ULUTAGA LEVU | RAWA NI O VOLEKATA NA KALOU
O Voleka Vua na Kalou?
“E itataqomaki nida veivolekati kei na Kalou, e vakanuideitaki keda, e vakainaki tale ga noda bula. E vaka ga e kauaitaka tiko na Kalou na noda marau.”—CHRISTOPHER, NA CAURAVOU NI GHANA.
“E kauai na Kalou ena rarawa o sotava, e lomani iko qai tu vakarau me vukei iko.”—HANNAH, YABAKI 13 MAI ALASKA, MERIKA.
“Eda vakamareqeta da qai lomavakacegu nida veivolekati kei na Kalou!”—GINA, MARAMA NI JAMAICA E YABAKI 40 VAKACACA.
Me vakataki Christopher, Hannah, kei Gina, levu e veiyasa i vuravura era vakabauta ni Kalou e okati ira mera nona itokani. Vakacava o iko? Drau veivolekati kei na Kalou? Se o vinakata tiko mo drau veivolekati? De dua o na lomatarotarotaka: ‘E rawa vua e dua e ivalavala ca me veivolekati kei na Kalou Kaukaua Duadua? Ke rawa, ena sala cava?’
RAWA NI O VOLEKATA NA KALOU
E tukuna na iVolatabu nida rawa ni veivolekati se veiwekani voleka kei na Kalou. E tukuna tale ga ni Kalou e vakatokai Eparama na peteriaki me ‘wekana.’ (Aisea 41:8) Dikeva mada e dua na veisureti ena Jemesa 4:8: “Toro voleka yani vua na Kalou ena qai toro voleka mai vei kemuni.” E matata eke ni rawa nida veiwekani voleka kei na Kalou. Ia me vaka nida sega ni raici koya, eda na “toro voleka” qai veiwekani vakacava kei koya?
Me saumi na taro qori, dikeva mada na sala erau rawa ni veitokani kina e rua. E dau tekivu ni rau veikilai yaca. Toso na gauna, rau sa na veivosaki vakalevu, rau dui talaucaka na lomadrau, rau sa na veikilai vinaka sara. Ni rau saga tale ga me rau dau veivukei, e vaqaqacotaki kina nodrau veitokani. E va tale ga qori na veitokani kei na Kalou. Meda dikeva mada.