Nanuma Matua na Cakacaka Veivakurabuitaki ni Kalou
1 E tolu na siga lagilagi eda soqo vata kina ena Soqo ni Tikina na “Muria na Vosa ni Kalou.” Eda vagalalataki keda mai na ogaoga ni veisiga da qai vakasamataka ga vakabibi na cakacaka veivakurabuitaki i Jiova. E tuvanaki na porokaramu me maucokona kina na noda vakabauta na Kalou kei na nona Vosa, me vakadeitaka na noda veiwekani kei koya, qai vakaukauataki keda meda gu ena cakacaka vakaitalatala. E yaga vakacava vei keda na ka eda vulica?—Joni 13:17.
2 Vuvale Era Talairawarawa Ina Vosa ni Kalou: Na vosa veitaravi “Talairawarawa Ina Vosa ni Kalou” e vukei keda meda dikeva na ituvaki vakayalo ni noda vuvale. Era taleitaka na gone mera dau vuli. O koya gona, era uqeti na itubutubu vakalou mera cakava me yavu ni kena taravaki e dua na vuvale vakayalo na nodra dau vuli iVolatabu vakavuvale. E levu na ulunivuvale sa ra veivosakitaka tiko kei ira na luvedra na brochure vou E Rawa Mo iTokani ni Kalou! Oqo ena vukei ira mera bucina e dua na veiwekani vinaka kei Jiova qai tudei tale ga. Ra itubutubu, ni vakavulici ira na luvemuni mera nanuma matua na itovo ni Kalou. Mo vakaraitaka sara ga ni o lomani koya na Kalou kei na ka kece e cakava. (Same 103:2) Dou cakacaka vata vakavuvale me sauvi kina na isausau vakayalo era vakainaki era okati vata tiko kei na noda soli keda vakalevu ena noda qaravi Jiova.
3 Vakararamataka Noda Sala na Vosa ni Kalou: Eda marautaka na imatai ni itabataba ni noda ivola vou oqo na Parofisai i Aisea—Me Vakararamataka na Kawatamata I. Sa yaco e vei na nomu wilika tiko na imatai ni kena itabataba oqo? E parofisaitaka na ivola i Aisea na veilewai vakaloloma ena yacovi ira na matanitu tawavakalou kei na veivakalougatataki totoka ena kauta mai na Matanitu ni Kalou vei ira na tamata ni Kalou. (Aisea 34:2; 35:10) E vakataudeitaka tale ga na ivola oqo na noda vakabauti Jiova kei na noda nuitaki koya, wili kina na sala e dau cakava kina na ka.—Aisea 12:2-5.
4 Nida wilika na Parofisa i Aisea I, e rawa sara ga ni o vakila na nona yalodina tiko ga vei Jiova o Aisea, dina ga ni a bula maliwai Vira tu na tamata ivakarau ca. Ni sureti me dua e kauta na itukutuku ni Kalou, e sauma o Aisea: “Koi au oqo; mo ni talai au.” (Aisea 6:8) Na noda dau vakasamataka na yalo e tu vei Aisea me cabori koya kina, ena uqeti keda meda vunautaka tiko ga na itukutuku vinaka, meda vakaitavi vakalevu ena “vakadinadina ki na veivanua kecega.”—Maciu 24:14.
5 Ena qai lagilagi ga e matada o Jiova kevaka eda dau nanuma matua na nona cakacaka. O koya gona, mo vakamareqeta na nomu itavi dokai mo dua o muria na vosa ni Kalou!