Vakarautaki ni Vunau Soqovi Levu

E LEVU na ivavakoso ni iVakadinadina i Jiova era dau vakarautaka e veimacawa e dua na vunau vakaivolatabu mera sureti kina na lewenivanua. Ke o qase, se o dauveiqaravi vakaitalatala, e vakacava, e laurai vei iko ni o maqosa ena vunau kei na veivakavulici e matanalevu? Ke vaka kina, e rawa ni o sureti mo vakaitavi ena vunau soqovi levu. Na Koronivuli ni Vuli Vunau e sa vukei ira e sagavulu na udolu na tagane mera dauvunau maqosa. Ni o lesi mo vakaitavi ena vunau soqovi levu, na cava mo cakava mada e liu?

Dikeva Vinaka Mada na Suinivunau

Ni bera ni o vakekeli, wilika mada na suinivunau, vakasamataka vakatitobu me yacova ni o sa taura rawa na ka e vakabibitaki tiko kina. Me dei tiko e nomu vakasama na usutu, se na ulutaga ni vunau. Na cava o na via vakavulica vei ira na vakarogoci iko? Na cava na nomu inaki?

Saga mo kila na vakasama e vakabibitaki ena ulutaga lelevu. Dikeva na dui yasana era vakabibitaka. Era veisemati vakacava kei na usutu ni vunau? Ena ruku ni ulutaga lelevu oqori, sa ra qai tuvani sobu kina e so tale na ulutaga lalai. Sa ra qai tuvani veitaravi sobu na veitikina e so era vakarabailevutaka na ulutaga lalai. Dikeva na isema ni dua na iwasewase ni suinivunau mai na iwasewase sa oti, nona idewadewa ina iwasewase e tarava, kei na kedra idewadewa veitaravi me lai rawati kina na inaki ni vunau. Ni o sa kila rawa na ibalebale ni usutu ni vunau, na kena inaki, kei na sala ena rawati kina na inaki oqori mai na veitikina bibi ni vunau, sa qai kena gauna mo vakarabailevutaka kina na suinivunau.

Ke o se qai vakaitavi vou ena vunau, de na rawarawa mo raica na nomu vunau me vaka e va se lima na vunau leleka, mera yadua na kena ulutaga bibi. Vakarautaki ira yadudua.

Na suinivunau e vakarautaki e yavu mo vakavakarau kina. E sega ni kena inaki me wiliki. Oqori na sui ga. Sa na qai vakatau vei iko na lewena, utona, kei na kena talaucaki vakabulabula.

Vakayagataki ni Tikinivolatabu

O Jisu Karisito, vaka kina o iratou na nona tisaipeli, eratou dau yavutaka ena iVolatabu na nodratou veivakavulici. (Luke 4:16-21; 24:27; Caka. 17:2, 3) O rawa ni cakava tale ga oqo. E dodonu me yavu sara ga ni nomu vunau na iVolatabu. Kua ni vakamacalataka tiko ga se vakaibalebaletaka tiko ga na itukutuku e so e vakarautaki ena suinivunau, raica se ra tokoni vakacava na itukutuku oqori mai na iVolatabu, veivakavulici ga mai na iVolatabu.

Ni o vakarautaka nomu vunau, dikeva na tikinivolatabu kece era volai ena suinivunau. Raica vinaka na veitikina era yavolita na tikina o dikeva tiko. E so na tikinivolatabu era volai mera ikuri ga ni ivakamacala. E sega ni tukuni mera wiliki se vakamacalataki kece. Digitaka ga na kena e ganiti ira na vakarogoci iko. Ke o raici ira vinaka na tikinivolatabu era volai ena suinivosa, ena sega tale beka ni gadrevi mo lai kauta mai e so na tikinivolatabu tani.

Na vinaka ni nomu itavi e sega ni vakatau ena levu ni tikinivolatabu o vakayagataka, e vakatau ga ena vinaka ni nomu veivakavulici. Ni o vakarau wilika e dua na tikinivolatabu, vakaraitaka e liu na vuna o wilika kina. Tikica na gauna mo vakamacalataka kina. Ni o wilika oti, cega tiko ga nomu iVolatabu ni o vakamacalataka lesu. Era na vakamurimuri iko na vakarorogo. O na uqeti ira vakacava na vakarorogo, mo vukei ira tale ga me yaga sara vei ira na Vosa ni Kalou? (Niem. 8:​8, 12) O na vakayacora rawa oqo ena nomu vakamacala, vakayagataka e so na vosa vakatautauvata, kei na nomu vakaibalebaletaka.

Vakamacala. Ni o vakarau vakamacalataka e dua na tikinivolatabu me tokona nomu ile, tarogi iko: ‘Cava na kena ibalebale? Na cava meu vakayagataka kina ena noqu vunau? Na taro cava beka era na veinanuyaka tiko na vakarorogo me baleta na tikinivolatabu oqo?’ De na yaga mo na vakalewa na gauna e volai kina, vuna, kena inaki, ituvaki e volai kina, na yalo e tau kina na kena vosa, kei na inaki nei koya na dauvolavola. Ena vinakati i ke na vakekeli. E levu sara na itukutuku yaga o na kunea ena ivola e vakarautaka na “dauveiqaravi yalo dina ka vuku.” (Maciu 24:​45-​47, VV) Sega ni tukuni mo vakamacalataka vakamatailalai na veika e baleta na tikinivolatabu o na wilika, vakaraitaka ga na tikina o via vakabibitaka mai na tikinivolatabu me salavata kei na ka o vakamacalataka tiko.

