Vakasakiti na Kena Vakarautaki na Tikidua Vou!

1. Na iyaragi cava ni cakacaka vakavunau e vakasakiti na kena vakarautaki?

¹ E sevutaki e lima na tikidua vou ena Soqo ni Tikina ni 2013, “E Dina na Vosa ni Kalou!” E dua tale na tikidua vou se qai tabaki ga qo, na iTukutuku ni Matanitu Nb. 38, e kena ulutaga “Era na Bula Tale na Mate?” E vakasakiti na kedra vakarautaki na ono na tikidua qo. Na cava e duatani kina na kedra irairai? E rawa nida vakayagataka vakacava qori nida vunau e veivale?

2. Na cava e duidui kina na nodra vakarautaki na tikidua qo?

² Vuna e Duidui Kina na Kedra iRairai: Me rawa ni laulau na noda vosa e veivale, ena vinakati meda cakava e va na ikalawa qo: (1) Taroga e dua na taro vakavure vakasama me tekivu kina na veivosaki. (2) Veivosakitaka e dua na vakasama e tiko ena iVolatabu. (3) Solia vei itaukeinivale na noda ivola me wilika. (4) Taroga vua e dua na taro me saumi ena veisiko tarava qai tuvanaka na gauna mo na lesuvi koya kina. E duidui na nodra vakarautaki na tikidua vou qo me vakarawarawataka noda muria na va na ikalawa qori.

3. Eda rawa ni solia vakacava na tikidua vou ena cakacaka vakaitalatala?

³ Vakayagataki Vakacava: (1) Ni oti na veivakabulataki, vakaraitaka vei itaukeinivale na taro e toka ena tabana e liu e rawa ni vica na kena isau, me qai digia na kena isau. (2) Cega na tikidua, qai veivosakitaka na “Ka e Kaya na iVolatabu.” Ke rawa, wiliwili sara ga mai na iVolatabu. Ke levu na nona gauna, veivosakitaka sara na ulutaga “Kena Yaga Vei Iko.” (3) Solia na tikidua qai vakauqeti koya me wilika ena nona gauna galala. (4) Ni bera ni o gole, vakaraitaka vua na taro e toka e muri ena ulutaga “Vakasamataka Mada” qai tuvanaka na gauna tarava mo drau veivosakitaka kina na kena isau vakaivolatabu.

4. Eda rawa ni vakayagataki ira vakacava na tikidua vou ena veisikovi lesu?

⁴ Ena rawarawa tale ga na noda veisikovi lesu nida vakayagataka na tikidua qori. Vakayagataka na tikinivolatabu ena daku ni tikidua mo sauma kina na taro o taroga ena icavacava ni nomudrau veivosaki e liu. Ni bera ni o biubiu, dusia vua na itaba ni iTukutuku Vinaka e tiko ena daku ni tikidua, vakaraitaka sara vua na ilavelave ni brochure qori kei na lesoni e tiko kina na ulutaga drau veivosakitaka qai taroga ke vinakata. Ke ciqoma, tuvanaka sara mo drau veivosakitaka na brochure ena nomu veisiko tarava. O sa tauyavutaka sara ga qori e dua na vulivolatabu! Se o rawa ni tukuna vua ke vinakata me vakawilika e dua tale na noda tikidua qai tuvanaka mo lesuvi koya mo drau qai veivosakitaka.

5. Era yaga vakacava na tikidua ena noda cakacaka vakaitalatala?

⁵ Sa sivi e 130 na yabaki na kena vakayagataki tiko mai na tikidua. E sa veiveisau na kedra irairai kei na kedra vakarautaki, ia era yaga dina ena cakacaka vakaitalatala. Meda vakayagataka vinaka mada ga na tikidua vou qori meda kaburaka tiko ga kina na kilaka vakaivolatabu e veiyasa i vuravura.—Vkai. 15:7a.