Eda Vunautaka na iTukutuku Vinaka

¹ E ka dokai dina ni dua o keda eda kauta voli “nai tukutuku vinaka ni veika vinaka!” (Roma 10:15) E tu vei keda na itukutuku mera vakacegui kina na vesuki tu ena leqa kei na rarawa. Eda na vukei ira vakacava na vaka oqo mera kila nida kauta tiko yani “nai rogorogo vinaka ni ka vinaka”? (Neitou na matanivola kala.)​—Aisea 52:7.

² Vakarautaka e Dua na iTukutuku e Marautaki: Ena rawa ni yaga vakalevu na noda veivosaki ena cakacaka vakaitalatala ke da vakabibitaka ga na ka vinaka ena noda itukutuku. O koya gona, nida vakarautaka na ka meda na tukuna kei na noda vakaraica na ivola meda solia, e vinaka meda vakabibitaka ena noda itukutuku na ka ena marautaki. Nida vakasavuya yani na noda inuinui yavutaki mai na iVolatabu ena yalodei kei na yalogu, eda rawa ni namaka me vuavuaivinaka sara.​—Vkai. 25:11.

³ E dina nida na rarawa vata kei ira na itaukeinivale nira vakaraitaka mai na kena tarai ira vakaca na ituvaki vakaloloma ni vuravura oqo, e dodonu meda dusia vei ira ni iwali dina ni noda leqa na Matanitu ni Kalou. Nida vakamacalataka mada ga na ‘siga ni veisausaumi’ i Jiova e roro tiko mai, eda via vakaraitaka ni oqo e dodonu me ‘irogorogo vinaka vei ira na yalomalumalumu.’ (Aisea 61:1, 2) Meda vakadeitaka vei ira na rogoci keda ni ka kece e cakava o Jiova ena kauta mai na marau levu, ena yaco tale ga kina na ka vinaka duadua.

⁴ Tukuna na Ka Dina Ena Yalo Mamarau: Nira raica na vakarogoci keda na keda irairai mamarau ra qai rogoca na dei ni rorogo ni domoda, ena vakarawarawataka na nodra vakarorogo. Ke laurai vei keda na nuidei, o ira tale ga era rogoci keda era na “reki e nai nuinui.” (Roma 12:12) Ena rawarawa tale ga nodra ciqoma na noda vakamacalataka na itukutuku vinaka. Io, e levu sara na vuna me laurai kina vei keda na nuidei kei na mata mamarau ena veibasoga ni cakacaka vakaitalatala kece eda vakaitavi kina.

⁵ Nida italatala ni itukutuku vinaka, eda sega ni vakasavuitukutuku wale ga. Na noda cakacaka vakavunau e dolava na sala vei ira na tani mera rawata kina na inuinui dei ni dua na bula vinaka ena gauna oqo kei na gauna se bera mai. (1 Tim. 4:8) Nida lakovi ira yani na tamata, na dei ni yaloda kei na noda vakasama ena laurai ena ka eda tukuna, ni oqo ena vukei ira tale ga mera ciqoma na itukutuku vinaka. Ena noda qarauna na ka eda tukuna kei na kena itukutukuni, meda vakauqeti ira mada ga na yalomalumalumu mera vakamareqeta na itukutuku vinaka eda vunautaka!