Veisureti ina Soqoni
1 “Ke dua noda itokani e tiko voleka . . . e via lako ina soqoni meda sureti koya sara.” Mai na gauna sara e volai kina na itukutuku oqo ena itabataba ni Zion’s Watch Tower, Noveba 1880, era sa dau gumatua tu ni veisureti na iVakadinadina i Jiova vei ira na lewenivanua mera mai soqoni vata ra qai dusimaki vakaivolatabu. (Vkta. 22:17) Oqo e dua na tiki bibi ni sokalou dina.
2 Bibi Meda Tiko Kina: Eda kalougata nida veimaliwai kei na ivavakoso. Eda na kilai koya kina vakavinaka na noda Kalou uasivi, o Jiova. Ena ivavakoso, eda soqoni vata kina me ‘vakavulici keda o Jiova.’ (Aisea 54:13) E tuvanaka e veigauna na nona isoqosoqo na porokaramu ni veidusimaki vakaivolatabu meda voleka kina vei Jiova da qai vulica tale ga kina na sala yaga me rawa nida bulataka tiko ga ‘na loma taucoko ni Kalou.’ (Caka. 20:27; Luke 12:42) E vakavulici keda na soqoni meda qasenivuli maqosa ni Vosa ni Kalou. Ni vakadreti vei keda na veitikinivolatabu, e vukei keda me vinaka tiko ga kina na noda veimaliwai kei ira tale na so, vaka kina na noda veiwekani kei Jiova. Nida veimaliwai kei ira era lomana na Kalou e vaqaqacotaka noda vakabauta.—Roma 1:11, 12.
3 Veisureti Sara ga Vakadodonu: Ena imatai ga ni nomu caka vuli iVolatabu, sureta yadua na nomu gonevuli ina soqoni. Solia vua na tikidua e vakamacalataki kina na gauna ni soqoni vakaivavakoso. Uqeta nona tataleitaki ni o vakamacalataka vua e dua na vakasama e uqeti iko ena soqoni sa oti, tukuna tale ga vua na ulutaga me na veivosakitaki ena soqoni e tarava. Vakamacalataka vinaka vua na irairai ni Kingdom Hall kei na vanua e tiko kina me rawa ni kunea.
4 Ke sega ni soqoni e dua na gonevuli ena imatai ni nomu veisureti, sureti koya tiko ga. Vakayagataka e vica ga na miniti ena veimacawa mo vakaraitaka vua na kena cicivaki na isoqosoqo. Vakayagataka na brochure Vakadinadina i Jiova Ena i ka Ruasagavulu ni Senitiuri kei na vidio Jehovah’s Witnesses—The Organization Behind the Name me kilai keda kina kei na noda soqoni. Mera tomani iko ena vuli iVolatabu e so tale na dautukutuku me kilai ira kina o gonevuli. Ni o masu, vakavinavinakataki Jiova ena vuku ni nona isoqosoqo, masulaka ni gadrevi vei gonevuli me veimaliwai kina.
5 Kua ni tu vakasuka ni vukei ira na tataleitaki vou meda mai soqoni vata. Na levu ga ni nodra kilai Jiova, na kena qai uqeti tale ga na lomadra mera bulataka na ka era vulica ra qai lewe tale ga ni isoqosoqo duavata ni Kalou.—1 Kor. 14:25.