Sa Yaga Tiko Vei Iko na Soqoni?

¹ E lewe vica vata na milioni ena gauna oqo era via kila tu na sala me wali kina na nodra leqa mera bau bula marau. Era vakadeuca na ivola era dulaki tu kina na ivakasala e so, se ra qara veivuke ina so na ilawalawa se isoqosoqo me vakavinakataka na nodra bula. De na yaga oqo vei ira e so. Ia ni laurai na ivakarau ni bula ena gauna oqo, era sa bau kunea beka na tamata na vakacegu, me vakainaki na nodra bula ena nodra vakararavi ina vuku vakatamata? Dravusakulukulu!​—1 Kor. 3:18-20.

² Ena dua tale na yasana, e solia wale na noda Dauveibuli na ivakavuvuli e yaga duadua vei ira na via rogoca. E vinakata o Jiova me yaga na nona ivakavuvuli ina tamata yadua. Sa vakarautaka vakayalololoma tu mai na nona Vosa me dusimaka na kawatamata ina sala dodonu, e vakavuna tale ga me kacivaki na itukutuku vinaka ni nona Matanitu e vuravura raraba. (Same 19:7, 8; Maciu 24:14; 2 Tim. 3:16) O koya gona, eda na bula marau ga ke da rogoca na vunau i Jiova.​—Aisea 48:17, 18.

³ E cecere sara na veidusimaki i Jiova mai na ivola era dulaki tu kina na ivakasala e so, se na sasaga e dulaka tu mai o vuravura me vakavinakataki koya kina e dua. Ke da vakayagataka vinaka na isolisoli i Jiova era virikotori tu ena nona Vosa kei na veivakavulici ni nona isoqosoqo, ena vukei keda sara ga, qai tawamudu tale ga na kena yaga.​—1 Pita 3:10-12.

⁴ Me Yaga Vei Iko na Soqoni ni iVavakoso: E kauaitaka o Jiova ena gauna oqo me vakavulici keda ena nona sala, ena mai yaga ga vei keda ke da rogoca na nona ivakaro. E laurai na nona kauai vakayalololoma o Jiova ena noda soqoni e lima. E vakalevutaki na noda kila na Kalou nida tiko ena soqoni ni ivavakoso. Eda vulica kina na sala meda taqomaki keda mai na ca nida toro volekati Jiova. Ena sala oya eda vakabulabulataki tale ga kina.

⁵ E sega ni yala ga e ke. Na tiko ena soqoni ni ivavakoso ena vukei keda meda ‘dolava vakalevu na yaloda.’ (2 Kor. 6:13, VV) Oqo e kena ibalebale meda kilai ira na so tale ena ivavakoso. Ena yaga vei keda na noda veivakayaloqaqataki, me vaka a vola o Paula na yapositolo ena nona ivola vei ira mai Roma. (Roma 1:11, 12, VV) Ni volavola vei ira na Iperiu, e kaukaua sara na nona vakadreti ira sa nodra ivakarau tu mera vakaweleweletaka na sosoqoni vata vakarisito.​—Iper. 10:24, 25, VV.

⁶ E tiki bibi ni noda marautaka na bula na noda kauaitaki ira na tani. Eda uqeti kina meda vaqara na sala meda vu kina ni marau vei ira na tani. O koya gona, e sega ni yaga ga vei keda na noda soqoni vakarisito, e yaga sara tale ga vei ira eda veitokani voleka. Ena vinakati kina meda vakaitavi mai vu ni lomada.

⁷ Oqo e tautauvata kei na ivakasala ni yapositolo o Paula vei Timoci ena nona a vola: “Vakarautaki iko mo rawata na lotu dina.” (1 Tim. 4:7, VV) E rawa nida dui tarogi keda: ‘Au sa dau vakarautaki au tiko? Sa yaga tiko vei au na veika au dau rogoca ena soqoni ni ivavakoso?’ Eda na vakaio ke da dau vakarorogo ena soqoni, da qai saga meda bulataka sara ga na ka eda vulica. E dina nira vakayagataki na tacida mera veivakavulici, ia ena mata ni noda vakabauta, meda okati Jiova ga me noda Dauniveivakavulici Levu na nona tamata.​—Aisea 30:20, NW.

