E Vakaukauataki Koya sa Oca O Jiova

“Sa dausolia na kaukauwa [o Jiova] vei ira era sa malumalumu [se, “oca,” NW]: ia ena vakalevutaka na kaukauwa vei ira era sa sega ni gumatua rawa.”​—AISEA 40:29.

1. Vakamacalataka mada na kaukaua e tiko ena veika e bulia na Kalou.

E TAWAVAKAIYALAYALA na kaukaua i Jiova. E tu ena veika e bulia na kaukaua vakaiyanaqa! Na atomi lailai​—e uto ni ka kece ga e buli​—e ka somidi sara, ni tiko ena dua na itiri wai e duanadrau na bilioni na bilioni na atomi.a Na ka kece e bula e vakatau na nodra bula ena igu e vakavurea na kacakacabote ni atomi ena matanisiga. Ia e vakacava sara mada na levu ni igu me solia mai na matanisiga mera bula rawa kina na veika e vuravura? E yacovi vuravura mai e dua na tiki lailai wale sara ni kaukaua levu ni matanisiga. Ia e sega ga ni yacova na kaukaua lailai wale oqori ni matanisiga e tarai vuravura na isoqoni ni kaukaua kece era vakayagataka na valenibuliyaya kei vuravura.

2. Na cava sara mada e kaya na Aisea 40:26 me baleta na kaukaua i Jiova?

² Nida raica na atomi somidi se na lomalagi vakaitamera, eda na tini qoroya ga na kaukaua vakatubuqoroqoro i Jiova. Sa rauta ni rawa vua me tukuna: “Dou ta cake, ka rai yani; ko cei ka bulia na ka oqori? ka sa kauta vakamataivalu mai na kedrai vavakoso? sa kacivi ira kecega e na yacadra, ka ni sa levu na nona kaukauwa, ka sa daugumatua sara; sa sega e dua sa yali”! (Aisea 40:26) Io, “sa levu na nona kaukauwa” o Jiova qai “daugumatua sara,” ni a vakavuna mada ga me buli o lomalagi kei vuravura.

Vinakati na Kaukaua e Levu Cake

3, 4. (a) Na cava e so na ka e rawa ni vakaocai keda? (b) Na taro cava e bibi me vakasamataki?

³ Na Kalou e tawavakaiyalayala na nona kaukaua, ia na tamata e dau oca rawarawa. Se i vei ga eda gole kina, eda na raica na oca ni tamata. Era oca nira yadra mai, era oca nira lako i cakacaka se lai vuli, ra lesu oca i vale, ra qai davo sobu mera moce ena levu ni wawale. E so era diva mera gole ina dua na vanua mera lai vakacegu kina vakavinaka. Nida tamata i Jiova, eda dau oca tale ga, baleta ena noda sokalou e dau vinakati kina na sasaga vagumatua. (Marika 6:​30, 31; Luke 13:24; 1 Timoci 4:8) Qai tiko e levu tale na ka e dau veivakaocai.

⁴ E dina nida lotu Vakarisito, e tarai keda tale ga na leqa e bikai ira tu na wekada ena veivanua. (Jope 14:1) De na vakavuna na yalolailai kei na yalodatuvu na bula tautauvimate, na tadre ni bula vakailavo se so tale na ka dredre e sotavi ena noda bula ni veisiga. Sa qai ikuri tu ni veika dredre oqori e so na ka e dau bikai ira ga na tamata era vakacacani ena vuku ni ivalavala dodonu. (2 Timoci 3:​12; 1 Pita 3:​14) Ni sega ni cegu na nona bololaki keda tiko o vuravura, qai saqati tale ga na noda cakacaka ni vunautaka na itukutuku vinaka ni Matanitu ni Kalou, e vaka mera lai wawale kina vakalevu e so, era nanuma ni vinaka beka mera se tei vakamalua mada ena nodra qaravi Jiova. Kena ikuri, e vakayagataka o Setani na Tevoro na iwalewale kece ga e rawata ena nona via vecei keda meda tawayalodina vua na Kalou. Meda na rawata gona mai vei na kaukaua vakayalo meda na kua kina ni malumu da qai soro sara?

5. Na cava e vinakati kina na kaukaua e levu cake mai na kaukaua vakatamata, me vakayacori rawa kina na cakacaka vakaitalatala vakarisito?

