Veisautaki au e tolu na taro

NOQU BULA E LIU:

Au susu ena dua na tauni lailai, o Ancram, ena mua i cake kei Niu Yoka, Merika. Levu kina na belavu. E lailai tale na kedra iwiliwili na tiko e kea ena levu ni bulumakau.

Dua ga na lotu ena tauni qori, keitou dau lako kina vakavuvale. Dau qua noqu ivava o Tutu niu bera ni lai vulivola ena Sigatabu, au qai kauta tiko na iVolatabu vulavula lailai a solia o buqu. Keitou le tolu na gone, keitou vakavulici ena cakacaka vakaukaua, veidokai, veivukei, kei na neitou dau vakavinavinakataka na ka keitou vakalougatataki kina.

Au toki meu lai cakacaka vaqasenivuli niu sa qase. Levu na ka au via kila me baleta na Kalou kei na inaki ni bula. So na noqu gonevuli era maqosa ena levu na ka. So tale e sega, ia era gonevuli gugumatua. So e sega ni vinaka na ituvaki ni yagodra, so tale era kaukaua sara vakayago. Au nanuma ni sega ni dodonu me va qori. So na gauna era dau kaya na itubutubu era sega ni rawaka vinaka na luvedra, “Qo ga na inaki ni Kalou vua na luvequ.” Au dau vakasamataka na vuna e vakatara kina na Kalou mera sucu na gone e vakaleqai tu na ituvaki ni yagodra. E sega ni dua nodra cala na gone qori.

Au dau vakasamataka tale ga, ‘Me yaga vakacava noqu bula?’ Totolo ga na toso ni gauna vei au. Au susu ena dua na vuvale vinaka, au vuli vinaka, taleitaka tale ga noqu cakacaka. Ia vaka ga meu sega tiko ni lomavakacegu. Noqu rai meu na vakawati, vakavale, vakaluveni, cakacaka tiko ga me yacova niu sa cegu, oti qai toki ina nodra vale na malumalumu. Au dau vaqaqa ke levu tale na ka vinaka ena yaco.

VEISAUTAKI AU NA IVOLATABU:

Au gade i Urope ena vulaikatakata kei na so tale noqu itokani vakacakacaka. Keitou gade sara ina so na valenilotu lelevu me vakataki Westminster Abbey, Notre-Dame de Paris, kei na Vatican, vaka kina eso na valenilotu lalai. Ena vanua kece au lakova qori, e salavata tiko kei na noqu vakatataro. Niu lesu mai Sloatsburg, e Niu Yoka, au lai rai sara ena vica na valenilotu. Sega tiko ga ni dua e sauma rawa noqu taro.

Dua tiko noqu gonevuli yabaki 12, e tarogi au ena tolu na taro. Kena imatai, keu kila ni iVakadinadina i Jiova. Au sauma, io. Kena ikarua, e taroga keu via kilai ira na iVakadinadina i Jiova. Au sauma tale ena io. Kena ikatolu, e taroga noqu itikotiko. Niu tukuna ga vua, e kila na vanua au tiko kina, keirau sega ni veiyawaki. Au sega ni kila ni na veisautaka vakadua na noqu bula na tolu na taro qori.

Keirau vuli sara, dau vodo basikeli tiko yani ina noqu vale. Au taroga vua na taro au tarogi ira kina e levu na iliuliu ni lotu. E sega ni vakataki ira, ni vakayagataka sara ga noqu iVolatabu me sauma kina na noqu taro—imatai tale ga ni gauna meu wilika kina!

Au marau, au lomavakacegu ena ka au vulica ena iVolatabu. Uqeti au vakalevu na 1 Joni 5:19, e kaya: “E lewa tiko na vunica na vuravura taucoko.” Au lomavakacegu niu kila ni o Setani ga e vakavuna tiko noda rarawa, ia ena vakarautaka na Kalou na kena iwali. (Vakatakila 21:3, 4) Au dikeva tale ga ke vakamacalataki vakamatata na iVolatabu ena kilai vinaka na ka e tukuni tiko kina. E yabaki 12 ga o koya e vakavulici au tiko, ia se mani lesi vei cei na itavi qori, au raica ni sega ni veisau na ka dina, e dua tiko ga.

Au via raica sara ga ke ra vakatotomuria dina tiko na iVakadinadina na ka era vunautaka. Kena ivakaraitaki, e kaya na goneyalewa keirau vuli tiko ni bibi mera dau vosovoso qai yalovinaka na lotu vaKarisito dina. (Kalatia 5:22, 23) Au mani vakatovolei koya kina. Dua na siga au nakita meu vakaberabera ina neirau vuli. Au vakasamataka sara, ‘Ena waraki au tiko? Ke wawa tiko, ena cudru?’ Dabe toka ena mata ni noqu vale niu kele yani, e cici mai qai kaya: “Voleka sara meu lesu i vale meu kaya vei Na me qiri i valenibula, qiriti ira tale ga na ovisa de dua na ka sa yacovi iko, ni o sega ni dau bera ena nomu vuli. Au lomaleqataki iko vakalevu!”

Dua tale na gauna, au nanuma meu taroga e dua na taro ena dredre me sauma e dua e yabaki 12. Au via raica ke na bulia ga na kena isau. Niu tarogi koya, e raici au matua, e kaya sara: “Dua na taro dredre qori. Au na vola meu tarogi rau kina noqu itubutubu.” Sega ni cala, nona qai lesu mai ena neirau vuli tarava, sa kauta tiko mai e dua Na Vale ni Vakatawa e saumi kina na noqu taro. Qori e vakavuna meu volekati ira na iVakadinadina, nira sauma na noqu taro kece ena ivola vakaivolatabu. Keirau vuli tiko ga kei na goneyalewa qori me yacova niu papitaiso meu iVakadinadina i Jiova ni oti tale e dua na yabaki.a

KENA YAGA:

Ni sa saumi kece na ka au dau lomatarotarotaka tu, au via wasea sara yani. (Maciu 12:35) Ratou a saqati au mada na wekaqu ena noqu vakabauta vou, ia toso na gauna ratou sa veisau. A vuli iVolatabu o tinaqu ni bera ni vakacegu. A sega ni papitaiso ni leqa koso, au vakadeitaka ga ni sa vakatulewataka me qaravi Jiova.

Au vakamautaki Elias Kazann ena 1978, e iVakadinadina tale ga. Keirau sureti i Pecelib e Merika ena 1981. Ka ni rarawa ni takali o koya ni se qai oti ga e va na yabaki neirau veiqaravi. Au sa mai bula tu ga yani vakadawai, au tomana tiko noqu veiqaravi e Peceli. Au vakaogai au ena noqu veiqaravi, au lomavakacegu kina.

Au vakawati tale ena 2006 kei Richard Eldred, e lewe tale ga ni vuvale e Peceli. Keirau marautaka vata na veiqaravi tabu qo e Peceli. Io sa saumi kece na noqu vakatataro ena gauna au mai kila kina na Kalou, au kila tale ga na inaki dina ni bula. Rawa qori ena tolu ga na taro a tarogi au kina e dua na goneyalewa.