O Dau Cakava na Veika e Vinakata na Kalou?

O na rairai sega ni tukuna qo vua e dua drau sega ni veikilai, “Na ka ga o vinakata, au na cakava.” O na rawa ga ni cavuta qori ke drau veitokani voleka. E dau kena ivakarau ga vei ira na veitokani voleka mera dau cakava na veika era kerea nodra itokani dina.

Na iVolatabu e tukuna ni o Jiova e dau cakava na ka e vakamarautaki ira na sokaloutaki koya. Kena ivakaraitaki, e tukuna o Tui Tevita a marautaka nona dau veitokani voleka kei na Kalou, “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami. . . . E dredre me wiliki.” (Same 40:5) O Jiova tale ga e cakava na veika ena vakamarautaki ira na se bera ni kilai koya, e ‘vakamamautaka na lomadra ena kakana kei na marau.’—Cakacaka 14:17.

E tu vakarau o Jiova me cakava na ka ena vakamarautaki ira eso tale, e dodonu gona vei ira na vinakata mera itokani ni Kalou mera cakava na ka ena ‘vakamarautaka na lomana.’ (Vosa Vakaibalebale 27:11) Na cava sara mada o rawa ni cakava mo vakamarautaka kina na Kalou? E tukuna na iVolatabu: “Kua tale ga ni guilecava na caka vinaka kei na nomuni wasea vei ira tale na so na ka e tu vei kemuni, ni taleitaka na Kalou na isoro va qori.” (Iperiu 13:16) Vakacava, kena ibalebalebale qori ni vinakati ga meda caka vinaka da qai wasea na ka e tu vei keda meda vakamarautaki Jiova kina?

E tukuna na iVolatabu, ‘Ke sega na vakabauta ena sega ni vakamarautaki rawa na Kalou.’ (Iperiu 11:6) E bibi me kilai ni a “vakabauti Jiova o Eparama” e qai “vakatokai me itokani i Jiova.” (Jemesa 2:23) A vakabibitaka tale ga o Jisu Karisito ni vinakati meda “vakabauta na Kalou” me rawa nida marautaka na nona veivakalougatataki. (Joni 14:1) Eda na rawata vakacava na vakabauta e vinakata o Jiova vei ira na toro volekati koya? Qori nomu vulica wasoma na Vosa ni Kalou, na iVolatabu. Ni o cakava qori, o na kila na “ka dina me baleta na nona inaki” qai vulica kina mo “vakamarautaki koya vakalevu.” Ni toso nomu kila na ka dina me baleti Jiova qai bulataka na ka o vulica me baleta na nona ivakatagedegede dodonu, o na vakabauti koya vakalevu, ena qai toro volekati iko o koya.—Kolosa 1:9, 10.