O Bau Kila?

E rawa vakacava me lomavakacegu tu ga o Sitiveni ni tusaqati?

E TU o Sitiveni e matadra e dua na ilala voravora. Qo o ira na le 71 na turaganilewa era lewe ni Sanadrini, na mataveilewai cecere duadua e Isireli, era dau vosayaco tale ga. E liutaki ira o Kaiafa na Bete Levu, a liutaka tale ga ena vica na vula yani e liu nona lewai o Jisu me lai vakamatei sara. (Maciu 26:57, 59; Caka. 6:8-12) Era kauta mai nodra ivakadinadina mera veibeitaki kina, ia era kidroa nira raica na mata i Sitiveni ni “vaka na mata ni agilosi.”—Caka. 6:13-15.

E rawa vakacava me lomavakacegu tu ga o Sitiveni ena ituvaki leqataki qori? Ni bera ni veilewaitaki ena Sanadrini, e dau ogaoga vakalevu o Sitiveni ena itavi vakayalo ena veidusimaki ni yalo tabu. (Caka. 6:3-7) Na yalo tabu ga qo e vakacegui koya ena gauna ni veilewai qai vakalesuya ena nona vakasama na veika e sa vulica oti. (Joni 14:16, vmr.) Me vaka e volai ena Cakacaka wase 7, e vosa ena doudou o Sitiveni ni vukei koya na yalo tabu me nanuma e 20 se sivia na tikinivolatabu mai na iVolatabu vakaIperiu. (Joni 14:26) E qai vakaukauataki sara nona vakabauta ni raivotutaki Jisu ni tucake tu ena ligaimatau ni Kalou.—Caka. 7:54-56, 59, 60.

Eda na rairai vakarerei tale ga se vakacacani ena dua na siga. (Joni 15:20) Ena tokoni keda na yalo tabu i Jiova ke da vulica wasoma na Vosa ni Kalou, da gumatua tale ga ena cakacaka vakaitalatala. Me vakataki Sitiveni, eda na vakayaloqaqataki tale ga meda vosota na veivakacacani da qai lomavakacegu tiko ga.—1 Pita 4:12-14.