Tukuna na iTukutuku Butakatakata me Uqeta na Tataleitaki
1 O na taleitaka mo na vakayagataka tiko ga na iwalewale vivinaka me rawa ni bulabula kina na nomu cakacaka vakaitalatala qai uqeti ira na tamata mera taleitaka na itukutuku ena iVolatabu? Tukuna na ka e yaco tu e veiyasa i vuravura, vaka kina ena nomu itikotiko me tekivu kina na veivosaki. E rawa ni o vakamacalataka na itukutuku butakatakata ena noda vanua kei na irogo mai vanua tani. E veiveisau tu ga na ka e dau yaco e veisiga. (1 Kor. 7:31) Dikeva mada e so na kena ivakaraitaki.
2 Era kauai vakalevu na tamata ena leqa vakailavo kei na tubu cake ni isau ni iyaya. E rawa gona ni o kaya:
◼ “Oni rogoca ni sa baci tubu tale na isau [tukuna na iyaya cava] ni iyaya?” De o na via tukuna ni sa sega nodra cakacaka na tamata cakacaka era sa vakacegui mai ena dua beka na kabani levu. Vakatau na nomu via tomana na veitalanoa, o rawa ni taroga: “Oni bau liaca tu se cava e sa rui dredre kina na vaqarai ni sala meda bula kina?” se “Oni nanuma ni sa na sega tu ga ni yaga na ilavo eda rawata?”
3 E rawa tale ga ni yavu ni veitalanoa na ivalavala kaukaua me vaka na leqa ena vuvale se kena e yaco vei ira na gonevuli. E rawa ni o taroga:
◼ “Oni sa wilika beka ena niusipepa ni [tukuna na leqa a yaco ena itikotiko]?” Kuria ena nomu taroga: “Na cava oni nanuma e vakavuna tiko na ivalavala kaukaua e vuravura?” se “Oni bau vakasamataka tu ni na yaco na gauna meda kua ni lomaleqataka kina na noda bula?”
4 Na itukutuku ni vakacaca ni waluvu, na uneune, se na tiko yavavala ena veiyasa i vuravura e dau uqeta tale ga na tataleitaki. Kena ivakaraitaki, o na rairai taroga:
◼ “E vakavuna beka na Kalou na [tukuna na leqa tubukoso]?” Se rawa ni o vakaraitaka na tiko yavavala e se qai yaco ga, qai kaya: “Nida vinakata kece na bula vakacegu, na cava e sa rui dredre kina?”
5 Nanamaki toka ena itukutuku butakatakata e rawa ni o vakayagataka me iucu ni nomu vosa. E so na iwalewale yaga e vakaturi ena ivola Na Sala me Tekivu Qai Tomani Kina na Veivosaki Ena iVolatabu ena ruku ni ulutaga “iTukutuku Butakatakata,” taqana 4. Ia, kua ni o veitovaki ena ka vakapolitiki se ka ni bula raraba. Vakamua ga na nodra vakasama ina iVolatabu mera kila ni Matanitu ni Kalou na iwali duadua ga ni leqa ni kawatamata.