O Dua Beka na Daukacivaka Vakawasoma na Matanitu ni Kalou?
1 Eda marautaka kece na kena vakaraitaki vei keda nida a rawata e Viti e 2,021 na dautukutuku ena Okosita 1998, oqori e iwiliwili levu duadua. E rawa oqo ena veitauriliga kei na sasaga! Ia e laurai ena veivula e muri ni vaka e dredre vei ira e so na dautukutuku oqo mera daukacivaka vakawasoma na Matanitu ni Kalou, ni ivakatautauvata ni veivula me tekivu mai na gauna oya e 1,878 wale ga na dautukutuku. E kena ibalebale oqo ni lewe 1 mai na veiya14 na dautukutuku e sega ni volatukutukutaka na nona vakaitavi ena cakacaka vakaitalatala e veivula. E vakabauti ni na uqeti keda e vica na vakasama e koto e ra me vakavinakataka na leqa oqo.
2 Doka na iTavi: E dodonu meda doka vakatitobu na noda itavi, oya meda wasea na itukutuku vinaka ni Matanitu ni Kalou vei ira na tani. E vakamarautaka na loma i Jiova na cakacaka oqo, era vukei tale ga kina na lomadina mera kila na sala ina bula. (Vkai. 27:11; 1 Tim. 4:16) Nida vunau vakawasoma eda na kila vinaka kina na iwalewale ni cakacaka vakaitalatala, eda na reki vakalevu tale ga nida kila ni yaga tiko na ka eda cakava.
3 Volatukutukutaka na Nomu Cakacaka: E so era cakacaka vakavunau era sega ni volatukutukutaka na nodra cakacaka ena kena gauna dodonu. Kua vakadua nida nanuma ni sega ni yaga me volatukutukutaki na ka lailai eda rawata. (Vakatauvatana Marika 12:41-44.) Veitalia ke lailai se mani levu, meda volatukutukutaka ga na ka eda rawata! E vinaka ke tiko e vale e dua na ka me vaka beka na ivolanivula, mo vola kina na gauna o vakayagataka ena cakacaka vakaitalatala, oqo ena vukei iko tale ga mo kua ni guilecava na ka mo volatukutukutaka vakadodonu ena gauna e cava kina na veivula kece.
4 Me Ia na Veivukei: De rairai na gadrevi me vakavinakataka na ivavakoso na sala me vukei ira kina era vinakati mera vakawasomataka na nodra cakacaka vakaitalatala. E nona itavi na vunivola ni ivavakoso kei ira na qasenivuli ni vulivola mera veivosaki kei ira na dautukutuku matua de rawa nira dodoliga mera veivuke. Ke ratou sa dautukutuku bera ni papitaiso na luvemu, se so o vuli iVolatabu kei ira, vakavulici ira mera volatukutukutaka e veivula na nodra cakacaka.
5 Nanuma lesu na italanoa ni bula i Sister Ottilie Mydland ena Vale ni Vakatawa, 1 Okotova, 1997, ena ulutaga, “Marautaka na Dede ni Noqu Veiqaravi tu Vei Jiova.” Na tacida ni Norway oqo e tekivu dautukutuku vakawasoma ni itukutuku vinaka ni bera na nona papitaiso ena 1921. Ni oti e 76 na yabaki, ena gauna sa yabaki 99 kina, e kaya: “Au marau niu se rawa tiko ga ni dautukutuku vakawasoma.” Sa dua na rai vinaka meda vakatotomuria kece na tamata i Jiova!