SAUMI NA TARO VAKAIVOLATABU
Na cava meda vakananuma kina na mate i Jisu?
Na cava ena rawati ena mate i Jisu?—Aisea 25:8; 33:24
E dua na gauna bibi duadua ena ivolatukutuku ni kawatamata na mate i Jisu. A mate me volia lesu na bula ni kawatamata. Eda a sega ni buli meda dau cakaca, tauvimate, se mate. (Vakatekivu 1:31) Ia eda mai ivalavala ca ga ena vuku i Atama. Solia gona nona bula o Jisu me vakabulai keda mai na ivalavala ca kei na mate.—Wilika Maciu 20:28; Roma 6:23.
Vakaraitaka na Kalou na titobu ni nona lomani keda ni tala mai vuravura na Luvena me mate ena vukuda. (1 Joni 4:9, 10) E tukuna vei iratou nona imuri o Jisu me ratou dau vakananuma na nona mate ena dua na soqo e vakayagataki kina na madrai kei na waini. Noda dau solevutaka qori e veiyabaki e ivakaraitaki ni noda vakavinavinakataka na nodrau loloma na veitamani qo.—Wilika Luke 22:19, 20.
O cei ena vakayagataka na madrai kei na waini?
Gauna e vakaraitaka kina o Jisu vei ratou nona tisaipeli me ratou dau vakananuma nona mate, a veidinadinati tale ga kei ratou ena dua na veiyalayalati. (Maciu 26:26-28) E rawa kina vei ratou kei na dua na iwiliwili lailai mera tui ra bete tale ga kei koya mai lomalagi. Milioni vakacaca era vakananuma na mate i Jisu, o ira ga na wili tiko ena veiyalayalati qori era na vakayagataka na madrai kei na waini.—Wilika Vakatakila 5:10.
Era na lai veiliutaki mai vakatui. Sa voleka ni 2,000 na yabaki qo nona digitaki ira tiko o Jiova. (Luke 12:32) Era le lailai ga ni vakatauvatani kei ira na bula tawamudu e vuravura.—Wilika Vakatakila 7:4, 9, 17.