Vunau ena Vuravura Veilecayaki Oqo
1 E dau totolo na veisau! E rawa ni yaco vakasauri na leqa tubukoso, leqa vakailavo, yavala ni bula vakapolitiki, se dua na ka e yaco e volatukutukutaki vakalevu e ka ni veitalanoa. E dau totolo tale ga vaka kina na veisau ni ka era kauaitaka na tamata. (Caka. 17:21; 1 Kor. 7:31) Ena vuravura veilecayaki oqo, e rawa vakacava nida dreta na nodra vakasama na tamata me rawa nida wasea kina vei ira na itukutuku ni Matanitu ni Kalou?
2 Mo Kila na Ka Era Kauaitaka: Dua na sala e rawa nida dreta kina na nodra vakasama oya na noda tukuna e dua na itukutuku butakatakata. Nona uqeti ira na vakarorogo o Jisu mera vakasamataka na nodra veiwekani kei na Kalou, a tukuna kina e dua na leqa e se qai yaco oti ga. (Luke 13:1-5) Me vaka tale ga oya noda wasea yani na itukutuku vinaka, meda sema na noda ivakamacala kei na itukutuku se dua na ka e veitalanoataki vakalevu e tara na nodra bula na tiko ena yalava oya. Ia, nida veitalanoa kei ira, e dodonu meda qarauna me kua nida veitovaki ena ka vakapolitiki se ka ni bula raraba.—Joni 17:16.
3 Rawa vakacava nida kila na ka era vakasamataka tiko? E dua na sala vinaka, oya noda taroga na taro da qai vakarorogo. (Maciu 12:34) Noda kauaitaki ira ena uqeti keda meda kila na nodra nanuma da qai saga meda kila tale e so na ka me baleti ira. Na veika ena tukuna o itaukeinivale e rawa sara ga nida kila kina na ka era kauaitaka na tiko ena yalava oya, eda na kila tale ga na ka meda vakamacalataka vei ira.
4 Vakarautaka na Ka Mo Tukuna: Nida vakarautaki keda ena cakacaka vakavunau ena vuravura veilecayaki oqo, e rawa nida vakayagataka na ivola lailai Na Sala me Tekivu Qai Tomani Kina na Veivosaki ena iVolatabu. E so na vakatutu e rawa ni okati ena noda vakamacalataka na itukutuku butakatakata e koto ena tabana 2-3, 4 ena ulutaga “Basulawa/Noda Taqomaki” kei na “iTukutuku Butakatakata.” E so tale na kena ivakamacala e rawa ni kune ena Noda Cakacaka Vakaitalatala, Sepiteba 2000, tabana 4. Ni o sa vakarautaka na ka mo na tukuna, kua ni guilecava mo okata e dua na tikinivolatabu e veiganiti.
5 Nida kila na veiveisau ni ka era kauaitaka na tamata, e dodonu me veiveisau tale ga na ka eda na tukuna me salavata kei na ka era kauaitaka. Ena sala oya eda sa na veitalanoataka tiko kina na veika e tara sara tiko ga na nodra bula. Sega wale ga oya, eda na vukea tale ga kina e levu mera mai kilai Koya e sega ni dau eiveisau na nona itovo kei na nona ivakatagedegede.—Jeme. 1:17.