O sa Vakayacora Tiko Vakavinaka na Nomu Cakacaka Vakaitalatala?

¹ Ena ivola na Cakacaka, eda wilika kina na nodratou vakayacora vakavinaka na tisaipeli i Jisu na nodratou cakacaka vakaitalatala ena nodratou “tusanaka” na ka dina vei ira na tamata. (Caka. 2:40, VV; 8:25; 28:23) Oya e dau isausau sara tu ga ni yapositolo o Paula. (Caka. 20:24) Me nomu isausau tale mada ga oya ni o italatala ni itukutuku vinaka, se vakaevei? O na rawata vakacava?

² Vakavakarau: Me laulau nomu ivakamacala ena cakacaka vakaitalatala, e bibi na vakavakarau. E yaga vakalevu oqo nida solia na ivoladraudrau, ni dau veiveisau na ulutaga e tabaki kina. Meda wilika vinaka sara na ilavelave ni Noda Cakacaka Vakaitalatala ni Matanitu oqo e vakamacalataki kina e dua na iwalewale vou​—e tiko ena yasana imawi e so na iwalewale ni veivosaki me taurivaki kina Na Vale ni Vakatawa kei na Yadra! tabaki vou. Ena digitaki e dua na usutu veiganiti mai na ilavelave yadua era na taleitaka na lewenivanua ni vakamacalataki vei ira. Na cava mo cakava?

³ Digitaka na iwalewale ni veivosaki o kila ni laulau vakalevu ena nomu yalava. Wilika sara vakavinaka na lewe ni ulutaga, qai vakasamataka na veitikina bibi ena dreta nona vakasama o koya drau veivosaki. Raica e dua na tikinivolatabu ena ivoladraudrau e tokona na nomu ivakamacala, o rawa ni wilika vua na itaukeinivale. Tinia vakalekaleka ena nomu uqeti koya e vakarorogo tiko me wilika na ivoladraudrau, ke veiganiti, e rawa ni cau na itaukeinivale ina cakacaka ni iVakadinadina i Jiova e vuravura raraba. Vakatovotovotaka sara na iwalewale oqo.

⁴ Saga mo Vakayagataka na iVolatabu: Ni o vakasamataka vinaka na ka mo tukuna, o rawa ni wilika e dua na tikinivolatabu ena nomu ivakamacala. Me kena ivakaraitaki, o ira na dautukutuku matua ena levu na vanua era dau vakayagataka vinaka na iVolatabu ena nodra cakacaka vakavunau, era kidavaka na itaukeinivale, ra qai kaya:

◼ “Keimami tarogi kemuni tiko na weka i keimami se oni vakabauta na ka oqo . . . ” Wilika na Vakatekivu 1:1, qai taroga: “Oni duavata kei na itukutuku oya?” Ke duavata kina o itaukeinivale, kuria ena nomu kaya: “O au tale ga. Ia, ke bulia na ka kece ga na Kalou, oni vakabauta ni vakavuna o koya na veika ca e yaco tu oqo?” Ni o vakasamataka vinaka na ka e tukuna o itaukeinivale, wilika sara na Dauvunau 7:29. Cega na taqana 71 ena ivola na Kila, wilika na parakaravu 2. Uqeti itaukeinivale me wilika na ivola. Ke sega ni duavata kei na Vakatekivu 1:1 o itaukeinivale, uqeti koya me dikeva na ivola na Creation.

⁵ Lesuva Kece na Tataleitaki: O sega ni vakayacora vinaka na nomu cakacaka vakaitalatala ke o sega ni lesuvi ira na tataleitaki. Ni tekivutaki e dua na veivosaki vinaka, ke o solia na ivoladraudrau se dua tale na ivola, vola na yaca i koya o vosa vua kei na nona itikotiko. Saga sara ga mo bucina na nona tataleitaki ena nomu lesu vakatotolo. Sureti koya tiko ga me vuli iVolatabu.

⁶ Eratou kila na tisaipeli ena imatai ni senitiuri ni a vakaroti iratou o Jisu me ratou “vunau” sara vakavinaka. (Caka. 10:42) E tukuni tale ga vei keda na ivakaro oya, ni sala duadua ga oya meda vukei ira kina e so mera mai tisaipeli. (Maciu 28:19, 20) Meda gumatua meda vakayacora sara vakavinaka na noda cakacaka vakaitalatala.​—2 Tim. 4:5.