“Au sa Rawata Vakaevei, Kevaka sa Sega e Dua me Tuberi Au?”
1 Ni taroga na matanivanua ni Iciopea o Filipi se kila na ka e wilika tiko mai na Vosa ni Kalou se sega, e qai sauma na turaga oqo: “Au sa rawata vakaevei, kevaka sa sega e dua me tuberi au?” E marau o Filipi me vakamacalataka vua na itukutuku vinaka kei Jisu, mai papitaiso kina o koya ena gauna sara ga oya. (Caka. 8:26-38) A talairawarawa tiko o Filipi ina ivakaro i Karisito meda ‘qisi ira na leweniveivanua kece ga mera tisaipeli, papitaisotaki ira, vakavulici ira.’—Maciu 28:19, 20, VV.
2 Me vakataki Filipi, e dodonu meda talairawarawa ina ivakaro i Karisito meda qisi ira na leweniveivanua mera tisaipeli. Ia, na toso totolo vakayalo a laurai vua na matanivanua ni Iciopea e vaka me sega ni dau laurai vei ira eda vakavulici ira ena iVolatabu. E kila vinaka na iVolatabu na turaga oya, e sa vuki ina lotu Vakajiu, e turaga yalomalumalumu tale ga. Sa qai vo ga vua me vakabauta ni o Jisu na Mesaia yalataki. Sa na bau dua na ka dredre ke da vuli iVolatabu kei na dua e sega ni kila na iVolatabu, e vakacalai tu ena ivakavuvuli ni lotu lasu, se sotava voli e levu na leqa. Na cava meda cakava me mana kina noda dusimaki ira na vuli iVolatabu me yacova nodra yalayala kei na papitaiso?
3 Kila na Gagadre Vakayalo Nei Gonevuli: Na itoma ni Noda Cakacaka Vakaitalatala ni Matanitu ni Okosita 1998, e vakamacalataka na dede ni gauna e rawa nida vuli kina kei na dua ena noda vakayagataka na brochure na Loma ni Kalou kei na ivola na Kila. Sa qai vakasalataki keda: “E dodonu me vakatau na vuli ena ituvaki kei na ivakatagedegede ni vuli i koya na gonevuli. . . . E sega nida saga ga me oti totolo na vuli. E vinakati vei ira na gonevuli kece me yavutaki dei na nodra vakabauta vou oqo na Vosa ni Kalou.” O koya gona, e vinaka me kua ni vakusai na vulici ni Kila, se me sagai me vakaoti ga ena loma ni ono na vula. E rawa ni sivia e ono na vula na nona vukei e dua me toso me yacova sara nona papitaiso. Ni toso tiko nomu veivakavulici e veimacawa, vakayagataka sara ga na gauna ena gadrevi mo vukei gonevuli rawa kina me kila qai vakabauta na ka e vulica tiko mai na Vosa ni Kalou. So na gauna, ena gadrevi e rua se tolu na macawa me qai vakacavari kina e dua na wase ena ivola na Kila. Oqo ena solia na gauna me wiliki, me vakamatatataki tale ga kina e levu na tikinivolatabu ena gauna ni vuli.—Roma 12:2.
4 Ia, vakacava ke sa vakacavari na Kila, o qai raica ni se vo me vakataucokotaki sara na nona kila na ka dina o gonevuli, se kena irairai ni se sega ni dei sara na lomana me tutaka na dina, me yalataka nona bula vua na Kalou? (1 Kor. 14:20) Na cava tale o rawa ni cakava mo dusimaki koya kina ina sala e basika ina bula?—Maciu 7:14.
5 Vakaceguya na Gagadre Vakayalo Nei Gonevuli: Ke laurai ni sa toso tiko o gonevuli, dina ga ni berabera, ia e sa vakaraitaka tiko na nona taleitaka na ka e vulica, tomana na vuli iVolatabu ena ikarua ni ivola ni o sa vakacavara na brochure na Loma ni Kalou kei na ivola na Kila. E sega ni tukuni mo sa cakava oqo vei ira kece nomu vuli iVolatabu, kevaka ga e gadrevi, tomana na vuli ena ivola na True Peace, ivola na Sokalou, se ivola na God’s Word. E levu na dautukutuku sa tu vei ira na ivola oqo kevaka e mani sega ena ivavakoso. Ia, ena ituvaki kece oqo, me na vulici ga kina e liu na brochure na Loma ni Kalou kei na ivola na Kila. Na vuli iVolatabu, veisikovi lesu, kei na gauna e vakayagataki ena kena tosoi tale na vuli e dodonu me wiliki, me ripotetaki, veitalia ke mani papitaiso o gonevuli ni se bera ni vakacavari na ikarua ni ivola.
6 Kena ibalebale beka oqo ni o ira era se qai papitaiso ga oqo era a vulica e dua ga na ivola, e dodonu beka mera vukei tale mera vulica na ikarua ni ivola? Sega ni gadrevi sara. Ia, de ra sa dautukutuku mate beka se ra sega ni toso ena dina, ra nanuma kina ni na vinaka mera vukei me rabailevu nodra bulataka na dina. Me lai tarogi na ivakatawa ni cakacaka ni bera ni tekivutaki tale na vuli kei na dua na dautukutuku papitaiso. Ia, ke o kila e so era a vulica ena dua na gauna sa oti na ivola na Kila ia era sega ni toso mera yalayala se papitaiso, o na via sikovi ira beka, de dua era na via vuli iVolatabu tale.
7 E ivakaraitaki ni loloma vakarisito na noda kauaitaki ira vakavoleka sara na tataleitaki eda vuli kei ira. E noda inaki meda vukei gonevuli me titobu na nona raica na dina mai na Vosa ni Kalou. Sa na qai rawa kina ni doudou me tutaka na ka dina, yalataka nona bula vei Jiova, qai vakaraitaka nona yalayala ena nona papitaiso ena wai.—Same 40:8; Efeso 3:17-19.
8 O kila na ka e yaco ni sa papitaiso oti na matanivanua ni Iciopea? “A sa lako e nona sala ko koya ka reki tiko” ni sa tisaipeli vou i Jisu Karisito. (Caka. 8:39, 40) Me noda tale mada ga na reki ena noda qaravi Jiova, vaka kina o ira eda vakavulici ira ena ka dina—ena gauna oqo, me tawamudu!