⁵ Ke da vinakata meda vakaukauataki vakayalo, meda nuitaki Jiova ga, na Dauveibuli kaukaua. A kaya na yapositolo o Paula ni na sega ni rawati na cakacaka vakaitalatala vakarisito ena kaukaua ga ni tamata ivalavala ca. E vola: “Sa waqa qele sa tu kina vei keitou nai yau oqo, me sa taka mai vua na Kalou na kaukauwa mana levu, ka me segai maivei keitou.” (2 Korinica 4:7) O ira na lotu Vakarisito lumuti era ‘vunautaka tiko na veivinakati’ ra qai tokoni ira kina na nodra itokani era nuitaka na bula e vuravura. (2 Korinica 5:​18; Joni 10:16; Vakatakila 7:9) Nida tamata ivalavala ca da qai tusaqati nida vakayacora tiko na cakacaka ni Kalou, meda kua ni nuitaka ga na noda kaukaua. Ena vukei keda o Jiova ni vakayagataka na yalona tabu. Na noda malumalumu ena vakavotuya na kaukaua e tu vua. Qai veivakacegui dina na ivakadei ni o “Jiova sa totaka na tamata dodonu”!​—Same 37:17.

‘O Jiova na Vu ni Noda Gugumatua’

6. Eda kila vakacava mai na iVolatabu ni o Jiova na Vu ni noda gugumatua?

⁶ Ni sa “daugumatua sara” na Tamada vakalomalagi, e rawarawa vua me vakabulabulataki keda tale. E tukuni vei keda oqo: “Sa dausolia na kaukauwa [o Jiova] vei ira era sa malumalumu: ia ena vakalevutaka na kaukauwa vei ira era sa sega ni gumatua rawa. Io era na malumalumu ka oca ga na cauravou, a ra na bale sara na tamata bula: ia ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici, ka sega ni oca, era na lako tu, ka sega ni malumalumu.” (Aisea 40:​29-​31) Ni sa qai levu ga na leqa, so na gauna eda vakataki koya kina na daucici sa oca vakalevu, e cavucavudredre dina na yavana. Ia na itinitini ni cici ena veitaucici ni bula sa tu ga oqo e matada, meda kua sara ni soro. (2 Veigauna 29:11) Na keda Meca, na Tevoro, e veilakoyaki voli “me vaka na laioni sa tagi,” e lomana me tarovi keda. (1 Pita 5:8) Meda nanuma tiko ni o ‘Jiova e noda kaukaua kei na noda isasabai,’ qai levu sara na ka e vakarautaka me ‘vakaukauataki koya sa oca.’​—Same 28:7.

7, 8. Eda kila vakacava ni o Jiova e vakaukauataki Tevita, Apakuki, kei Paula?

⁷ Ena veika dredre e sotava o Tevita, e vakaukauataki koya o Jiova me tudei tiko ga. Ena vakabauta levu kei na nuidei, e vola kina o Tevita oqo: “E na vuku ni Kalou eda na gugumatua; ni sai koya ga ena buturaka sobu na noda meca.” (Same 60:12) E vakaukauataki Apakuki tale ga o Jiova me rawa ni vakaotia na nona ilesilesi vakaparofita. E tukuni ena Apakuki 3:​19: “Sa vu ni noqu kaukauwa ko Jiova na Turaga, ena cakava na yavaqu me vaka na nodra na me kila, ia ena kauti au tale ko koya me’u lako voli e na noqu veitikina cecere.” E vakasakiti tale ga na ivakaraitaki i Paula, e vola: “Au sa rawata na kaukaua ena ka kece ga ena vuku i koya [na Kalou] sa vakaukauataki au.”​—Filipai 4:​13, NW.

⁸ Me vakataki Tevita, Apakuki, kei Paula, o keda tale ga meda vakabauta ni tu vua na Kalou na igu kei na kaukaua me vakabulai keda. Eda sa kila oqo ni o koya na Turaga Sau o Jiova e Vu ni noda “kaukauwa,” ia meda raica mada e so na sala eda rawa ni vakayagataka kina na veika e vakarautaka tu vakayauyau na Kalou meda vakaukauataki kina vakayalo.

iSolisoli Vakayalo me Vakabulabulataki Keda

9. E yaga vakacava na ivolatabaki vakarisito meda vakabulabulataki kina?

⁹ E rawa ni vakabulabulataki keda qai tauri keda dei na noda dau vulica vagumatua na iVolatabu salavata na ivolatabaki vakarisito. A lagata na daunisame: “Sa kalougata na tamata . . . sa marau tiko e na vunau i Jiova; a sa vakananuma tiko na nona vunau e na siga kei na bogi. Ena tautauvata kei na kau sa tei e na bati ni uciwai, sa vuataka na vuana e na kena gauna, a drauna talega ena sega ni malai; ia na ka kecega sa cakava ko koya ena yaco.” (Same 1:​1-3) Eda kana meda kaukaua kina vakayago, ia ena yasana adua, e bibi tale ga meda kania na kakana vakayalo e vakarautaka na Kalou ena nona Vosa kei na ivolatabaki vakarisito ke da via kaukaua tiko ga vakayalo. E yaga kina e ke na vuli vagumatua kei na vakananumi vakatitobu ni ka e vulici.

