O Dau Tokona na Vakaleweni Donu ni Ripote?

¹ Levu na itukutuku ena iVolatabu e dau cavuti sara ga kina na iwiliwili ni tamata, qai rawarawa nida raitayaloyalotaka na veika e yaco. Me kena ivakaraitaki, a vakavua na mataivalu ni Mitiani o Kitioni nira le 300 ga nona tamata. (Dvei. 7:7) A vakamatea e 185,000 na sotia ni Asiria na agilosi i Jiova. (2 Tui 19:35) Rauta ni 3,000 era papitaiso ena siga ni Penitiko 33 S.K., sega ni dede ga mai na gauna oya, e toso cake me 5,000 na kedra iwiliwili na vakabauta. (Caka. 2:41; 4:4) E macala mai na itukutuku oqo nira saga na tamata ni Kalou e liu mera vola na itukutuku e donu vinaka.

² E tukuna vei keda na isoqosoqo i Jiova nikua meda vola e veivula noda ripote ni cakacaka vakavunau. Noda tokona ena yalodina na ituvatuva oqori e cuqeni kina na kena tuvai vakamaqosa na noda cakacaka vakavunau. De na laurai ena ripote ni so na basoga ni cakacaka vakavunau e gadrevi me vakavinakataki, se so na yalava e gadrevi vakalevu kina na cakacaka. Na ripote ni vunau e vukei iratou na qase me ratou kila se o cei e rawa ni vakarabailevutaka nona cakacaka vakavunau, o cei tale ga e ganita me vukei. Qai dau veivakauqeti vei ira kece na tamata ni Kalou ni raici na veika e sa rawati me baleta na vunautaki ni nona Matanitu. O sa cakava tiko beka nomu itavi mo tokona na kena ripotetaki vakadodonu na noda cakacaka?

³ Noda iTavi Yadua: Dau dredre beka mo nanuma na veika o rawata ena cakacaka vakavunau ni sa cava na vula? Ke vaka kina, vakacava mo dau vola na veika oqori ena gauna kece o lako kina ena cakacaka vakavunau? E so era dau vakayagataka na ivolanivula se dua na ivola lailai. E so tale era dau kauta tiko kei ira na tikidua ni ripote e se bera ni vakaleweni. Ni sa cava na vula, solia sara nomu ripote vua na ivakatawa ni vulivola o lewena. Se, ke o vinakata, biuta nomu ripote ena kena kato ena Kingdom Hall. Ke o mani guilecava, veitaratara ena kena totolo duadua kei na ivakatawa ni nomu vulivola, kua ga ni waraki koya me qai vaqarai iko yani. Nomu yalodina ni ripotetaka nomu cakacaka vakavunau e vakaraitaka ni o doka na ituvatuva i Jiova, ni o nanumi ira tale ga na mataveitacini e nodra itavi mera soqona ra qai vakaivolataka na ripote oqori.​—Luke 16:10.

⁴ iTavi i Koya na iVakatawa ni Vulivola: Na ivakatawa ni vulivola dau veinanumi ena kauaitaka na nodra cakacaka e veivula na lewe ni nona iwasewase. (Vkai. 27:23) Ena saga me kila se ra sa vakaitavi wasoma ra qai marautaka tiko na nodra cakacaka na dautukutuku yadua, qai totolo ni soli koya me veivuke ke laurai ni sega ni vakaitavi ena dua na vula taucoko e dua na tacina. De dua, na ka beka ga ena gadrevi vua me veivakauqeti se veivakasalataki, se sureta na tacina oya me rau salavata ena cakacaka vakavunau.

⁵ Ni sa cava na vula, ena vakadeitaka na ivakatawa ni vulivola nira sa vakayacora kece nodra itavi na lewe ni nona iwasewase mera solia nodra ripote ni cakacaka. Oqo ena rawa kina vua na vunivola me vakauta ina valenivolavola ni tabana na ripote ni ivavakoso ena ikaono ni siga. Ni sa voleka ni cava na vula, ena vinaka me vakadreti ira na lewe ni nona vulivola me baleta nodra ripote. Ena vinaka tale ga ke kauta tiko ena gauna ni vuli oqori na tikidua ni ripote. Ke ra dau guiguileca e so me baleta na soli ni nodra ripote, mera vakadreti kina.

⁶ Na ripote eda solia ena kena gauna donu e yavu ni itukutuku matata e vakavotuya na veika e sa rawati ena cakacaka vakavunau. Meda veitokoni mada ga ena noda solia totolo e veivula na noda ripote!