Ra Marau na Muria na Vosa ni Kalou

“Eda kila ni soqo oqo e dua na isolisoli i Jiova me vakarautaki keda ena so tale na cakacaka ni Matanitu ni Kalou,” e kaya e dua vei ira a vosa taumada ena Soqo ni Tikina ni iVakadinadina i Jiova, na kena usutu, “Muria na Vosa ni Kalou.” E tomana: “Eda namaka meda mai vakavulici me baleta na vuvale mamarau, eda na vakayaloqaqataki meda kabita matua na isoqosoqo i Jiova, eda na vakaukauataki tale ga meda gugumatua tiko ena cakacaka ni Matanitu ni Kalou, eda vakasalataki tale ga meda yadra tiko.”

ME TEKIVU sara mai ena vula o Me 2000, e vica vata na milioni era muria na vosa ni Kalou kei na nodra itokani era tabili yani ina vica vata na udolu na vanua vakarautaki ena veiyasa i vuravura mera lai vakavulici kina ena iVolatabu. Na cava era vulica ena soqo siga tolu oqo?

iMatai ni Siga​—Kua ni Guilecava na Loloma i Jiova

Ena imatai ni vosa, e sureti ira na vakarorogo na jeameni mera tiko ena siga kece ni soqo mera vakila kina na veivakalougatataki e kauta mai nona sokaloutaki ena duavata o Jiova ena veisoqo ni tikina. E vakadeitaki vei ira kece na tiko ena soqo ni na vakalevutaki nodra vakabauta qai vakaukauataki tale ga nodra veiwekani yadudua kei Jiova.

“Na Kalou mamarau” e kila na veika eda gadreva meda marau tale ga kina. (1 Timoci 1:​11, NW) O koya gona, na ivunau, “Vakavumarau na Cakava na Loma ni Kalou” e vakabibitaka ni Vosa i Jiova, na iVolatabu, e tuvanaki tu kina na ivakarau vinaka duadua ni bula. (Joni 13:17) Nodra vakatarogi e so na iVakadinadina i Jiova era sa veiqaravi dede tu mai, e vakaraitaka ni kena vakayacori na loma ni Kalou ena ituvaki cava ga eda tu kina, ena vakainaki cake kina na noda bula. Na vosa e tarava, “Marautaka na Vinaka i Jiova,” e vakabibitaka nodra “vakadamurimuria na Kalou” na lotu Vakarisito era na via vuataka ena nodra bula “na i valavala kece ga e vinaka.” (Efeso 5:​1, 9, VV) E dua na sala uasivi e rawa nida cakava kina oya noda vunautaka na itukutuku vinaka kei na noda veivakatisaipelitaki.​—Same 145:7.

Na veivosakitaki ni “Tudei ni O Raici Koya sa Tabogo” e vakaraitaka na sala e vukei keda kina vakacava na vakabauta kaukaua meda “raica” na Kalou sa tabogo. E vakamacalataka o koya a vosa na sala era kila vinaka kina na tamata vakayalo na itovo ni Kalou, okati kina nona rawa ni kila na ka sara mada ga eda vakasamataka. (Vosa Vakaibalebale 5:​21) O ira na vakatarogi era vakasavuirogorogotaka na ka era cakava me kaukaua kina nodra vakabauta, ra qai vakaliuca ena nodra bula na veika vakayalo.

E tini na porokaramu ena mataka ena ulunivosa, “Vakavinavinaka vei Jiova​—Na iVurevure ni Ka Veivakurabuitaki Kece Ga.” E vukei ira na vakarorogo mera taleitaka ni levu ga ni noda mai vulici Jiova, na levu tale ga ni noda kila na vuna meda vakavinavinakataki koya kina, ni iVurevure ni ka veivakurabuitaki kece ga o koya. E kaya o koya e vosa: “Nida vakasamataka na vakatubuqoroqoro ni veika e cakava na Kalou vata kei na veika vivinaka sa cakava tiko vei keda nikua, e uqeta na lomada meda vakavinavinakataki koya. Eda via vakavinavinakataki koya tale ga nida vakasamataka na ka veivakurabuitaki a vakayacora ena vukudra na nona tamata ena gauna makawa. Eda vakasaqara tale ga na sala meda vakaraitaka kina na noda vakavinavinaka nida vakananuma na vosa ni yalayala ni veika vinaka sa vakarau cakava o Jiova.”

