Wase 8—Na Ka me Caka Mera Toso Kina Noda Vuli iVolatabu
Dusimaki Ira na Gonevuli ina iSoqosoqo
1. Na cava e yaga kina noda vakamacalataka vei gonevuli e veimacawa e dua na vakasama me baleta na isoqosoqo i Jiova?
1 E sega wale ga ni noda isausau ena caka vuli iVolatabu na noda vakavulici ira na gonevuli ena ivakavuvuli vakaivolatabu, ia meda uqeti ira tale ga mera mai lewe ni ivavakoso vakarisito. (Saka. 8:23) Na brochure gona Na iVakadinadina i Jiova—Duavata ni Vakayacora na Loma ni Kalou e Vuravura, e ivukevuke ena tikina oqo. Solia na nodra ilavelave na vuli iVolatabu vou, qai uqeti ira mera wilika. Kuria oya, ena gauna ni vuli e veimacawa, tikica e vica na miniti mo vakamacalataka kina vei gonevuli e dua na vakasama mai na brochure me baleta na isoqosoqo i Jiova.
2. Eda na uqeti ira vakacava na gonevuli ni iVolatabu mera tiko ena soqoni?
2 Soqoni ni iVavakoso: Na sala vinaka duadua mera taleitaka kina na vuli iVolatabu na isoqosoqo ni Kalou, oya na nodra mai tiko kei keda ena soqoni ni ivavakoso. (1 Kor. 14:24, 25) De vinaka mo tekivu ena vakasama oya, mo vakamacalataka yadudua vua na lima na soqoni e dau caka e veimacawa me rawa ni kila vakavinaka. Qai tukuna na ulutaga ni vunau soqovi levu e tarava. Rawa ni o vakaraitaka na ulutaga ena vulici ena Vuli Vale ni Vakatawa, kei na kena ena vulici ena Vulivola ni iVavakoso. Vakamacalataka tale ga na Koronivuli ni Vuli Vunau kei na Soqoni ni Cakacaka. Ke dua nomu itavi ena koronivuli, ena totoka ke drau vakatovotovotaka sara ga kei na nomu vuli iVolatabu. Dau talanoataka vua na tikina bibi o vulica ena veisoqoni. Vakayagataka na iyaloyalo ena noda ivola mera raitayaloyalotaka kina na gonevuli na ka e caka ena soqoni. Sureti ira ina soqoni ena imatai sara ga ni gauna era vuli kina.
3. Na cava eda rawa ni vakamacalataka vei ira na vuli iVolatabu me baleta na isoqosoqo?
3 Ke sa voleka na gauna ni iVakananumi, na soqo ni tabacakacaka, na soqo ni tikina, se nona veisiko na ivakatawa ni tabacakacaka, vakamacalataka vakalekaleka vei ira na gonevuli na ituvatuva oqo, me uqeti ira mera taleitaka. Saga mo sauma vakamalua tiko na nodra vakatataro me vaka: Na cava eda vakatokai kina meda iVakadinadina i Jiova? Na cava e vakatokai kina na vanua ni soqoni me Kingdom Hall? Na cava na nodra itavi na qase ni ivavakoso kei na dauveiqaravi ni ivavakoso? E tuvanaki vakacava na cakacaka vakavunau kei na yalava me tarai? E tabaki vakacava na noda ivola? E vakailavotaki tiko vakacava na isoqosoqo? Na cava na nodrau itavi na valenivolavola ni tabana kei na iLawalawa Dauvakatulewa ena kena liutaki na cakacaka?
4, 5. E yaga vakacava na noda vidio me taleitaki kina na isoqosoqo i Jiova?
4 Rawa ni Veivakavulici na Vidio: Dua tale na sala era na raica kina na gonevuli na isoqosoqo vakasakiti i Jiova, oya na kena vakayagataki na vidio. Na vidio To the Ends of the Earth e vakaraitaki kina na noda cakacaka vakavunau e vuravura raraba; na vidio Our Whole Association of Brothers e vakaraitaka na noda isoqosoqo ni mataveitacini e vuravura raraba; kei na United by Divine Teaching e vakaraitaki kina na noda duavata na iVakadinadina i Jiova. E dua na marama a dau taura tiko na noda ivoladraudrau kei na so tale na ivola ena loma ni lima taucoko na yabaki, e tuturu na wainimatana ena gauna e sarava kina na vidio Jehovah’s Witnesses—The Organization Behind the Name. Sa tekivu me dau vakabauti ira na tacida era dau sikovi koya yani, ia ni sarava oti na vidio, e raica rawa ni dodonu me vakabauta tale ga na isoqosoqo. Tekivu vulica sara na iVolatabu, macawa ga e tarava sa tiko ena soqoni ena Kingdom Hall.
5 Noda vakayagataka gona na iyaya ni cakacaka sa vakarautaki rawa tu, ena vica na miniti e veimacawa, sa da dusimaki ira sara tiko ga kina vakamalua na gonevuli ni iVolatabu ina duabulu na isoqosoqo e vakayagataka o Jiova nikua.