10. Ena gauna cava e rawa nida vuli da qai dau vakanananu kina?

¹⁰ Kevaka eda dau vakananuma na “veika titobu ni Kalou,” eda na vakila na kena yaga. (1 Korinica 2:​10) Ia me kau mai vei na gauna meda dau vakanananu kina? O Aisake na luve i Eparama a “lako yani . . . ki na veiwere e na yakavi me vakanananu.” (Vakatekivu 24:​63-​67) O Tevita na daunisame e ‘vakanananu vua na Kalou ena veitikinibogi.’ (Same 63:6) O keda e rawa nida vulica na Vosa ni Kalou da qai vakananuma ena mataka, ena yakavi, ena bogi​—io, ena dua ga na gauna. Na vuli kei na vakanananu vaka oya e lai votu mai kina e dua tale na isolisoli i Jiova e dau veivakaukauataki vakayalo​—na masu.

11. Na cava meda raica kina vakabibi na yaga ni masu wasoma?

¹¹ E dau veivakabulabulataki na masu wasoma vua na Kalou. O koya gona, meda “ia tikoga na masu.” (Roma 12:12) So na gauna, eda na kerea sara ga vakadodonu na vuku kei na kaukaua meda dei tiko ga kina ke da sotava e dua na ituvaki dredre. (Jemesa 1:​5-8) Meda vakavinavinaka da vakacaucautaka tale ga na Kalou nida raica ni sa vakayacori tiko na nona inaki se da vakila ni vakaukauataki keda meda kua ni tiva mai na noda veiqaravi vua. (Filipai 4:​6, 7) Ke da vakavolekati keda vua na Kalou ena noda dau masu vua, ena sega vakadua ni biuti keda o koya. “Raica,” e seretaka o Tevita, “sa noqui vukevuke na Kalou.”​—Same 54:4.

12. Na cava meda masuta kina na Kalou me solia vei keda na yalona tabu?

¹² E dau vakayagataka na yalona tabu, se igu dau yavala na Tamada vakalomalagi me vakabulabulataki keda qai vakaukauataki keda. E vola o Paula: “Ka’u sa tekiduru kina vei koya na Tamada . . . me solia vei kemudou ko koya, me vaka na kena levu ni nona vinaka, me vakaukauwataki kemudou e na Yalona mo dou kaukauwa eloma.” (Efeso 3:​14-​16) E dodonu meda masu me soli vei keda na yalo tabu, da qai nuitaki Jiova ni na rogoca na noda masu. Na vakasama i Jisu e vaka oqo: Kevaka e kere ika na gone vua na tamana dau loloma, ena soli beka vua na gata? Sega sara. Sa qai tinia: “Ia kevaka dou kila, koi kemudou sa tamata ca, mo dou solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua.” (Luke 11:​11-​13) Meda masu gona ena nuidei da qai nanuma ni o ira na tamata yalodina ni Kalou e rawa nira ‘vakaukauataki’ ena yalona tabu.

Vu ni Veivakaukauataki na iVavakoso

13. Meda raica vakacava na sosoqoni vakarisito?

¹³ E vakabulabulataki keda o Jiova ena vuku ni soqoni e dau vakayacori ena ivavakoso vakarisito. A kaya o Jisu: “E na tikina sa soqoni vata kina e lewe rua, se lewe tolu, e na yacaqu, au sa tiko kina e na kedratou maliwa.” (Maciu 18:20) Ena gauna e cavuta kina o Jisu na yalayala oya, a veivosakitaka tiko na veika e dodonu mera dikeva o ira na vakacolati ena cicivaki ni ivavakoso. (Maciu 18:​15-​19) Ia e rawa ni vakaibalebaletaki tale ga na nona vosa ina noda soqoni, soqo ni tabacakacaka, kei na soqo ni tikina, era dau dola ra qai sogo ena masu e cavuti ena vuku ni yaca i Jisu. (Joni 14:14) O koya gona, e ka dokai meda dau tiko ena sosoqoni vakarisito, se da le lalai na tiko kina, se da le vica vata na udolu. Meda dau vakavinavinakataka mada ga na veigauna vaka oqo era vakarautaki meda vakaukauataki kina vakayalo, meda uqeti tale ga kina meda dau loloma da qai gumatuataka na cakacaka vinaka.​—Iperiu 10:​24, 25, VV.

