Veivakaukauataki o Jiova

¹ Na cava mada o nanuma me baleti Paula na yapositolo? Nida wilika na ivola na Cakacaka, eda kila kina na nona gumatua ena cakacaka i Jiova. E rawata vinaka vakacava o Paula na ka kece a cakava? E kaya: “Au sa rawata na ka kecega e na vuku i Karisito o koya sa vakaukauwataki au.” (Fpai. 4:13) E yaga tale ga vei keda na veivakaukauataki i Jiova. Ena sala cava? Ena noda vakayagataka vinaka e ono na isolisoli e vakarautaka vei keda me vakavinakataka qai vakaukauataki keda vakayalo.

² Vosa ni Kalou: Eda kana meda kaukaua kina vakayago, meda vakani keda tale ga ena Vosa ni Kalou meda bulabula tiko kina vakayalo. (Maciu 4:4) E tu gona ena iVolatabu na vosa me vakataudeitaki keda. Me rawa nida yalogu tiko ga da qai gumatua ena ka dina, e gadrevi meda vakaogai keda ena vuli vakataki keda, da qai vakananuma na ka eda vulica e veisiga.​—Same 1:2, 3.

³ Na Masu: E bibi meda volekati Jiova, vakauasivi ena gauna e gadrevi sara ga kina na nona veivuke. E vakaukauataki keda ena yalona nida kerea vua ena masu. (Luke 11:13; Efeso 3:16) E uqeti keda na iVolatabu meda “ia tikoga na masu.” (Roma 12:12) O dau masu?

⁴ Na iVavakoso: Eda vakaukauataki da qai vakayaloqaqataki tale ga ena soqoni vakaivavakoso kei na noda veimaliwai kei ira na mataveitacini. (Iper. 10:24, 25) Nida sotava na leqa, era vukei keda ena nodra vakayaloqaqataki keda, ra vukei keda tale ga vakayalololoma.​—Vkai. 17:17; Dauv. 4:10.

⁵ Na Cakacaka Vakavunau: Na wasoma ni noda cakacaka vakaitalatala ena vukei keda meda raica dei na Matanitu ni Kalou kei na veivakalougatataki ena kauta mai. Eda marau nida vukei ira na tani mera vulici Jiova. (Caka. 20:35) Eda sega ni rawa ni lai veivuke kece ena vanua e vinakati vakalevu kina na veivuke, se meda cakacaka kece vakatabakidua, ia eda rawa ni vakarabailevutaka ga na noda cakacaka vakaitalatala ena so tale na sala.​—Iper. 6:10-​12.

⁶ O Ira na Qase Vakarisito: E yaga dina vei keda na nodra dau veivakayaloqaqataki kei na nodra dau veivukei na qase. E lesi ira o Jiova mera karoni ira na qelenisipi ni Kalou. (1 Pita 5:2) O ira na ivakatawa dauveilakoyaki era dau vakayaloqaqataki ira na ivavakoso era veisiko kina, me vaka ga a cakava o Paula ena nona gauna.​—Roma 1:11, 12.

⁷ Nodra iVakaraitaki na Yalodina: E veivakauqeti nida wilika na italanoa ni nodra ivakaraitaki vinaka na noda itokani vakabauta ena gauna makawa, vaka kina ena gauna oqo. (Iper. 12:1) Ni o yalolailai, vakacava mo wilika e dua vei ira na italanoa ni bula veivakauqeti ena noda ivoladraudrau, dua na vakasavuirogorogo veiuqeti ena Yearbook, se so na itukutuku marautaki me baleti ira na iVakadinadina i Jiova ena gauna oqo ena ivola na Proclaimers?

⁸ E dua na tacida tagane, sa yabaki 90 vakacaca ena gauna oqo, a ciqoma na ka dina ni se cauravou gone. A vakatovolei nona vakabauta ni se itabagone. Taumada, era biuta na isoqosoqo i Jiova e so era a dau ogaoga tu ena ivavakoso. E raica tale ga ni dredre na nona lai vunau e veivale. Ia, e vakararavi tiko ga vei Jiova. Totolo sara nona sa taleitaka mai na cakacaka vakaitalatala. Vakacava nikua? E dina ni sa tautauvimate, e se lewe tiko ga ni vuvale e Peceli mai Brooklyn, qai lewe tale ga ni iLawalawa Dauvakatulewa. E sega vakadua ni veivutunitaka na nona kabita tiko ga na isoqosoqo i Jiova.

⁹ E dua na tacida yalewa e lewenivuvale e Peceli mai Peritania a papitaiso ni se qai yabaki 13. Erau tekivu painia vakaveiganeni ena yabaki e tarava, ia ni oti tale e dua na yabaki, a vesu o tamana ena vuku ni nona tawaveitovaki ena iKarua ni iValu Levu. E vakararavi tiko ga vei Jiova me vakaukauataki koya, qai qarava tiko ga na Kalou dina. Yaco na gauna me rau vakamau kei na dua na tacida tagane yalodina, rau qai cakava vata tiko na loma i Jiova. Ni oti e 35 na yabaki ni nodrau vakawati, a mate vakasauri o watina. Se baci vakaukauataki koya tale o Jiova, se qaravi Jiova tiko ga me yacova mai nikua, qai rai vakanamata tu me na veiqaravi tawamudu ena vuvale i Jiova e vuravura.

¹⁰ E dauveivuke qai vakaukauataki ira nona tamata yalodina o Jiova. “Sa dausolia na kaukauwa vei ira era sa malumalumu: ia ena vakalevutaka na kaukauwa vei ira era sa sega ni gumatua rawa.” Eda na rawata na ivurevure ni kaukaua tawavakaiyalayala oqo ena noda vakayagataka vinaka na ono na isolisoli sa tukuni oti. Nanuma: “Ko ira era sa waraki Jiova era na vakaukauwataki tale; . . . era na cici, ka sega ni oca, era na lako tu, ka sega ni malumalumu.” (Aisea 40:29-​31) E vakararavi vakatabakidua o Paula vei Jiova me vakaukauataki koya, me vaka tale ga kina o keda.