SAUMI NA TARO VAKAIVOLATABU
Na cava e rawati ena mate i Jisu?
E nona inaki na Kalou vei keda na kawatamata meda bula tawamudu ena vuravura e sega kina na tauvimate se mate. Ia a talaidredre vua na Dauveibuli na imatai ni tamata o Atama, mani vakayalia kina na isolisoli ni bula tawamudu. Na nona talaidredre e vakavuna meda mate. (Roma 5:8, 12; 6:23) Ia na Kalou dina o Jiova e lomani keda, e talai Luvena o Jisu me mai mate ena vukuda, me vakalesuya tale ga mai na veika a vakayalia o Atama.—Wilika Joni 3:16.
E rawati na bula tawamudu ena mate i Jisu. Na cava mada nomu rai me baleta na bula tawamudu e vuravura?
Na nona mate o Jisu e vosoti kina noda ivalavala ca, e rawati tale ga kina na bula tawamudu. E yalataka na iVolatabu ni na oti na bula vaqase, tauvimate, kei na mate.—Wilika Aisea 25:8; 33:24; Vakatakila 21:4, 5.
Eda na vakananuma vakacava na mate i Jisu?
Ena yakavi ni bera ni mate, a tukuna o Jisu vei ratou nona imuri me ratou vakarautaka e dua na ivakayakavi rawarawa ga me vakananumi kina nona mate. Noda vakayacora tale ga qori e veiyabaki, eda na vakasamataka kina na levu ni nodrau lomani keda o Jiova kei Jisu.—Wilika Luke 22:19, 20; 1 Joni 4:9, 10.
Ena yabaki qo, eda na vakananuma tiko na nona mate o Jisu ena Moniti, 14 Epereli, ni sa dromu na siga. Oni sureti moni mai tomani ira na iVakadinadina i Jiova ena nomuni yasayasa.—Wilika Roma 1:11, 12.