Na Bula Vinaka Duadua

Cava mo cakava mo toro voleka kina vua na Kalou? Eda sa dikeva mai e vica na sala qo eda rawa ni muria meda veiwekani voleka kina kei na Kalou. Okati kina noda:

1. Kila na yaca ni Kalou o Jiova qai vakayagataka.

2. Veivosaki vakalevu kei koya ena masu kei na nomu vulica nona Vosa na iVolatabu.

3. Cakava tiko ga na veika e vakamarautaki Jiova.

Ni o dikeva qori, vakacava o sa cakava tiko na veika mo volekata kina na Kalou? E tiko eso na tikina mo cakacaka kina? Ena vinakati kina na sasaga, ia dikeva mada na veika ena rawati kina.

E kaya o Jennifer mai Merika, “E yaga na noda sasagataka meda veiwekani voleka kei na Kalou. Eda na vakalougatataki dina ena veiwekani qo: eda na nuitaki koya vakalevu, eda na kilai koya vakavinaka qai koya e bibi duadua eda na lomani koya vakalevu. Qo na ivakarau ni bula vinaka duadua!”

Ke o vinakata mo veiwekani voleka kei na Kalou, era tu vakarau na iVakadinadina i Jiova mera vukei iko. E rawa nira tuvanaka mo vulica wale na iVolatabu. Oni sureti tale ga moni tiko ena nodra Vale ni Soqoni, moni marautaka kina na veimaliwai kei ira na vakamareqeta nodra veiwekani kei na Kalou.a Ni o cakava qori, o na duavata kei na daunisame ni vola: “Koi au, e yaga vei au me’u toro vua na Kalou.”—Same 73:28.