Vakayagataka na iVolacebaceba Mo Tekivutaka Kina na Veivosaki
1 De o na vakadinata ni na vakatau vakalevu na laulau ni nomu vosa vua e dua ke o vakaliuliu o iko mo tekivutaka na veivosaki, se vakaevei? Mo saga ga mo tukuna e dua na ka ena dreti koya o via vosa vua, me uqeti koya me veivosaki. Ia, o na cakava vakacava oqo ena sala e matau?
2 Era raica rawa e so na dautukutuku ni nomu digia vinaka e vica ga na vosa, lako vata kei na nomu solia e dua na ivolacebaceba vakaivolatabu, sa rawa ni o tekivutaka na veivosaki. E veivakauqeti na kedra ulutaga, e rokataki na kedra iyaloyalo, qai rairai vinaka. Na ivolacebaceba e sega ni vaka na ivola levu era dau datuvu kina e levu nira raica mada ga. Ia, na itukutuku leleka era toka ena ivolacebaceba era momona, e rawa ni taurivaki me lai tini sara ena vuli iVolatabu.
3 Oqo na ka e nanuma e dua na iVakadinadina: “Ena vuravura osooso qo, levu era sega ni dau via vakaotia nodra gauna ena wili ivola, ia e rauta vinaka na levu ni ivolacebaceba me vakasavui rawa kina na itukutuku bibi, e sega ni vavaku sara mera raica tu mada ga yani na itaukeinivale sa ra soro. Au vulica sara ga o yau na ka dina ena noqu vakawilika na ivolacebaceba.” Kua vakadua ni beca na gata ni Vosa ni Kalou e volai ena ivola lalai oqo.—Iper. 4:12.
4 Va na Kena iCakacaka Rawarawa: E levu e mana sara na nodra vosa ga vakarawarawa. (1) Vakaraitaka vua e dua e vica na ivolacebaceba qai taroga se kena i vei ena via wilika. (2) Ni sa digia e dua, taroga e dua na taro o sa vakarautaka vinaka mai ena saumi vinaka ena ivolacebaceba e sa digia. (3) Sauma na taro o taroga oqori ena nomu wilika e dua na parakaravu veiganiti se tikinivolatabu mai na ivolacebaceba. (4) Ke vakarorogo vinaka, tomana nomu veivosakitaka na lewe ni ivolacebaceba se dusimaki koya sara ina brochure na Loma ni Kalou se ina dua na wase ni ivola na Kila e tiko kina e so tale na ikuri ni ivakamacala. Ena sala oqo, ena rawa ni o kunea kina na vuli iVolatabu. Oqo e so na ka e vakaturi e rawa ni vukei iko ena nomu vakarautaka na ka mo na kaya ni o vakayagataka e va na ivolacebaceba.
5 E rawa ni tarogi sara ga na ulutaga ni ivolacebaceba, “O Cei e Liutaka Dina na Vuravura Oqo?”
◼ Ke sauma o koya drau veitalanoa tiko na “Kalou” se “Au sega ni kila,” wilika na imatai ni rua na iyatuvosa ena taqana 2, kei na imatai ni parakaravu ena taqana 3. Vakabibitaka na ka e tukuni ena 1 Joni 5:19 kei na Vakatakila 12:9. Ke se vakabekataka o koya drau veitalanoa tiko ni bula dina tu o Setani na Tevoro se na nona lewa tu na vuravura se sega, e rawa mo tomana ga na veivosaki ena ile e vakamacalataki ena ulutaga lailai, “Kilai Rawa Mai na iTuvaki Kei Vuravura.” Ke o raica ni taleitaka nomudrau veivosaki, tukuna vua ni rawa ni o mai vakamacalataka vua na vanua e lako mai kina na Tevoro, ena nomu vakayagataka na tikina e so mai na taqana 3 kei na 4 ni ivolacebaceba.
6 Rawa ni taleitaki vakalevu na ivolacebaceba, “Na Cava e Nodra iNuinui na Wekada Lomani Era sa Mate?” O rawa ni tekivuna na veivosaki ena nomu taroga:
◼ “Na cava oni nanuma, ena rawa beka nida raici ira tale na wekada lomani era sa mate?” Ni vakaraitaka oti nona nanuma, dusia sara vua na ikarua ni parakaravu ena taqana 4 ni ivolacebaceba, qai wilika na Joni 5:28, 29. Vakamacalataka vua ni na yaga me kila na itukutuku e tiko ena imatai ni ulutaga lailai ni ivolacebaceba. Vakaraitaka vua ni o na marau mo drau veivosakitaka.
7 E taleitaki vakalevu ena veiyasa i vuravura na ivolacebaceba, “Na Bula Vakavuvale Mamarau.” Ni o vakaraitaka na ivolacebaceba oqo, e rawa mo kaya:
◼ “De oni sa na raica tiko nira sa bau vakaleqai sara ga vakalevu nikua na veivuvale. Na cava oni nanuma e rawa ni caka me vaqaqacotaki kina na ivau vakavuvale?” Ni tukuna oti o koya drau veitalanoa na ka e nanuma, vakamuai koya sara ina imatai ni parakaravu ena taqana 6. Digia e dua vei iratou na tikinivolatabu e lavetaki toka ena taqana 4 kei na 5 ni ivolacebaceba, qai vakamacalataka na kena ibalebale. Oti qai vakaraitaka ni o na tu vakarau mo vakavulici koya wale ena iVolatabu.
8 De rawa ni o solia na ivolacebaceba, “Na Vuna O Rawa ni Vakabauta Kina na iVolatabu” ena kena iwalewale oqo:
◼ “Levu era kila na itukutuku me baleti Keni kei Epeli, na itukutuku e tiko ena imatai ni ivola ena iVolatabu. Na itukutuku ena Vakatekivu e tukuni koya tale ga na wati Keni. O dau vakasamataka beka se lako mai vei o koya?” Vakayagataka na iotioti ni parakaravu ena taqana 2 me saumi kina na taro. Vakamacalataka ni ivolacebaceba oqo e tiko tale ga kina na veika bibi e tukuna na iVolatabu me baleta na noda veigauna mai muri. Tekivu ena ikatolu ni parakaravu ena taqana 5, qai tomana na veivosaki ena so na tikinivolatabu era tokona na nomu ivakamacala.
9 Sa vakadinadinataki ni mana vakalevu sara na kacivaki ni itukutuku vinaka ena veisoliyaki ni ivolacebaceba. Baleta ni rawa ni o kauta ena vanua cava ga o lako kina, o rawa ni vakayagataka vinaka tale ga ena nomu vunau e veikatuba kei na nomu vunau ena veigauna kece ga. E yaga vakalevu sara na ivolacebaceba ena noda cakacaka vakaitalatala. Dau kauta tu na kena veimataqali, qai saga mo dau vakayagataka ena veigauna kece ga mo tekivutaka kina nomu veivosaki.—Kolo. 4:17.