14. E yaga vakacava vei keda na nodra veiqaravi na ivakatawa vakarisito?

¹⁴ O ira na qase ni ivavakoso era dau veivuke ra qai dau veivakayaloqaqataki vakayalo. (1 Pita 5:​2, 3) O Paula e vukea qai vakayaloqaqataka na ivavakoso e qarava, me vaka ga era vakayacora na ivakatawa dauveilakoyaki nikua. A gu sara ga na yalona me veimaliwai kei ira na tacina vakayalo me rawa kina nira veivakayaloqaqataki. (Cakacaka 14:​19-​22; Roma 1:​11, 12) Meda vakaraitaka mada ga nida marautaki ira na qase ni noda ivavakoso kei ira na ivakatawa lotu Vakarisito tale e so era vakaitavi vakalevu ena noda vakaukauataki vakayalo.

15. Era dau vu ni “veivakacegui” vakacava o ira na tacida vakayalo ena noda ivavakoso?

¹⁵ O ira na tacida vakayalo ena ivavakoso e rawa tale ga nira vu ni “veivakacegui” vei keda. (Kolosa 4:​10, 11, VV) E rawa nira vukei keda ena gauna dredre nira noda ‘itokani dina.’ (Vosa Vakaibalebale 17:17) Me kena ivakaraitaki, ena 1945, nira sa sereki na le 220 na tamata ni Kalou mai na keba ni veivakararawataki na Sachsenhausen, sa qai vakaroti mera taubaletaka e 200 na kilomita. Era kumuni vata e le vica mera taubale vata, o ira na kaukaua toka era dreti ira na malumalumu sara ena vica na kareti lalai. Na cava sa qai yaco? Ena tayabe balavu oya, era mate kina e sivia na 10,000 na lewe ni keba, ia e sega ni mate e dua na iVakadinadina i Jiova. Na itukutuku vaka oya era tabaki ena ivola ni Watch Tower, wili kina na Yearbook of Jehovah’s Witnesses kei na ivola na Jehovah’s Witnesses​—Proclaimers of God’s Kingdom. Era vakavotuya ni dau vakaukauataki ira na nona tamata na Kalou mera kua ni soro.​—Kalatia 6:9.b

Vakaukauataki Keda na Cakacaka Vakaitalatala

16. E veivakaukauataki vakayalo vakacava na noda dau vakaitavi wasoma ena cakacaka vakaitalatala?

¹⁶ Eda na vakaukauataki vakayalo mai na noda vakaitavi wasoma ena vunautaki ni Matanitu ni Kalou. Mai na noda cakava na cakacaka oqo, ena bibi tiko ga kina vei keda na Matanitu ni Kalou, ena sega tale ga ni yali mai matada na inuinui ni bula tawavakaiyalayala kei na veivakalougatataki totoka ena lako kaya mai. (Juta 20, 21) Na veika e yalataki ena iVolatabu eda lai kacivaka ena noda cakacaka vakaitalatala, e vakavuna me dei ga kina na noda vakanuinui, e vakataudeitaka tale ga na yaloda me vakataki koya ga na parofita o Maika, ni a kaya: “Eda na muria ga na yaca i Jiova na noda Kalou ka sega ni mudu ka sega ni mudu.”​—Maika 4:5.

17. Na cava e so na ka e vakaturi me baleta na noda veivakavulici ena iVolatabu?

¹⁷ E dei cake tale ga na noda veiwekani kei Jiova ena levu ga ni noda vakayagataka na iVolatabu meda veivakavulici kina. Me kena ivakaraitaki, nida veivakavulici tiko ena ivola Na Ka Mo Kila Mo Bula Tawamudu Kina, e ka vakayalomatua meda wilika da qai veivosakitaka e vica na tikinivolatabu era sega ni lavetaki. Ena yaga oqori vua e vuli tiko, ena vaqaqacotaka tale ga na noda rai vakayalo. Kevaka e dredre ni taura rawa o gonevuli e dua na vakasama vakaivolatabu se dua na ivakatautauvata, de vinaka me wasei vakarua se vakatolu na vulici ni dua na wase ni Kila. E ka ni marau vei keda meda vakavakarau vakavinaka, meda soli keda vakalevu ena nodra vukei e so tale mera veivolekati kei na Kalou!