⁸ Koronivuli ni Vuli iTalatala Liutaki Vakalou Kei na Soqoni ni Cakacaka: Na soqoni e rua oqo e tuvanaki me vukei keda meda maqosa ena noda cakacaka vakaitalatala vakarisito. Na Koronivuli ni Vuli iTalatala Liutaki Vakalou e vaka ga e dua na koronivuli, era tiko na kena gonevuli, ra vakavulici ra vakasalataki tale ga vakawasoma. Ni o vakaitavi o vakaraitaka na ivakatagedegede ni nomu vosa ena matanalevu, kei na nomu veituberi ena Vosa ni Kalou. Ia me yaga vei iko na koronivuli, ena vinaka mo lewena, dau tiko kina, vakaitavi vakawasoma kina, qai cakava vinaka sara na nomu ilesilesi. Na toso ena vakatau ke ciqomi qai muri na ivakasala nei qasenivuli.

⁹ Eda vulica ena Soqoni ni Cakacaka na bibi ni cakacaka vakaitalatala vakarisito, eda vulica tale ga na sala meda vakaitavi kina ena cakacaka ni veivakatisaipelitaki. Sa vakayacoka tiko beka vakavinaka vei kemudou vakavuvale na soqoni e rua oqo? Erau kaya e dua na veiwatini: “E tukuni mai ena dua na Soqoni ni Cakacaka ni vinaka ke dau veivosakitaki vakavuvale na tikinivolatabu ni veisiga. Keitou sega ni dau cakava, ia oqo keitou sa cakava.” E yaga vakacava vei iratou? Erau vakadinata: “Keitou sa qai dau veitalanoa vinaka ena gauna ni kana. Sa qai sega na veiba.” E yaga tale beka ga na soqoni vei ira na gone sara? Io. E kaya na tinadratou: “E vakilai ni cakayaco sara ga na soqoni vei iratou na luvei keirau. A lasutaki keitou o koya e yabaki ono ena dua na macawa. Ia na vosa ni veivakaroti ena soqoni ena macawa oya a baleta tiko na lasu. Ni sota na matadrau kei tamana, e laurai votu e matana na nona madua, e lai lolou wale kina ena nona idabedabe. E vakavulici koya sara ga me muduka vakadua.”

¹⁰ E kaya e dua na tacida yalewa painia ni dau marautaka na veika e vakaturi ena Soqoni ni Cakacaka me vakavinakataka na noda cakacaka vakaitalatala. Baleta na cava? E kaya: “So na gauna e vaka ni sa madra mai na noqu iwalewale ni vunau. So na gauna au nanuma ni na sega ni yaga na iwalewale e vakaturi ena Noda Cakacaka Vakaitalatala ni Matanitu. Ia niu rogoca ena Soqoni ni Cakacaka ni vinakati meda tovolea, au uqeti sara ga meu vakayagataka na veika e vakaturi. E vakabulabulataka dina na cakacaka vakaitalatala!” Ni oti e vica na macawa na nona muria na ka e vakaturi, oya me tovolea me tekivutaki na vuli iVolatabu ena imatai ga ni veisiko, sa tekivutaka sara na vuli ena imatai ni gauna erau sota kina kei na dua na goneyalewa a masulaka tiko me bau vukei.

¹¹ Ni o rogoca e dua na vunau e okati kina na ivakasala vakaivolatabu me baleta na noda digidigi, o ciqoma beka ni vosa sara tiko ga vakadodonu vei iko o Jiova? E vaka oya na nona ciqoma e dua na tacida. E kaya: “Ena nona ivunau e dua na tacida tagane ena dua na soqoni e se qai oti ga oqo, a vakamacalataka kina na ka ni veivakalasai e ganita na lotu Vakarisito kei na kena e sega. Au dau taleitaka na sarava na veivacu ena retioyaloyalo. Ia ni oti na soqoni oya, au vakadeitaka sara ga e lomaqu ni qito oqo ena okati ena veivakalasai e sega ni ganita na lotu Vakarisito me sarava. Sa oti vakadua na noqu dau sarava.” O koya gona, e dina ni dau taleitaka na tacida oqo e dua na ka e vauci kina na ivalavala kaukaua, ia a rogoca ena yalomalumalumu na veidusimaki i Jiova.​—Same 11:5.

