Lomaocaoca ni Leqataki Noda Bula

“Dua na ka noqu taqaya niu rogoca na tagi ni alamu, totolo ga noqu lai vaqara bula ena ivakaruru ni gasaukuro,” e kaya o Alona. “Ia au se rere ga, dina niu sa bau taqomaki toka. Ena ca sara keu a tiko e tautuba ni sega na vanua ni ivakaruru. Dua mada ga na gauna niu taubale tiko, au sorova na tagi, au vakila ni leka tale ga noqu icegu. Sa bau dede toka qai lutu vinaka tale. Oti ga qori se baci tagi na alamu.”

Eda sega ni dau lomaocaocataka ga na ivalu. Kaya mada ke tukuni ni sa tauvi iko tiko se dua o dau lomana e dua na mate levu, macala ga ni o na lomaleqa kina. So tale era lomaocaocataka na veika me baleta na gauna se bera mai. Era leqataka qo, ‘Vakacava era na bula na luvequ kei na makubuqu ena dua na vuravura e cabolo tu ga kina na ivalu, basulawa, vagagai ni veika bula, veisau vakasauri ni draki kei na matetaka?’ Na cava me caka meda kua ni lomaocaocataka kina vakalevu na veika qori?

Eda kila kece ni dau yaco na leqa, ia o koya e “yalomatua e raica na ca qai vunitaki koya.” (Vosa Vakaibalebale 27:12) Me vaka na noda dau saga meda bulabula vinaka vakayago, eda na rawa tale ga ni kauaitaka va qori na noda vakasama kei na lomada. Eda na lomaocaoca sara vakalevu ke da dau sarava kei ira na luveda na iyaloyalo voravora se raica na veika vakadomobula e vakaraitaki tu ena tabana ni itukutuku. Ia na noda sega ni via sarava e sega ni kena ibalebale nida sega ni via kila na ka dina e yaco tiko. A sega ni bulia noda mona na Kalou meda vakasamataka tiko na veika ca. E dodonu ga meda dau vakasamataka na “ka kece ga e dina, . . . dodonu, . . . savasava, . . . e uqeta na veilomani.” Ke da cakava qori, “na Kalou ni vakacegu” ena vakaceguya noda vakasama kei na lomada.​—Filipai 4:8, 9.

BIBI NI MASU

E yaga na vakabauta dina meda kua ni dau lomaocaoca kina vakalevu. E veiuqeti na iVolatabu meda ‘yadra tiko nida gumatua ena masu.’ (1 Pita 4:7) Meda kerea na Kalou me vakavukui keda qai vakayaloqaqataki keda meda solia noda vinaka kece me vakatau ena keda ituvaki, me salavata kei na noda nuitaka ni na “rogoca na cava ga eda kerea vua.”​—1 Joni 5:15.

E vakamacalataka na iVolatabu ni o Setani, e “turaga ni vuravura qo,” o koya ga na “vunica” e “lewa tiko . . . na vuravura taucoko,” sega ni Kalou. (Joni 12:31; 1 Joni 5:19) Sa rauta me tukuna o Jisu ena nona vakavulici keda me baleta na masu: “Vakabulai keimami mai vua na vunica.” (Maciu 6:13) E kaya o Alona: “Ni tagi na alamu, au dau kerei Jiova me vakataudeitaki au. E dau qiriti au tale ga mai o watiqu, keirau qai masu vata. E yaga vakalevu na masu.” E vaka ga na ka e tukuna na iVolatabu: “E voleka o Jiova vei ira kece na kacivi koya, vei ira kece na kacivi koya ena yalodina.”​—Same 145:18.

NODA INUINUI

E vakavulici ratou na nona imuri o Jisu ena Vunau ena Ulunivanua me ratou masulaka: “Me yaco mai na nomuni Matanitu.” (Maciu 6:10) Ena vakaotia vakadua na Matanitu ni Kalou na lomaocaoca kece e dau veivakaleqai. Ena ‘vakaotia’ tale ga na Kalou ‘na ivalu e vuravura taucoko’ ena vuku i Jisu, na “Turaga ni Sautu.” (Aisea 9:6; Same 46:9) “Ena vakataulewa o koya [na Kalou] ena vukudra e levu na lewe ni veivanua . . . Ena sega ni lave iseleiwau e dua na matanitu ina dua tale na matanitu, era na sega ni vulica tale na ivalu. . . . Ena sega ni dua me vakarerei ira.” (Maika 4:3, 4) O ira na vuvale mamarau “era na tara vale era na tiko kina, era na tea na loganivaini era na kania na vuana.” (Aisea 65:21) “Ena sega ni kaya e dua na lewenivanua: ‘Au tauvimate.’”​—Aisea 33:24.

Eda na dau qaqarauni nikua, ia se rawa tiko ga nida sotava “na ka e sega ni namaki,” ni veitaudonui kei na gauna se vanua eda tu kina. (Dauvunau 9:11) Era se mate tiko ga na tamata vinaka ena ivalu, ivalavala voravora kei na tauvimate me vaka ga na veigauna sa oti. Na cava ga e nodra inuinui na sega nodra cala ra qai mate?

Era na bula tale e milioni vakamilioni, e kila ga na kedra iwiliwili na Kalou. Era se moce tu ena gauna qo, ia e nanumi ira vinaka tiko na Kalou, me yacova na siga ‘mera tucake mai kina o ira kece na tu ena ibulubulu nanumi.’ (Joni 5:28, 29) E vakadeitaka vei keda na iVolatabu me baleta na veivakaturi: “Na inuinui qo e ikelekele ni noda bula, e dei qai kaukaua.” (Iperiu 6:19) E “vakarautaka tale ga” na Kalou “e dua na ivakadei vei ira kece ni sa vakaturi [Jisu] mai na mate.”​—Cakacaka 17:31.

O ira mada ga na via vakamarautaka na Kalou nikua e tu tale ga eso na ka era lomaocaoca kina. Eratou saga me ratou cakava eso na ka o Paul, Janet kei Alona me ratou kua kina ni lomaocaoca vakalevu. Ratou volekata na Kalou ena masu, ratou nuitaka tale ga na nona yalayala ena iVolatabu me baleta na veisiga se bera mai. Me vakataki ratou ga, “me vakasinaiti kemuni mada ga na Kalou na vu ni noda inuinui, ena marau kece kei na vakacegu ena vuku ni nomuni vakabauti koya.”​—Roma 15:13.