Vosa Vakatautauvata. Na inaki ni vosa vakatautauvata me vakarawarawataka vei ira na vakarorogo nodra kila e dua na vakasama titobu, se me vukei ira mera nanuma e dua na ivakavuvuli o vakamacalataka. Na vosa vakatautauvata ena vukei ira mera kila na ka o tukuna, ra qai sema vata kei na dua na ka era sa kila rawa tu. Oqo sara ga na ka a cakava o Jisu ena gauna e talaucaka kina nona iVunau rogo ena Ulunivanua. “Na manumanu vuka,” “na viavia ni veikau,” “na matamata-ni-koro qiqo,” ‘na vale e tara ena dela ni vatu,’ kei na levu tale na vosa vaka oqo e vakavuna me dau titobu, matata, qai guiguilecavi dredre na nona veivakavulici.​—Maciu wase 5–7.

Vakaibalebaletaka. Ena vakarabailevutaka nodra kilaka na vakarogoci keda na noda vakamacalataka na tikinivolatabu kei na noda vakayagataka na vosa vakatautauvata me vakamatatataka, ia ena qai yaga taucoko sara na kilaka oqori ke bulataki. E macala ni nodra itavi na vakarogoci iko mera dui bulataka na ka era vulica mai na iVolatabu, ia o na rawa ni vukei ira mera raica na ka e dodonu mera cakava. Nira sa taura rawa na vakarorogo na ibalebale ni dua na tikinivolatabu e vakamacalataki, ra raica tale ga na tikina e vakabibitaki, tikica tale ga na gauna mo vakamacalataka kina na yaga ni kena vakabauti qai muri. Vakaraitaka na yaga ni kena tababokoci na vakasama kei na itovo e sega ni salavata kei na ivakavuvuli e veivosakitaki tiko.

Ni o vakasamataka tiko se mo vakaibalebaletaka vakacava e dua na tikinivolatabu, kua ni guilecava nira cavutu mai na duidui ituvaki kei na ivakarau ni bula na vakarorogo. Ra tiko beka e so na tataleitaki vou, itabagone, itabaqase, kei ira era valuta voli e levu sara na nodra dui leqa. Me yaga na nomu vunau, me rawa ni taurivaki dina ena bula ni veisiga. Qarauna me kua ni tau na nomu ivakasala ni vaka e baleti ira ga e vica.

Ka me na Vakatulewa Kina o Koya e Vunau

Levu na ka me baleta na nomu vunau e sa vakatulewataki rawa vei iko. Sa vakamatatataki tu na veitikina mo na vakabibitaka, kei na balavu ni gauna mo na vakayagataka ena iwasewase yadua. Na kena vo sa na qai nomu. O na lewa beka mo vakamacala vakabalavu ena dua na tikina bibi, vakalekaleka ga ena dua tale. Kua ni nanuma ni dodonu me tautauvata kece na gauna o vakayagataka ena veitikina bibi yadua. Oqo e rawa ni vakavuna mo saga ga mo vakacavara na nomu vunau, o qai vakaosota na nodra vakasama na vakarorogo ena levu na ka o vakatukuna. O na kila vakacava na tikina mo na vakamacalataka vakavinaka kei na kena mo vakamacalataka ga vakalekaleka, se kena mo na lako sivita sara? Tarogi iko mada: ‘Na tikina cava ena tokona sara ga na ka e vakabibitaki tiko ena vunau? Na tikina cava ena yaga vakalevu duadua vei ira na vakarogoci au tiko? Keu na sega ni vakamacalataka e dua na tikinivolatabu se so na vakasama, ena vakaleqa beka na noqu ivakamacala?’

Kua ni tukuna nomu vakasama ga se dua na ka e sega ni vakadeitaki. Na Luve ni Kalou sara mada ga o Jisu Karisito e sega ni via cavuta e dua na ka ‘vakai koya ga.’ (Joni 14:10) Nanuma tiko ni o ira era lako mai ena soqoni ni iVakadinadina i Jiova era lako mai baleta nira via rogoca na vakamacalataki ni iVolatabu. Ke dau tukuni ni o iko e dua na dauvunau vinaka, me vu oqo ena nomu dau vakamuai ira na vakarorogo​—sega vei iko​—ina Vosa ga ni Kalou. Oqo na vuna me dau taleitaki kina na nomu vunau.​—Fpai. 1:10, 11.

Ni sa mai vakalewe vinaka na suinivunau ena veitikinivolatabu kei na kedra ivakamacala momona, sa qai kena gauna mo vakatovotovo kina. E vinaka mo vosa tu i cake. Na kena inaki bibi mo vakadeitaka ni sa kasa vinaka vei iko na veitikina kece. Ni o vosa, me lako sara ga mai lomamu na ka o tukuna, me bula na nomu vunau qai momona nomu vakamacalataka na ka dina. Ni bera ni o vunau, tarogi iko mada: ‘Na cava na inaki ni noqu vunau? Sa matata vei au na veitikina bibi? Sa dei tiko ni yavu sara ga ni noqu vunau na veitikinivolatabu? Sa ra veisemati vinaka na veitikina bibi kece? Ena vakavuna beka na noqu vunau me vakavinavinakataki o Jiova kei na veika e solia? Vakacava na noqu itinitini ni vosa, e sema vakadodonu vakavinaka kei na noqu usutu, e vakatakila vei ira na vakarorogo na ka mera cakava, qai uqeti ira mera cakava sara?’ Ke o sa vakaio ina taro kece oqo, sa na vakaraitaka ni o sa tu vakarau mo ‘vakayagataka na kilaka’ me yaga vei ira na lewe ni ivavakoso, qai vakacaucautaki kina o Jiova!​—Vkai. 15:2.