Sala me Yaga Qai Marautaki Kina na Vuli iVolatabu

E wilika o Josua na Lawa; e bale na bai kei Jeriko, e sega ni bale na vale nei Reapi; e laveta cake na ligana o Josua ni masu

E SEGA ni rawarawa na ilesilesi i Josua. Ena vinakati me liutaka na matanitu o Isireli ena Vanua Yalataki, ena sotava tale ga kina na ituvaki dredre. E vakadeitaka vua o Jiova ni na rawata vinaka, e uqeti koya tale ga: ‘Mo yaloqaqa qai kaukaua. Muria vinaka noqu Lawa. Wilika ena siga kei na bogi, mo rawa ni muria vinaka na kece e volai kina. Ena qai rawa vinaka nomu sasaga, o na valavala vakavuku tale ga.’—Josua 1:7, 8.

Qo na gauna “ena vakilai kina e levu na ka dredre,” ena sega ni rawarawa tale ga noda ilesilesi. (2 Tim. 3:1) Me vakataki Josua, ena rawa vinaka noda sasaga ke da muria na ivakasala i Jiova. Eda rawa ni wilika wasoma na iVolatabu, da qai vakayagataka na kena ivakavuvuli ena duidui ituvaki.

Eda na rairai tusanaka nida sega ni gonevuli vinaka sara, se dredre meda vuli. Me vaka ni bibi dina na vuli iVolatabu, meda railesuva na kato “Tovolea Mada na Vakatutu Qo” ni tiko kina eso na ivakasala vinaka ena yaga qai marautaki kina noda vuli.

E lagata na daunisame: “Ni dusimaki au ena nomuni ivakaro, niu marautaka vakalevu.” (Same 119:35) O na marau vakalevu ni o vulica na Vosa ni Kalou. O na kunea e levu na iyau talei ni o vakekeli kina.

O na rairai sega ni liutaka e dua na matanitu me vakataki Josua, ia e tiko na ituvaki dredre mo vosota. Me vakataki koya ga, vulica qai muria na ka e volai me yaga ena vukumu. Ni o cakava qori, ena rawa vinaka nomu sasaga, o na valavala vakavuku tale ga.

TOVOLEA MADA NA VAKATUTU QO

Masu rawa ni bera ni o vuli. E tu ena iVolatabu na nona vakasama na Kalou kaukaua duadua, e volai me yaga vei iko. Ni o wilika na iVolatabu, kerea nona veivuke mo kila na kena ibalebale, tugana, muria sara.—Esera 7:10.
Mo taroga eso na taro ni o wili iVolatabu se ivola vakaivolatabu. ‘Na cava e tukuni eke me baleti Jiova? E veisemati vakacava kei na itukutuku ena nona Vosa? Au na vakayagataka vakacava meu vukea kina eso?’
Vakasamataka vakatitobu na ka o vulica. Cegu na wiliwili, vakasama mada: ‘E yaga vakacava vei au na tikina qo? Na cava e va kina ya noqu rai? E veisemati vakacava kei na kequ ituvaki ena gauna sa oti, ena gauna qo, se gauna se bera mai? Au na muria vakacava na kena ivakavuvuli kei na kena ivakasala?’ (Jope 23:5; Same 49:3) Raica ke o rawa ni vakamacalataka na vuna e uqeti ira kina na nona tamata o Jiova mera qarauna eso na ivalavala se na kena itinitini.—Vkru. 32:28, 29.
Raitayaloyalotaka na ka o wilika ena tikinivolatabu e vakamatailalaitaki kina eso na ka. Kena ivakaraitaki, o rawa ni raitayaloyalotaka nodratou volitaki Josefa na tuakana vei ira na kawa i Isimeli. (Vkte. 37:18-28) Na cava o raica, rogoca se boica? Biuti iko ena kedratou ituvaki na talanoataki tiko. Na cava o vakasamataka se vakila? Ni o vakasamataka qori ena matata na ka o vulica, ena vakaibalebale tale ga.
Vakayagataka na ivukevuke ni vuli e vakarautaki me vuavuaivinaka kina nomu vakekeli. Mo kila na ivakavakayagataki ni ivukevuke sa tu ena nomu vosa, na kena e tabaki se tiko ena jw.org. Kua ni lomalomarua mo kere veivuke ena kena ivakavakayagataki. Na Watch Tower Publications Index se na iDusidusi ni Vakadidike ni iVakadinadina i Jiova, ena rawarawa mo raica kina na ka sa tabaki ena duidui ulutaga se na ivakamacala ni levu na tikinivolatabu. Vakayagataka na ikuri ena Vakadewa ni Vuravura Vou ke tiko ena vosa o kila. E tu kina na itukutuku ni vanua, veika e yaco ena dui gauna, ivakarau ni bibi kei na balavu, kei na levu tale.
Vakasamataka na tikina bibi o vulica ni o na sega ni guilecava kina. Se vinakati tiko ga mo wasea. Vakacava e rawa ni o vakayagataka ena cakacaka vakaitalatala? Ena sala qori, ena dei ena nomu vakasama, ena yaga tale ga vei ira o wasea kina.