E tekivu na porokaramu ena yakavi ena ivunau, “Kua ni Ceguoca Ena Caka Vinaka,” e vakananuma lesu vei ira kece na vakarorogo ni bula dredre sa vakilai tu e vuravura nikua e vakaraitaka ni sa voleka sara na icavacava. (2 Timoci 3:1) Noda sega ni ceguoca, e rawa nida vakaraitaka nida “vakataki ira ga era sa vakabauta ka ra sa vakabulai.”​—Iperiu 10:​39, VV.

Na ivakasala vakaivolatabu cava e cauraki me baleta na bula vakavuvale? Na imatai ni vosa veitaravi ena soqo,​—“Talairawarawa Ina Vosa ni Kalou”​—e tekivu ena ivunau, “Ni O Digia na Watimu.” Ena vakatulewa sara vakabibi e dua ni digitaka e dua me vakawatitaka. Oya na vuna, era waraka kina na lotu Vakarisito mera matua ra qai vakawati, nodra vakawati “me ia ga ena Turaga.” (1 Korinica 7:​39, NW) Na vosa e tarava e veivosakitaki kina nona vinakata o Jiova mera kaukaua vakayalo na vuvale kece vakarisito, qai vakamacalataki na sala yaga e so ena rawati kina. Na iotioti ni vunau ena imatai ni vosa veitaravi e vakadreti ira kina na itubutubu, ni nodra vakavulici luvedra mera lomana na Kalou e tekivu sara ga vei ira, mera lomani koya mada e liu.

Na tikina e cauraki ena ivunau, “Qarauni Iko Mai na Vakauvosa Kei na Kakase” e vukei ira kece na vakarorogo mera kila ni dau yaco e so na ka veivakurabuitaki, ia e dodonu meda dikeva vakavuku, meda kakua ni vakacalai, nida rogoca na itukutuku veivakidroataki. Era uasivi sara na lotu Vakarisito nira vosataka na ka era kila ni dina​—na itukutuku vinaka ni Matanitu ni Kalou. Lewe levu era dikeva ni vakacegui ira qai tarai ira sara ga na ivunau e tarava, “Vosota Tiko ‘na Voto ni Kau e Lewemu.’” E vukei ira mera raica ni rawa ni vakaukauataki keda o Jiova ena yalona tabu, nona Vosa, kei ira na mataveitacini vakarisito kevaka mada ga eda sotava tiko na veivakatovolei. Na veika a sotava na yapositolo o Paula e vu sara ga ni veivakayaloqaqataki ena tikina oqo.​—2 Korinica 12:​7-​10; Filipai 4:​11, 13.

E tini na imatai ni siga ena ivunau, “Lako Vata Kei na iSoqosoqo i Jiova.” E veivosakitaki kina na tolu na vanua e sa toso sara tiko ga kina na isoqosoqo ni Kalou: (1) na rabailevu ni rarama vakayalo e vakarautaka o Jiova, (2) na cakacaka vakaitalatala e vakacolati keda kina o Jiova, kei (3) na veiveisau ena ituvatuva vakaisoqosoqo e vakayacori ena kedra gauna donu. E qai kaya ena yalonuidei o koya e vunau: “Eda vakanamata tu ena veika sa tu e matada.” E kaya tale: “Eda sega tale ni qai vakabekataka kina ni rui bibi meda taura dei tiko ga na vakabauta e tiko vei keda mai na ivakatekivu me lai yacova sara na ivakataotioti!” (Iperiu 3:​14) E tini na ivunau oya ena kena vakaraitaki na brochure vou, E Rawa Mo iTokani ni Kalou! E idusidusi yaga dina ni veivakavulici mera vulici Jiova kina na sega ni vuli vinaka se o ira na sega ni kila vinaka sara na wilivola.