18. Vakamacalataka se sa yaga tiko vakacava na ivola na Kila.

¹⁸ Ena veiyabaki, e yaga sara tiko vakalevu na ivola na Kila mera vakavulici kina e vica vata na udolu mera mai yalataki ira vei Jiova mera nona tamata, wili kina o ira mai na veilotu e so e duatani na nodra iVolatabu. Me kena ivakaraitaki, ni a se gonelailai e dua na lotu Idu mai Sri Lanka, a rogoca e dua na iVakadinadina yalewa ni vakamacalataka na Parataisi. Vica tale na yabaki e muri, sa qai lakovi koya na marama oya na cauravou ni Sri Lanka oqo, mani tekivu vuli iVolatabu sara kei na wati koya na ganeda. E veisiga ga e gole yani na cauravou me lai vuli, sega ni dede sa vulici oti na Kila. Tekivu lakova na soqoni kece, vakasuka mai na nona lotu makawa, lai dua sara na dautukutuku ni Matanitu ni Kalou. Ni qai papitaiso sa dua oti tu na nona vuli iVolatabu, e dua ga erau veikilai.

19. Nida vakasaqara taumada na Matanitu ni Kalou, na cava eda nuideitaka?

¹⁹ E vakavureki dina qai veivakaukauataki kevaka eda dau vakasaqara taumada na Matanitu ni Kalou. (Maciu 6:​33) Eda na sotava beka e levu na ka dredre, ia eda na kacivaka tiko ga ena yalomarau kei na gugumatua na itukutuku vinaka. (Taito 2:​14) Levu vei keda eda vakaitavi tiko ena cakacaka vakapainia vakatabakidua, e so tale era veiqaravi ena vanua e vinakati kina mera le levu na kaulotu. Se sala oqori se so tale na sala eda marautaka tiko na vakatetea kina na itukutuku ni Matanitu ni Kalou, eda nuidei ga ni o Jiova ena sega ni guilecava na noda cakacaka kei na loloma eda vakaraitaka ena vuku ni yacana.​—Iperiu 6:​10-​12.

Toso Tiko ga Ena Kaukaua i Jiova

20. Eda na vakaraitaka vakacava nida nuitaki Jiova me vakaukauataki keda?

²⁰ Meda vakaraitaka mada ga mai vu ni lomada nida nuitaki Jiova kei na nona kaukaua. Eda vakayacora oqo ena noda vakayagataka sara vakavinaka na veika e vakarautaka mai na “dauveiqaravi yalo dina.” (Maciu 24:​45, VV) E so vei ira na isolisoli e vaqaqacotaka na noda veiwekani kei Jiova qai vakaukauataki keda meda toso tiko ga ena noda veiqaravi tabu vua na noda vulica mai vale vaka kina ena ivavakoso na Vosa ni Kalou eda vakayagataka kina na ivolatabaki vakarisito, na noda dau masu mai vu ni lomada, na nodra veivuke vakayalo na qase ni ivavakoso, na nodra ivakaraitaki vinaka na tacida vakayalo era yalodina, kei na noda vakaitavi vakawasoma ena cakacaka vakaitalatala.

21. Erau vakaraitaka vakacava na yapositolo o Pita kei Paula ni rau gadreva na veivakaukauataki ni Kalou?

²¹ Dina nida tamata malumalumu, ia kevaka eda nuitaki Jiova me vukei keda, ena vakaukauataki keda o koya. Ni kila vinaka tu na yapositolo o Pita ni ganiti keda meda vukei, e vola kina: “Kevaka e dua e veiqaravi, me veiqaravi e na kaukauwa sa solia vua na Kalou.” (1 Pita 4:​11, VV) E vakaraitaka tale ga o Paula ni dau nuitaka na kaukaua e solia na Kalou ni a kaya: “Ka’u sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, e na vuku i Karisito: ia ni’u sa malumalumu, au sa qai kaukauwa.” (2 Korinica 12:10) Meda vakaraitaka ni vaka tale ga oya na dei ni noda vakanuinui, me vakarokorokotaki kina na Turaga Sau o Jiova, o koya e dau vakaukauataki ira era sa oca.​—Aisea 12:2.

[iVakamacala e ra]

O na Sauma Vakacava?

• Na cava e vinakati kina na kaukaua e levu cake mai na kaukaua vakatamata vei ira na tamata i Jiova?

• Na ivakadinadina cava vakaivolatabu e dusia ni dau vakaukauataki ira na nona tamata na Kalou?

• Na cava e so na isolisoli vakayalo e vakarautaka o Jiova meda vakaukauataki kina?

• Eda na vakaraitaka vakacava nida nuitaka na Kalou me vakaukauataki keda?

[iYaloyalo ena tabana e 12]

E qaqaco cake ga na noda veiwekani kei Jiova nida veivakavulici ena iVolatabu