Kua ni Ceguoca ena Caka Vinaka
“ME VINAKA tiko ga na nomuni i vakarau e na kedra maliwa na tawa lotu,” e vakadreta na yapositolo o Pita. (1 Pita 2:12, VV) Na vosa vakirisi e vakadewataki me “vinaka” e dusia na ka e “rairai totoka, vakaturaga, dokai, vinaka vakaoti.” Ena gauna oqo, sa dredre me kune o ira era itovo vakaturaga se ra dau veidokai. Ia vakararaba e rawa ni tukuni nira sa rawata oqo na tamata i Jiova nikua ena nodra muria tiko na veika e vakadreta o Pita. Era kilai e veiyasa i vuravura ena nodra itovo vinaka.
E vakavure vakasama toka oqo nida raica na levu ni leqa kei na nuiqawaqawa eda sotava ena “gauna cacamatua, lewalewai dredre” oqo. (2 Timoci 3:1, NW) E tiki ni noda bula e veisiga na veivakatovolei, qai takalevu na kena tusaqati na ivakarau ni bula vakarisito. E so na veivakatovolei e lekaleka wale ga, e so tale e sega ni oti rawa qai torocake tiko ga na kena kaukaua. Ia, e vakauqeta na yapositolo o Paula: “Me da kakua ni ceguoca e na caka vinaka, ni da na tamusuka e na kena yabaki, kevaka eda sa sega ni oca.” (Kalatia 6:9) E rawa vakacava nida caka vinaka tiko ga nida vakatovolei vakaca da qai cati vakalevu?
Veika e Rawa ni Uqeti Keda Meda Caka Vinaka Tiko Ga
Na nona cavuti e dua me “vakaturaga, dokai, vinaka vakaoti” e dusia sara tiko ga na ivakarau ni lomana. Ena sega ni tu tu ga me vinaka na noda itovo se ivakarau nida sotava na veivakatovolei kei na leqa, ena rawati ga ena noda muria da qai bulataka e veisiga na ivakavuvuli ena iVolatabu ena veibasoga kece ni noda bula. Na cava e so na ka ena uqeti keda? Raica mada e vica.
Bucina na rai i Karisito. E gadrevi na yalomalumalumu me vosoti kina na veika tawadodonu. O koya e dau dokadoka ena dredre me vosota na veivakacacani. Ia, e duatani o Jisu, ni a “vakamalumalumutaki koya, a sa talairawarawa me mate.” (Filipai 2:5, 8) Nida vakatotomuri koya, eda na sega ni “yalo lailai se datuvu koso” ena noda veiqaravi tabu. (Iperiu 12:2, 3, VV) Meda yalomalumalumu ni talairawarawa ena noda tokoni ira era liutaka na ivavakoso eda lewena. (Iperiu 13:17) Mo raici ira na tani nira “uasivi cake” vei iko, qai liu nomu vakacegui ira ena ka era gadreva.—Filipai 2:3, 4.
Nanuma vinaka ni lomani iko o Jiova. Meda vakabauta dei ni o Jiova e dau “saumi ira talega era sa dauvakasaqarai koya.” (Iperiu 11:6) E kauaitaki keda dina qai vinakata meda bula tawamudu. (1 Timoci 2:4; 1 Pita 5:7) Na noda kila ni sega ni dua na ka e rawa ni tawasei keda mai na loloma ni Kalou, ena uqeti keda oqori meda kua ni ceguoca ena caka vinaka nida vakatovolei.—Roma 8:38, 39.
Nuitaki Jiova vakatabakidua. E bibi meda nuitaki Jiova, vakauasivi nida nanuma ni na vakaleqa na noda bula se sa na sega ni oti rawa na veivakatovolei. Meda nuitaka dei ni o Jiova ena sega ni vakatara meda vakatovolei ‘me sivia na noda kaukaua,’ ena vakarautaka tale ga na ‘sala meda dro bula kina.’ (1 Korinica 10:13, VV) Kevaka mada ga era via vakamatei keda e so, eda na yaloqaqa tiko ga nida nuitaki Jiova.—2 Korinica 1:8, 9.
Masu tiko ga. E bibi me vu mai lomada noda masu. (Roma 12:12) Oqo e dua na sala eda na toro voleka kina vei Jiova. (Jemesa 4:8) Mai na veika eda sa sotava yadudua, eda vulica kina ni “kevaka eda sa kerea e dua na ka . . . , sa rogoci keda ko koya.” (1 Joni 5:14) Ke vakatara o Jiova meda vakatovolei me macala kina na noda yalodina, eda na kerea na nona veivuke me rawa nida vosota. (Luke 22:41-43) Na masu e vakadeitaka vei keda nida sega ni sasaga duadua tiko, kevaka e totaki keda o Jiova, eda na vosota rawa na veivakatovolei.—Roma 8:31, 37.
Cakacaka Vinaka—‘Vu ni Vakavinavinaka kei na Veivakacaucautaki’
E tiko na gauna era sotava kina na lotu Vakarisito kece na ‘veivakararawataki e vuqa.’ Ia, “me da kakua ni ceguoca e na caka vinaka.” Kevaka eda nuiqawaqawa, ena vakaukauataki keda na noda kila ni noda yalodina e ‘vu ni vakavinavinaka kei na veivakacaucautaki.’ (1 Pita 1:6, 7) Vakayagataka vinaka na isolisoli kece vakayalo e vakarautaka o Jiova me vakaukauataka nomu vakabauta. Ke o gadreva na veivuke, raici ira na ivakatawa, dauveivakavulici, kei ira na daunivakasala ena ivavakoso vakarisito. (Cakacaka 20:28) Tiko wasoma ena soqoni kece vakaivavakoso, “me da dui veivakauqeti kina e na loloma kei na cakacaka vinaka.” (Iperiu 10:24, VV) Eda na yadra tiko ga da qai kaukaua vakayalo ke da dau wili iVolatabu e veisiga kei na noda vuli vakataki keda; vaka kina na noda vakaitavi wasoma ena cakacaka vakavunau.—Same 1:1-3; Maciu 24:14.
Na levu ga ni noda vakila na loloma kei na veinanumi i Jiova, na levu tale ga ni noda “lomakatakata e na cakacaka vinaka.” (Taito 2:14) Nanuma vinaka ni o “koya ena vosota me yacova nai vakataotioti, ena vakabulai.” (Maciu 24:13) Meda vakadeitaka mada ga “me da kakua ni ceguoca e na caka vinaka”!
[Tikina bibi ena tabana e 29]
Meda nuitaka dei ni o Jiova ena sega ni vakatara meda vakatovolei ‘me sivia na noda kaukaua,’ ena vakarautaka tale ga na ‘sala meda dro bula kina’
[iYaloyalo ena tabana e 30]
Na noda ogaoga tiko ga ena cakacaka vakarisito ena vakarautaki keda meda vosota na veivakatovolei