¹² Na Vunau Soqovi Levu, na Vuli Vale ni Vakatawa, Kei na Vulivola ni iVavakoso: Na vunau soqovi levu eda dau rogoca ena veimacawa e kovuta e levu na ulutaga vakaivolatabu. Sa yaga tiko beka vei iko na ivunau vaka oqo? E vakaraitaka na kena yaga vua e dua na tagane vakawati lotu Vakarisito, ena nona kaya: “A kau cake mai ena dua na vunau soqovi levu na vua ni yalo tabu kece. Ni vosa tiko ga ena vukuna kei na sala e vakayagataka me cakacakataki ira kina na vua ni yalo tabu kece oqo, a tukuna o koya e vunau ni dau digitaka e dua ga vei ira me qai cakacaka kina ena loma ni dua taucoko na macawa. Ni lai cava e dua na macawa, sa dau qai raica vata na veika e vakayacora ena veisiga kei na ivakatagedegede ni nona vuataka na vua ni yalo tabu oya. Ena macawa e tarava ena cakacaka tale ena dua na vua ni yalo tabu. Au taleitaka na kena iwalewale oya, au mani vakamurimuria.” A vakayagataka vinaka dina na ka e vulica!

¹³ Na Vuli Vale ni Vakatawa e vakavulici keda meda vakayagataka na ivakavuvuli vakaivolatabu ena ituvaki cava ga eda sotava tu ena noda bula. Oqo e vakaceguya na noda vakasama kei na lomada, dina ga ni levu na ka e lomaocaocataki tu ena bula. E vukei keda tale ga na Vuli Vale ni Vakatawa meda toso vata tiko kei na ka dina. Me kena ivakaraitaki, e sega li ni a yaga vei keda na vulici ni ulutaga oqo ena Vale ni Vakatawa, 1 Me, 1999: “Sa Kilikili me Yaco na Ka Oqo,” “Me Rai Sara Vakayalomatua ko Koya sa Wilika,” kei na “Yadra Tiko, Cakacaka Vagumatua!” E vakayacoka vakacava vei iko na vulici ni ulutaga oqo? O sa vakaraitaka beka ena nomu bula ni sa dei e lomamu na ivakasala i Jisu me baleta na gauna e se bera mai? O sa vakarautaki iko tiko ina veivakatovolei sa tu oqo e liu nida raica ni “sa tu ena vale tabu na ka vakasisila sa dauveivakarusai”? (Maciu 24:15-22) Sa laurai tiko beka ena nomu isausau kei na nomu ivakarau ni bula ni bibi duadua vei iko na vakacerecerei ni yaca i Jiova, sega ni iyau vakayago? Vakaevei na Vuli Vale ni Vakatawa, sa da vakayagataka tiko ena gauna oqo na ka eda vulica kina?

¹⁴ Vakasamataka mada na levu ni ka eda dau vulica ena Vulivola ni iVavakoso ena veimacawa. Eda vulica tiko ena gauna oqo na ivola vakaivolatabu i Taniela. Ena loma ni va na vula ni noda sa vulica tiko mai na ivola oqo, eda raica ni tubu na noda vakabauta ena veimacawa, se vakaevei? Me vakataki Taniela ga na parofita lomani i Jiova, e vakaukauataki noda vakabauta meda vosota tiko ga.

¹⁵ E Vakavulici Keda o Jiova Meda Bula Marau: Eda na sega ni sotava e levu na ka rarawa ke da muria na ivakaro ni Kalou. Ia, eda na vakila ga na bula marau. Nida muria na veidusimaki i Jiova, eda na dau vakaitavi ena nona cakacaka, sega nida vakararai wale tu ga. O ira era cakava tiko na cakacaka ni Kalou era tamata mamarau.​—1 Kor. 3:9; Jeme. 1:25.

¹⁶ Ena soqoni vakaivavakoso, vakasamataka sara vakamatua se o na vakayagataka vakacava na ka o rogoca mai kina. (Joni 13:17) Yalodina ena nomu qarava na Kalou mai vu ni lomamu. Ena vuabale kina na nomu reki. O na vakalougatataki vakalevu qai vakainaki tale ga na nomu bula. Io, ena yaga dina vei iko na soqoni.