iKarua ni Siga​—Tukuna Tiko ga na Cakacaka Veivakurabuitaki ni Kalou

Ni oti ga na dikevi ni tikinivolatabu ni veisiga, e tomani na soqo ena ikarua ni siga ena vosa veitaravi, “iTalatala ni Vosa ni Kalou.” Na imatai ni vunau e vakatabakidua ena veika sa rawati ena cakacaka vakavunau e vuravura raraba. E levu vei ira na cata na itukutuku ni Matanitu ni Kalou era na bolea na noda vosovoso ena cakacaka oqo. Era vakamacalataka e vica na dautukutuku dede na sala mera reki tiko ga kina ena cakacaka vakaitalatala oya ena nodra vakadeitaka tu ga nodra vakasama kei na lomadra nira sotavi ira na sega ni dau veikauaitaki se dau veitusaqati. Na ikarua ni vunau e vakadreti ira na vakarorogo nira dau saga na iVakadinadina i Jiova mera tarai ira na tamata ena vanua kece ga, ena gauna lokuci vaka kina ena gauna tawalokuci. Na ikatolu ni vunau e vakamacalataki kina na sala e so e rawa nira vakarabailevutaka kina vakataki ira na lotu Vakarisito kece nodra cakacaka vakaitalatala. Mera cakava oqo, e vakabibitaka o koya e vosa ni dodonu me vakaliuci na Matanitu ni Kalou, kevaka sara mada ga ena yaco kina e so na ka e sega ni namaki kei na nomu vakuai iko.​—Maciu 6:​19-​21.

Nida bula tu ena vuravura tawavakalou e kocovi kina vakasivia na iyau vakayago, e lako donu sara ga mai na ivunau, “Me Tiko Vei Iko na Yalo ni Qaravi Kalou, Qai Lomavakacegu Ena Veika O Taukena Tu.” Ni yavutaka o koya e vosa e so nona ivakamacala mai na 1 Timoci 6:​6-​10, 18, 19, e vakaraitaka kina o koya na sala ena vukei ira kina na lotu Vakarisito na yalo ni qaravi kalou mera kua ni daulomana na ilavo, ni rawa nira coriti kina qai tini ena rarawa. E vakabibitaka se mani vakacava na ituvaki ni noda bula vakailavo, ena vakatau na noda bula marau ena noda veiwekani vinaka kei Jiova kei na qaqaco ni noda bula vakayalo. E levu e tarai ira sara ga na tikina e cauraki ena ivunau, “Meda Kakua ni Vakamadualaka na Kalou.” E vakabibitaki kina ni sega ni dau guilecavi ira nona iVakadinadina yalodina o Jiova. Na ivakaraitaki vakasakiti i Jisu Karisito​—e “sa i koyakoya tiko ga e na siga e na noa, edaidai, kei na veigauna kece ga mai muri”​—ena vukei ira e levu mera ciciva tiko ga na veitaucici ni bula ena vosota.​—Iperiu 13:​8, VV.

E tini na porokaramu ena mataka ena ivunau ni papitaiso​—dau namaki sara oqo ena nodra soqo lelevu na iVakadinadina i Jiova. E marautaki dina noda raica nodra muria na weniyava i Jisu na se qai yalayala vou nira papitaiso ena wai! (Maciu 3:​13-​17) O ira kece era taura na ikalawa oqo era sa cakava oti e levu na ka mera muria kina na vosa ni Kalou. Me kena ikuri, nira papitaiso era sa wili mera italatala ni itukutuku vinaka, ra qai marau nira kila nira veitomani tiko ena vakacerecerei ni yaca i Jiova.​—Vosa Vakaibalebale 27:11.

E sega ni wereubiubi tale na ivakasala ena ivunau, “Gadrevi na Yalomatua ‘me Vakaduiduitaki Kina na Vinaka Mai na Ca.’” E tawayaga na ivakatagedegede vakavuravura me baleta na vinaka kei na ca. E vinakati gona meda vakararavi ena ivakatagedegede i Jiova. (Roma 12:2) Era vakayaloqaqataki kece na tiko ena soqo mera sasagataka vakaukaua me donu na ka era kila me baleta na sala i Jiova ra qai tubu mera matua. Nida bulataka, eda sa vakavulica tiko kina na lomada meda “vakaduiduitaka na vinaka mai na ca.”​—Iperiu 5:​11-​14, VV.

