Meda Vakarokorokotaki Jiova Kece kei na Luvena
Na Sala ena Yaga Kina na iVakananumi Vei Ira na Tiko Kina ena 8 Epereli
1 O cei nikua era rokovi? Ena rai ni vuravura, o ira ga era rawaka vakayago. Ia levu na gauna, e totolo ni guilecavi na nodra cakacaka. Ia vakacava ga na cakacaka e yaga dina ina kawatamata kece? Eda na vakasamataka vakatitobu na cakacaka yaga duadua oqo ena noda na vakananuma tiko na iVakayakavi ni Turaga ni dromu na siga ena 8 Epereli, 2001.
2 O cei e dodonu me rokovi vakalevu duadua? E sauma na iVolatabu: “Sa ganiti kemuni, na neimami Turaga [Jiova] . . . me cabo vei kemuni na neimami veivakalagilagi kei na vakarokoroko kei na kaukauwa. Ni ko ni a bulia na veika kece.” (Vkta. 4:11, VV) Ni Dauveibuli, e Turaga Sau kina ni lomalagi kei vuravura o Jiova. Sa dodonu ga me vakarokorokotaki me tawamudu!—1 Tim. 1:17.
3 Na Luve ni Kalou, o Jisu Karisito, a cakava na veicakacaka yaga ena vakalougatataki tawamudu kina na kawatamata kece. E maucokona na nona vakatotomuri Tamana. (Joni 5:19) Na uasivi ni nona talairawarawa kei na nona veiqaravi ena yalodina a vu ni kena “soli vua na kaukauwa, kei nai yau, kei na vuku, kei na qaqa, kei na veidokadokai, kei na vakarokoroko, kei na vakavinavinaka.” (Vkta. 5:12) E vakarokorokotaki koya o Tamana ena nona vakatikori koya me Tui. (Same 2:6-8) Eda na vakarokorokotaki rau ruarua na Tamana kei na Luvena ena noda na vakananuma tiko na iVakayakavi ni Turaga ena 8 Epereli, 2001.
4 Ka ni rarawa, ni le lailai sara ena ivolatukutuku ni kawatamata era vakarokorokotaki Jiova kei na Luvena ena vakarokoroko e dodonu me caka vei rau. O ira sara mada ga na tamata ni Kalou ena gauna makawa, o ira na Isireli, era dau vakamamadataka na nodra qaravi Jiova. Oqo e itovo ni veibeci. (Mala. 1:6) Na veidokai dina e okati kina na talairawarawa ena yalodina qai yavutaki ena loloma kei na noda vakavinavinakataka na veika kece erau cakava vei keda o Jiova kei na Luvena. Na noda vakarokoroko kei na veidokai e kena ibalebale noda rerevaka na Kalou da qai dokai koya, eda na dau nanumi Jiova kei Jisu taumada ena veika kece eda cakava ena noda bula. E saga vagumatua na ivavakoso vakarisito me veivakavulici qai veivukei mera vakarokorokotaki Jiova tale ga na tani.
5 Soqoni Bibi Meda Rokova: Na iVakananumi e soqo bibi duadua e veiyabaki vei ira na tamata i Jiova. O ira kece era gadreva mera qaravi Jiova ra qai vakarokorokotaki koya mera na tiko kina. (Luke 22:19) Me ikuri ni 6 na milioni na iVakadinadina, eda namaka ni na tubu na iwiliwili oya me sivia na 14 na milioni ni na levu tale ga na tataleitaki era na tiko ena iVakananumi. E gauna vinaka dina meda vakarokorokotaka kina na Tamada vakalomalagi! E dina ni na vakatabakidua tiko na noda vakananumi Jisu, ia na noda rokova kei na noda doka na ka e rawata e vakalagilagi duadua ga kina o Tamana, o koya e talai Luvena mai.—Joni 5:23.
6 Na cava meda cakava meda tokona kina na soqoni bibi oqo? Eda rawa ni vukei ira na ka vou me yaga vei ira na iVakananumi. Uqeti ira kece mera na tiko kina, tu vakarau mo vukei ira ke ra gadreva na veivuke ena nodra ilakolako ina vanua e caka kina na iVakananumi. Vakamacalataka na inaki ni vunau. Veikilaitaki ira. Na ka era raica ka rogoca ena uqeti ira mera mai duavata kei keda ena vakarokorokotaki Jiova.
7 Kua ni vakalailaina na kena rawa ni cakayaco na soqo oqo. E kaya e dua na gonevuli ni univesiti: “Levu na gauna au dau tiko ena Komunio ena noqu lotu, ia na soqo qo e duidui sara ga. E vaka sara ga na ka e kaya na iVolatabu, au kila ni qo ga na ka dina.” Wasoma sara nona tiko ena soqoni, sega ni dede sa papitaiso.
8 Vukei Ira na Ka Vou Mera Toso: Kauaitaki ira na ka vou era tiko ena iVakananumi qai sikovi ira ena dua na gauna totolo me railesuvi kina na veika totoka era rogoca kei na ka era raica ena soqoni. Vakamacalataka vei ira na vo ni soqoni tale e so, ena rawa tale ga ni vakaikuritaki kina na nodra kilaka vakaivolatabu. Ni railesuvi na wase 17 ni ivola na Kila, “Mai Vakacegu Vei Ira na Tamata ni Kalou,” ena vakamacalataka vei ira na isolisoli vakayalo e so e vakarautaki sara tu ga ena ivavakoso mera vakayagataka. Tuvanaka mera na sarava na vidio Our Whole Association of Brothers mera raica sara ga na nodra duavata, mamarau, kei na nodra gugumatua na tamata i Jiova!
9 E bibi vei ira na tataleitaki mera vulica na sala mera vakaraitaka yadua kina vei Jiova na nodra vakarokorokotaki koya, ra qai dokai koya. Vakamacalataka ni masu mai vu ni lomada e vakamarautaki Jiova qai ivurevure ni veivakaukauataki vakayalo. (1 Joni 5:14) Vakayagataka na lesoni 8 ina 12 ena brochure na Loma ni Kalou, vakamacalataka na itovo e vakarokorokotaki kina o Jiova. Ni veivosakitaki na brochure na Vakadinadina i Jiova Ena i ka Ruasagavulu ni Senitiuri, taqana 30-1, uqeti ira na ka vou mera vakasamataka ni rawa nira vakarokorokotaki Jiova ena nodra vakaitavi sara ga ena cakacaka vakavunau.
10 Na noda vakavinavinakataka na isoro i Jisu kei na noda itavi dokai ni veiqaravi nida nona tisaipeli, e vakarokorokotaki kina na Tamada qai vu ni veivakalougatataki tale ga. E yalataka o Jisu: “Kevaka sa qaravi au e dua, ena vakarokorokotaki koya ko Tamaqu.”—Joni 12:26.