“Kakua ni Ceguoca e na Caka Vinaka”
1 Sa dua dina na ka vinaka o cakava ni o sa mai qarava na Kalou o Jiova. Ia, sa bau ka ni bolebole ena gauna lewalewai dredre oqo meda “kakua ni ceguoca e na caka vinaka.” (Kala. 6:9) E dina ni gadrevi kina na sasaga, o na rawata ga. O na rawata vakacava?
2 Bucina na Vakasama i Jisu: Me vakataki Jisu ga, o rawa tale ga ni vosota na veivakatovolei ke dei nomu nuitaka na Matanitu ni Kalou. (Iper. 12:2, 3) Mo kila tiko ni lomani iko o Jiova qai vinakata mo bula. (2 Pita 3:9) Nuitaki koya mai vu ni yalomu, mo kila tiko ni na vukei iko. (1 Kor. 10:13) Ia tiko ga na masu, kerei Jiova me vukei iko mo vosota. (Roma 12:12) Mo marau baleta ni o kila ni na vakadonui iko se vakadeitaki iko na Kalou ena vuku ni nomu vosota. (Roma 5:3-5, VV) Nomuni bucina ena yalodina na “yalovata e na nomuni muria na i vakarau [se, “vakasama,” NW] i Karisito” ena vakacegui kemuni qai vakamarautaki Jiova.—Roma 15:5, VV; Vkai. 27:11.
3 Cakava Tiko ga na Cakacaka Vinaka: Vakayagataka vinaka na isolisoli e vakarautaka o Jiova vei ira na nona tamata mera vukei kina nira cakava tiko ga na cakacaka vinaka. Wilika tiko ga na Vosa ni Kalou qai vulica tiko ga na ivola vakaivolatabu e vakarautaka na ilawalawa e vaka e le dua na dauveiqaravi yalodina ka vuku. Vakavakarau ena yalodina mo tiko ena soqoni kece ni ivavakoso, mo vakaitavi tale ga kina. Ni bera se ni oti na soqoni vakarisito, veimaliwai voleka kei ira na mataveitacini. Mo tekia na isausau o na rawata ena nomu cakacaka vakaitalatala me rawa ni vakainaki kina na nomu vakaitavi ena cakacaka vakavunau, mo vakavinakataka tale ga kina na iwalewale ni nomu tukuna na itukutuku vinaka.
4 Oqori na sala o rawa ni cakava tiko ga kina na cakacaka vinaka, ena levu tale ga na nomu marau. E kaya e dua na tacida tagane mai Itali: “Au lesu i vale ni sa bogi ni oti e dua na siga na noqu cakava na cakacaka i Jiova, e dina niu oca. Ia au marau, au vakavinavinakataki Jiova ni solia vei au na marau e sega ni dua e rawa ni kauta tani.” O koya gona, cakava tiko ga na cakacaka vinaka, o na vakila tale ga kina na marau levu.