Marautaki na Bula ena Gauna Qo

EDA rawa ni bula ena vuravura totoka ena sega kina na tauvimate, bula vaqase se mate! Ia ena gauna qo eda sotava kece tiko na leqa kei na veika dredre. Na cava gona ena rawa ni vukei keda ena gauna qo meda marautaka na bula vinaka duadua? Na ivakasala ena iVolatabu ena dusimaki keda ina bula marau kei na vakacegu. Dikeva mada eso na ituvaki dredre eda sotava, kei na sala e vukei keda kina na iVolatabu.

QARAI NA VAKACEGU

iVakasala vakaivolatabu: “Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni.”—Iperiu 13:5.

Nikua, e bololaki keda o vuravura ena itukutuku ni yaya kei na veiqaravi. Ia e kaya na iVolatabu ni rawa nida “lomavakacegu ga ena ka e sa tiko” vei keda. Ena sala cava?

Kua ni ‘lomana na ilavo.’ Na nodra lomana na ilavo e levu, era cakava kina na ka ga era vinakata, ke ra mani vakaleqai kina vakayago, nodra vuvale, itokani se itovo. (1 Timoci 6:10) Ena rarawataki dina qori! Me nanumi vinaka tiko qo—o koya e lomana na iyau “ena sega ni lomavakacegu.”—Dauvunau 5:10.

Talei cake na bula ni tamata, sega ni iyau. E tiko na gauna meda qai vakayagataka kina na iyau. Ia era sega ni rawa ni loloma se vakavinavinaka me vaka eda dau cakava. Na “itokani dina” ena vukei keda meda lomavakacegu.—Vosa Vakaibalebale 17:17.

E RAWA NIDA MARAUTAKA NA BULA ENA GAUNA QO KE DA MURIA NA IVAKASALA ENA IVOLATABU

VOSOTA NA TAUVIMATE

iVakasala vakaivolatabu: “Na yalomamarau e wai vinaka.”—Vosa Vakaibalebale 17:22.

Na marau e vaka na “wai vinaka” ena vukei keda meda vosota na tauvimate. Ia e rawa vakacava nida marau nida tauvimate tu?

Dau vakavinavinaka. Ke da vakasamataka tiko ga noda leqa, ena ca na ‘noda siga kece.’ (Vosa Vakaibalebale 15:15) E kaya kina na iVolatabu “me laurai na nomuni vakavinavinaka.” (Kolosa 3:15) Dau vakavinavinakataka na veika lalai mada ga ena noda bula. Kena ivakaraitaki, na dromu ni matanisiga, liwa ni cagi se nona matadredredre e dua. Na veika kece qori e vakamarautaki keda.

Vukei ira eso tale. Ke sega mada ga ni vinaka na keda ituvaki vakayago, ena “marau vakalevu o koya e solia na ka, vakalailai o koya e taura na ka.” (Cakacaka 20:35) Nira vakavinavinakataka eso tale noda vukei ira, eda na marau, eda sega tale ga ni vakasamataka vakalevu na ituvaki dredre eda sotava tiko. Ena vinaka na noda bula nida dau veivukei.

VAQAQACOTAKA NA IVAU NI VAKAWATI

iVakasala vakaivolatabu: “Moni vakadeitaka kina na veika era bibi sara.”—Filipai 1:10.

Ena rawa ni vakaleqai nodra veiwekani na veiwatini ke lailai na gauna era tiko vata kina. E ka vakavuku kina me ka bibi duadua vei ira nodra bula vakawati.

Drau cakava vata eso na ka. Lalawataka mo drau cakava vata eso na ka. E kaya na iVolatabu “e vinaka na le rua mai na le dua.” (Dauvunau 4:9) Kena ivakaraitaki, drau rawa ni vakasaqa vata, vakaukaua yago, vakacegu, se cakava vata na ka drau dui taleitaka.

Vakaraitaka ni o lomani kemu isa. Na iVolatabu e uqeti rau na veiwatini me rau veilomani rau qai veidokai. (Efeso 5:28, 33) E rawa ni vaqaqacotaka na ivau ni vakawati na matadredredre, nomu mokoti kemu isa, se solia vua e dua na iloloma lailai. Na isa ni vakawati e dodonu me vakaceguya ga nona gagadre ni veiyacovi vei watina.—Iperiu 13:4.

“AU SA QAI KILA NI VAKAINAKI NA BULA!”

—Talanoataka o Ryoko Miyamoto e Japani.

Dua na ka na dredre ni bula. E dau gunu sivia o watiqu, e sega tale ga ni dei ena dua na cakacaka. E sega ni qarava vinaka nona itavi vakatama vei ratou na le va na luvei keirau. Dua na ka noqu gumatua na cakacaka, ia e sega ni vakavinakataka qori neitou bula. Au vakasamataka kina, ‘Sa lewai me va ga qo noqu bula, se qo na itotogi ni noqu ivalavala ca ena veigauna sa oti?’

Oti e veisiko mai vale e dua na iVakadinadina i Jiova. E matadredredre qai vakamacalataka ena marau na Matanitu ni Kalou kei na bula tawamudu. E sureti au sara meu vuli iVolatabu. Au vulica kina ni bula dina tiko na Kalou, e vuku, dau lewadodonu qai dauloloma. Au vulica tale ga na kedra ituvaki na mate, kei na noqu sotava tiko na veika rarawa e sega ni kena ibalebale ni sa lewai oti tu na noqu bula.

Au marautaka vakalevu niu sa qai kila ni na rawati ga na bula vakacegu keu saga meu veivolekati kei na Kalou. Na ka dina vakaivolatabu au sa vulica e veivakayaloqaqataki, au vakila na bula galala, qai veivakabulabulataki. Au sa qai kila ni vakainaki na bula!