iVukevuke me Kilai Vinaka Kina na iVolatabu

Vakasamataka mada ke o lako i vanua tani. O sotavi ira na lewenivanua e kea, qai vou vei iko na nodra ivakarau vakavanua, kedra kakana, kei na nodra ilavo. Macala ga ni na sega ni rawarawa vei iko.

Ena rairai va tale ga qori na imatai ni gauna o wilika kina na iVolatabu. O na lesu tale ina gauna makawa qai vou vei iko na ka kece. O sotavi ira kina na kai Filisitia, o se qai raica vakadua eso na itovo ni vanua me vaka na ‘dresulaki ni isulu,’ se na kakana e vakatokai me mana, kei na ilavo e kilai me drakema. (Lako Yani 16:31; Josua 13:2; 2 Samuela 3:31; Luke 15:9) O na rawa ni veilecayaki kina. Ia me vaka ga na kena dau sikovi e dua na vanua vou, vakacava o na taleitaka me dua e vakamacalataka vei iko?

NODRA DUSIMAKI ENA GAUNA MAKAWA

Mai na gauna e tekivu volai kina na iVolatabu ena ika16 ni senitiuri, era vukei na bula tu ena gauna oya mera kila vinaka na kena ibalebale. Me kena ivakaraitaki, a “vakamacalataka” o Mosese na imatai ni nodra iliuliu na Isireli na veika e volai tu kina.—Vakarua 1:5.

Ni oti e rauta ni tini tale na senitiuri era se tiko ga o ira na dauveivakavulici ena iVolatabu. Ena 455 B.G.V., era soqoni ena rara e Jerusalemi e dua na ilala Jiu levu, ra wili kina e levu na gone. Era qai ‘wilika kina e cake’ na dauveivakavulici na ‘iVolatabu.’ Ia eso tale na ka era cakava. Era “vukei ira na lewenivanua mera kila na ka e wiliki.”—Niemaia 8:1-8.

Ni oti tale e lima na senitiuri, e veivakavulici va qori o Jisu Karisito. E qasenivuli kilai levu. (Joni 13:13) E vakavulici ira na ilala levu, so na gauna vei ira yadudua. Dua na gauna a vosa kina vei ira na ilala levu ena nona iVunau rogo ena Ulunivanua, ra qai “vakadrukai na ilawalawa ya ena nona veivakavulici.” (Maciu 5:1, 2; 7:28) Ena vulaitubutubu ni 33 G.V., a vosa o Jisu vua e rua na tisaipeli ni rau taubale tiko ena gaunisala e gole ina dua na koro volekati Jerusalemi, e “sereka voli [“vakamatatataka,” ivakamacala e ra] na iVolatabu” vei rau.—Luke 24:13-15, 27, 32.

Era dau veivakavulici tale ga ena Vosa ni Kalou na tisaipeli i Jisu. Dua na gauna a wilika tiko e dua na tikina mai na iVolatabu na vakailesilesi ni Iciopea. E torovi koya sara e dua na tisaipeli o Filipi qai tarogi koya: “O kila na ka o wilika tiko?” E sauma lesu na turaga ni Iciopea: “Meu kila vakacava ke sega ni dua e vakavulici au?” Mani vakamacalataka o Filipi na kena ibalebale.—Cakacaka 8:27-35.

NODRA DUSIMAKI ENA GAUNA QO

Me vakataki ira na qasenivuli ni iVolatabu ena gauna makawa, era veivakavulici tale ga nikua na iVakadinadina i Jiova ena 239 na vanua. (Maciu 28:19, 20) Era vakavulici ira e sivia na ciwa na milioni e veimacawa mera kila vinaka na iVolatabu. Levu vei ira qori era sega ni susu ena vuvale lotu vaKarisito. E sega ni saumi na vuli qori, rawa tale ga ni vakayacori e vale se dua na vanua e veiganiti. So era vuli ena talevoni se na vidio nira vakayagataka na kompiuta se na mobail.

Oni rawa ni tarogi ira na iVakadinadina i Jiova ke oni via vuli. Oni na raica ni sega ni dredre na kilai ni iVolatabu, ia e ivola “yaga me veivakavulici, me veivunauci, me veivakadodonutaki, me veidusimaki ena ka e dodonu,” me rawa ni “vakarautaki vinaka kina” e dua “me tu vakarau tale ga me vakayacora na cakacaka vinaka.”—2 Timoci 3:16, 17.