Kato ni Taro

◼ Ena yaga vakacava vei ira na vakarorogo mera cega na tikinivolatabu ena gauna e sureti ira kina o koya e vunau?

Ena vakatau ena ulutaga e vunautaki tiko na levu ni tikinivolatabu era na sureti mera cega na vakarorogo, qai so tale ga na ivunau e yavutaki ena kena veivosakitaki na tiki yadua ni dua na wase ni Vosa ni Kalou.

Me nanumi matua ni dua na vuna e dau wiliki kina na iVolatabu oya me vakadeitaka ni ka e tukuni tiko e vakaivolatabu. (Caka. 17:11) Dua tale, meda raica sara ga na ivakadinadina vakaivolatabu e tokona na ka e veivosakitaki tiko me vaqaqacotaka na noda vakabauta. Nida dikeva na ka e tukuna na iVolatabu ena gauna e wili tiko kina e dua na tikina bibi, e rawa ni vakadeitaka sara ga ena noda vakasama na ka e tukuni tiko. Me ikuri ni noda cega na tikinivolatabu, e yaga tale ga meda vola toka e so na ka me baleta na vakasama e vakamacalataki tiko.

Na sui ni ivunau e vakarautaka na iSoqosoqo e levu kina na tikinivolatabu me vakarabailevutaka e dua na ulutaga, e vakarautaki oqo me yaga vua e vunau me vukei koya ena nona vakavakarau. Na tikinivolatabu gona oqo ena vakamatatataka na itukutuku e vauca na ulutaga e vosa tiko kina, se vukea me taura vinaka na ivakavuvuli vakaivolatabu e kovuta, qai kila tale ga na veitaravi ni ka e vosa tiko kina. Me vakatau vua e vunau na tikinivolatabu cava me vakayagataka ni vakabibitaki ena ivunau, qai sureti ira na vakarorogo mera muri koya ena gauna e wilika tiko kina kei na nona vakamacalataka tale ga. E so tale na tikinivolatabu e tokona na ivunau e rawa ni tukuna se vakamacalataka ga, ia e sega sara ni gadrevi vei ira na vakarorogo mera cega na nodra iVolatabu.

Me wilika sara ga vakadodonu mai na iVolatabu o koya e vunau na tikinivolatabu e digitaka, me kua ni wilika mai na dua na tikidua e taipataki tu. Ni sureti ira na vakarorogo mera vakamuri koya tiko ena gauna e wiliwili tiko kina, me tukuna vakamatata na ivola ena iVolatabu, na wase kei na tikina. Ena gauna e taro kina se vakamacalataka vakalekaleka e dua na tikinivolatabu, e solia na gauna vei ira na vakarorogo mera vaqara na tikinivolatabu. Ni tukuna vakarua na ivola, na kena wase, kei na tikina ena vukei ira na vakarorogo. E sega ni vinakati me tukuni na draunipepa e tiko kina na tikinivolatabu baleta ni duidui tu na iVolatabu era vakayagataka na vakarorogo. Nida cega na tikinivolatabu ena gauna eda sureti kina, ena vukei keda na vakarorogo na kaukaua ni Vosa ni Kalou me vaka ga e vakamacalataki tiko ena ivunau.​—Iper. 4:​12.