau “ena isulutaga” me tolu veimama na yabaki.

Ni cava nodratou vunau na lumuti ena isulutaga, eratou vakamatei vakaivakatakarakara ni ratou bala i valeniveivesu me dua ga na gauna lekaleka, e tolu veimama na siga vakaivakatakarakara. Era nanuma na keda meca ni sa tarovi vakadua na nodratou cakacaka, dua na ka nodra marau.—Vkta. 11:8-10.

Ia e dina na ka e parofisaitaki, ni cava na tolu veimama na siga, erau vakabulai tale na ivakadinadina. Eratou sega wale ga ni sereki mai valeniveivesu na lumuti, ia o ira na yalodina tiko ga era taura nodra ilesilesi dokai e lesia vei ira na Kalou ena vuku i Jisu Karisito na nodra Turaga. Ena 1919 eratou lesi me ‘dauveiqaravi yalodina e vuku’ me vakarautaka na kedra kakana vakayalo na tamata ni Kalou ena iotioti ni veisiga.—Maciu 24:45-47; Vkta. 11:11, 12.

E talei ni rau veisemati na ka e yaco qo ena Vakatakila 11:1, 2 ina gauna ena vakarautaki se dikevi kina na valenisoro vakayalo. E cavuti ena Malakai wase 3 na kena dikevi tale ga na valenisoro vakayalo, qai vakasavasavataki. (Mala. 3:1-4) Vakacava na dede ni kena dikevi kei na kena vakasavasavataki? Tekivu ena 1914 ina itekitekivu ni 1919. Na loma ni gauna qo e wili tiko kina na 1,260 na siga (42 na vula) kei na tolu veimama na siga vakaivakatakarakara e cavuti ena Vakatakila wase 11.

Dua na ka noda marau ni tuvanaka o Jiova na veivakasavasavataki vakayalo qo me vakasavasavataki ira nona tamata digitaki mera vakayacora na cakacaka vinaka! (Taito 2:14) Eda vakavinavinakataka tale ga nodratou ivakaraitaki na lumuti yalodina eratou veiliutaki tiko ena gauna ni veivakatovolei ratou qai vakatakarakarataka na rua na ivakadinadina.a