E tarava na vosa veitaravi, “Gumatua Mo Kaukaua Vakayalo.” Era kila na lotu Vakarisito dina na kena bibi me kaukaua qai vakabibitaki na ka vakayalo. E gadrevi kina na cakacaka vakaukaua​—na wilivola, na vuli, kei na vakanananu vakatitobu. (Maciu 7:​13, 14; Luke 13:24) O ira tale ga era kaukaua vakayalo era na masu tiko ga “e na masumasu kecega kei na daukerekere.” (Efeso 6:​18) Eda kila ni noda masu e vakatakila na titobu ni noda vakabauta kei na noda qaravi Kalou, na ivakatagedegede ni noda kaukaua vakayalo, kei na ka eda vakatoka me “veika sa vinaka sara.” (Filipai 1:​10) E vakabibitaki tale ga na kena taravaki e dua na veiwekani vinaka kei Jiova me vaka nona rekitaka e dua na gone dau vakarorogo na nodrau veiwekani kei na tamana yalololoma. Sega ni kena ibalebale ga nida sa lotu​—eda kila ni lotu dina​—ia me kaukaua tiko ga na noda vakabauta, ‘me vaka sara ga nida raica tiko na Kalou.’​—Iperiu 11:6, 27.

E tomani tale na kena veivosakitaki na toso vakayalo ena ivunau, “Me Laurai na Nomu Toso.” E veivosakitaki kina e tolu na vanua ena laurai kina na toso: (1) vakalevutaki na kila, na yalomatua, kei na vuku, (2) vuataki ni vua ni yalo tabu, kei na (3) colati ni noda itavi na lewenivuvale yadua.

Ni mai tini na iotioti ni vunau, “Toso Tiko Ena Rarama ni Vosa ni Kalou,” era marau na tiko ena soqo mera taura na ivola vou, Parofisai i Aisea​—Me Vakararamataka na Kawatamata I. Oqo na imatai ni rua na itabataba e dikevi kina na veiwase yadua ni ivola vakaivolatabu ni Aisea. E kaya o koya e vunau, “E yaga vei keda ena gauna oqo na ivola i Aisea.” E tomana: “E levu na kena parofisai e vakayacori ena gauna i Aisea. . . . Ia, e levu na parofisai i Aisea e vakayacori tiko ena gauna oqo, kei na so tale ena lai vakayacori ena vuravura vou e yalataka na Kalou.”

iKatolu ni Siga​—Muria na Vosa i Jiova

Na iotioti ni siga ni soqo e tekivu ena veivosakitaki ni tikinivolatabu ni siga oya. E tarava na vosa veitaravi, “E Vakaibalebale Vei Ira Era Cakava Tiko na Loma ni Kalou na Parofisai i Sefanaia.” Na tolu na ivunau veitaravi oqo e vakaraitaka, ni o Jiova ena vakararawataki ira era sega ni muria na nona ivakasala me vaka ga a cakava ena nodra gauna na Juta vukitani. Nira valavala ca vua na Kalou, era na lako voli me vaka na mataboko, nira sega ni kunea na sala mera vakabulai kina. Ia o ira na lotu Vakarisito dina, era na vakasaqarai Jiova vagumatua tiko ga, era na vunitaki ena siga ni cudru ni Kalou. Me kena ikuri, era rekitaka e levu na veivakalougatataki ena gauna mada ga oqo. E soli tale ga vei ira na itavi dokai mera vosataka na “vosa savasava” ni iVolatabu. (Sefanaia 3:9) E kaya o koya e vunau: “Na noda vosataka na vosa savasava e sega ni okati wale ga ena noda vakabauta na ka dina kei na noda vakavulici ira na tani, ia na noda itovo tale ga e dodonu me salavata kei na lawa ni Kalou kei na nona ivakavuvuli.”

