Kato ni Taro
◼ Ena vukei vakacava e dua sa mate tu vakayalo ena dua na gauna balavu me rawa ni dautukutuku tale?
E ka marautaki me mai qaravi Jiova tale mai vu ni lomana e dua a mate tu vakayalo. (Luke 15:4-6) Kena irairai, ni a sega tu ni dau vuli vakataki koya, lai soqoni, se cakacaka vakavunau baleta na veitusaqati se na veika dredre e dau sotava. Na cava e rawa ni vukei kina me toso tale vakayalo?
O keda kece meda vakaliuliu ni vakaraitaka vua na noda loloma dina vakarisito. Mera yavala totolo na qase mera vakasamataka se veivukei vakayalo cava ena ganiti koya. (Jeme. 5:14, 15) Ke a malumalumu ga vakalekaleka, ena rairai gadrevi ga me vukei koya e dua na dautukutuku matua me tekivu rawa tale kina ena cakacaka vakavunau. Ia ke sega sara tu ga ni veimaliwai kei na ivavakoso ena dua na gauna balavu, ena vinakati vua e levu na veivukei. Me vaqaqacotaki na nona vakabauta kei na nona taleitaka na ka dina, ena rairai gadrevi me vulica tale na iVolatabu ni taurivaki e dua na ivola ena yaga me vakayagataki. Ke na vinakati me vakayacori oqo, e rawa ni tuvanaka na ivakatawa ni cakacaka me vakavulici koya e dua na dautukutuku matua. (Iper. 5:12-14; raica na Kato ni Taro ni Noda Cakacaka Vakaitalatala ni Matanitu, Noveba 1998.) Ke o kila tiko e dua e gadreva na veivukei oqo, tukuna vua na ivakatawa ni cakacaka ena nomu ivavakoso.
Ni bera ni o sureta e dua a mate tu vakayalo ena dua na gauna balavu me tekivu lako tale ena cakacaka vakaitalatala, ena vinaka me rau raici koya rawa mada e rua na qase me laurai kina se sa ganiti koya tiko ga me dua na dautukutuku ni Matanitu ni Kalou. Ena via tautauvata kei na ituvatuva e dau vakayacori nira vinakata na ka vou mera dautukutuku ni itukutuku vinaka. (Raica na Watchtower, 15 Noveba, 1988, taqana 17.) Me taleitaka dina mai vu ni lomana o koya a mate tu vakayalo me vunautaka na itukutuku vinaka. Ena gadrevi tale ga vua me tadolova na ivakatagedegede e tiko ena ivola na Cokonaki taqana 98-9, qai wasoma nona tiko ena soqoni.
Ni tiko na nona ituvatuva vinaka vakayalo ena vukei koya vakalevu me rawa ni qaqaco nona vakabauta qai taqomaka tiko ga na nodrau veiwekani voleka kei Jiova me rawa ni lako tiko ga ena sala e basika ina bula tawamudu. (Maciu 7:14; Iper. 10:23-25) Na nona “gumatua vakalevu sara” kei na nona bucina tale na itovo vakarisito ena taqomaki koya me kua tale vakadua ni yaco me tisaipeli lotu Vakarisito e “tawa vua [se, “mate vakayalo,” NW].”—2 Pita 1:5-8.