Kua ni Guilecavi Ira na Mate Tu Vakayalo

1. Na cava meda vukei ira kina na mate tu vakayalo?

¹ O bau kila e dua e mate tu vakayalo? Rairai e sa sega ni dau lako mai ena soqoni, e sa lako sese. De dua drau sota kei na dua e mate tu vakayalo ni o cakacaka vakavunau. E bibi meda nanuma tiko ni o ira oqo era se tacida vakayalo tiko ga. E dodonu meda lomani ira da qai vukei mera lesu mai ina isoqosoqo i Jiova, vei koya tale ga na ‘ivakatawa ni yaloda.’​​—⁠1 Pita 2:​25.

2. Na cava eda rawa ni cakava meda uqeti ira kina na mate tu vakayalo?

² Vakaraitaka ni O Kauai: Era na rawa ni vakila na mate tu vakayalo nida se nanumi ira tiko ke da qiriti ira se sikovi ira. Na cava beka meda kaya? Rawa nida uqeti ira ena noda tukuna nida dau nanumi ira. Me veivakauqeti na noda veivosaki. (Fpai. 4:⁠8) Vakacava meda tukuna e dua na tikina eda vulica mai ena soqoni! Rawa tale ga nida sureti ira ena soqoni se soqo vakatabacakacaka, da qai tukuna vei ira nida na maroroya nodra idabedabe, se da kauti ira sara ga ina soqoni.

3. A vakabulabulataki vakacava e dua na tacida yalewa?

³ Dua na tacida a sotava ena yalava e dua na tacida yalewa e sa mate tu vakayalo ena 20 vakacaca na yabaki. Dina ga ni sega ni via vulica na iVolatabu, a sikovi koya tiko ga na tacida oqori, dau solia tale ga nona ilavelave vovou ni ivoladraudrau. Ni oti e dua na soqo ni tikina, a gole na tacida oqo me lai vakamacalataka vua na tikina bibi e cauraki mai ena soqo, ni toso na gauna sa bulabula tale vakayalo na tacida yalewa oya.

4. Meda raici ira vakacava na tacida era sa mai tomani keda tale ena soqoni?

⁴ Ke sa Lesu Mai: Meda raici ira vakacava na tacida vakayalo era mate tu vakayalo ia era sa tekivu tiko tale ena soqoni? Vakacava o Jisu, a raici ira vakacava nona tisaipeli era a vakanadakui koya vakalekaleka? E kaya nira ‘wekana,’ qai nuitaki ira. Bau solia mada ga vei ira e dua na itavi bibi. (Maciu 28:​10, 18, 19, VV) Oti ga vakalailai oya, sa ‘sega ni mudu nodra kacivaka tiko na itukutuku vinaka’ na nona tisaipeli.​​—⁠Caka. 5:​42.

5. Gauna cava meda raici ira kina na qase me baleti ira na mate tu vakayalo?

⁵  Ni bera nida vuli iVolatabu tale kei ira era sa mate tu vakayalo, se sureti ira meda veitomani ena cakacaka vakavunau, e vinaka meda raici ira rawa na qase. Kevaka eda sotava e dua e mate vakayalo ena yalava, meda tukuna vei ira na qase me rawa nira tuvanaka na sala mera vukei kina.

6. Kevaka eda vukei ira na mate tu vakayalo, na cava e rawa ni kena itinitini?

⁶ E tukuni tu vakamatata ena iVolatabu nira na vakabulai ga o ira na yalodina tiko. (Maciu 24:13) Me yadra tiko gona na matada, me rawa nida vukei ira na tarabe kei ira na sa malumu yani. Kevaka eda lomani ira na mate tu vakayalo me vakataki Jiova ga, o cei e kila, de dua na siga era na mai tomani keda tale ena sokalou dina.​​—⁠Luke 15:​4-​10.