Era waraka ena nanamaki na tiko ena soqo na drama, “iVakaraitaki Meda Qaqarauni Kina.” Na drama oqo e vakaraitaka na vuna era mate koso kina ena iyalayala ni Vanua Yalataki e vica vata na udolu na Isireli, baleta nira guilecavi Jiova ra qai temaki mai vei ira na yalewa ni vanua tani ena veidauci kei na sokalou lasu. E dua vei iratou na tagane kilai​—o Jamini​—e tuburi koya na veilecayaki ena nodra veitemaki na yalewa ni Moapi kei na nona lomani Jiova. E votu tale ga na ulubale lasuwale kei na vakasama veirawai tawavakalou i Simiri, vaka kina na vakabauta kei na yalo ni veiqaravi e tu vei Finiase. E vakamacalataki kina vakavinaka na vakarerevaki ni noda lai veimaliwai kei ira era sega ni lomani Jiova.

Na drama e tekivutaki vinaka sara ga kina na ivunau e tarava, “Kakua ni Rogoca Wale Ga.” Ni dikevi na 1 Korinica 10:​1-​10 e vakaraitaka ni dau vakatovolea o Jiova noda talairawarawa me vakadeitaka kina se ganiti keda meda vakaivotavota se sega ena vuravura vou. Ena gauna mada ga oqo, nida volekata yani na ituvaki vou, e so sa lai vakaruguta nodra isausau vakayalo na gagadre vakayago. Era vakayaloqaqataki kece na tiko ena soqo mera kua ni vakawaletaka na galala mera ‘curu ena ivakavakacegu i Jiova.’​—Iperiu 4:1.

E ulutaga ni vunau soqovi levu, “Na Vuna Meda Vakananuma Kina na Cakacaka Veivakurabuitaki ni Kalou.” Na “cakacaka veivakurabuitaki” i Jiova e vakatakila nona vuku kei na nona lewa na veika bula kece era tu yavokiti keda. (Jope 37:14) E vica ga na taro vakavure vakasama mai vei Jiova e talavo me vakadrukai Jope ena kaukaua nei koya na Dauveibuli levu. Ena cakava tale ga o Jiova ena gauna sa tu oqo e liu na “cakacaka veivakurabuitaki” ena vukudra nona dauveiqaravi yalodina. E tinia o koya e vunau: “E vuqa tu na vuna vivinaka meda kauaitaka kina na cakacaka veivakurabuitaki i Jiova​—na veika e cakava ena gauna sa oti, na veika e cakava ena nona bulibuli wavokiti keda tiko nikua, kei na veika e yalataka me na cakava ena dua na gauna wale ga oqo.”

Ni vakamacalataki oti vakalekaleka na lesoni e vulici ena macawa oya ena Vale ni Vakatawa, sa rogoci sara na iotioti ni vunau e kena ulutaga, “Vakamareqeta na Nomu sa Muria Tiko na Vosa ni Kalou.” Na vunau veiuqeti oqo e vakabibitaki kina ni dua na ka dokai meda muria na vosa ni Kalou. (Jemesa 1:​22) E tataunaki tale vei ira na vakarorogo ni itavi dokai ni kena muri na vosa ni Kalou e duatani duadua, na balavu ga ni noda muria tiko, na levu tale ga ni noda vakamareqeta. Era vakayaloqaqataki kece na vakarorogo tiko mera vakananuma na veitikina yaga ni soqo ni tikina oqo kevaka era gadreva mera muria na vosa ni Kalou ena kena levu duadua era rawata. Oya ga na sala e rawa nida marau dina kina.

[Kato/​iYaloyalo ena tabana e 25]

E Rawa Mo iTokani ni Kalou!

Ena yakavi ni Vakaraubuka e soli kina na brochure vou, E Rawa Mo iTokani ni Kalou! E gadrevi vakalevu ena veiyasa i vuravura na idusidusi ena vakarawarawataka na vulici ni iVolatabu, o koya gona, ena veivuke sara kina na brochure oqo. Ena ka ni veivakalougatataki levu vei ira era sega ni vuli vinaka se o ira na sega ni kila vinaka sara na wilivola.

[Kato/​iYaloyalo ena tabana e 26]

Parofisai i Aisea​—Vakararamataka na Kawatamata

Era marau na tiko ena soqo mera taura na imatai ni itabataba ni Parofisai i Aisea​—Vakararamataka na Kawatamata. E rua na itabataba ni ivola oqo. E vakabibitaki kina na yaga ni parofisai i Aisea nikua.