Solia na iVoladraudrau e Dau Tukuna na Ka Dina
1. Na cava na inaki ni Vale ni Vakatawa?
1 Na Vale ni Vakatawa Kacivaka na Matanitu i Jiova, ena usutu tiko ga ni kena kacivaki na Matanitu ni Kalou kei na nodra tuberi e so tale mera tisaipeli. (Maciu 24:14; 28:19, 20) Eda marau nida vakaitavi ena kena veisoliyaki Na Vale ni Vakatawa qo ena basoga kece ni cakacaka vakavunau.
2. Na veisau cava sa laurai ena noda Vale ni Vakatawa, cava e vakayacori kina qo?
2 Sa oti qo e vica na yabaki noda raica na veiveisau ena Vale ni Vakatawa, oya na kena levu, na lewe ni ivola, kei na kena dau veisoliyaki. Na inaki ni veisau qo me veiuqeti qai yaga vei ira na dauwiliwili. Me tara na lomadra na itukutuku vinaka ni Matanitu ‘me ra bula na tamata kece ga, era sa mai kila nai vakavuvuli dina.’—1 Tim. 2:4.
3. Ena veisoliyaki vakacava Na Vale ni Vakatawa ena cakacaka vakavunau?
3 Tekivu ena Janueri 2008, eda sa na veisoliyaka ena cakacaka vakavunau na ilavelave ni Vale ni Vakatawa e tabaki me baleti ira na lewenivanua. Eda na taura na ilavelave vou qo ena veiyatolu na vula. E tabaki tiko ena tabana e muri ni Noda Cakacaka Vakaitalatala e dua na vakatutu ni kena soli Na Vale ni Vakatawa. Ena vakamacalataki tiko kina e dua vei ira na imatai ni ulutaga ni Vale ni Vakatawa, ia ena so na gauna ena tabaki ena vakatutu e so na ulutaga era na taleitaka na lewenivanua. Ena qai laulau sara na vakatutu e vakarautaki ke matata vei keda na ulutaga ena Vale ni Vakatawa, rawa tale ga nida vakamacala ena noda vosa ga me yaga kina ena yalava.
4. Na cava ena laulau kina meda vakayagataka e so tale na vakatutu mai na kena e tu ena Noda Cakacaka Vakaitalatala?
4 E tu ena Noda Cakacaka Vakaitalatala na vakatutu ni kena soli Na Vale ni Vakatawa, rawa nida vakayagataka tale ga e dua tale na vakatutu e ganita na yalava. Dua na vuna e caka kina qo, oya nira na taleitaka na tiko ena noda yalava e dua tale na ulutaga, se da rawa ni vakamacalataka na ulutaga eda taleitaka.
5. Na cava meda cakava ni bera nida vakarautaka e dua na vakatutu ni kena soli na ilavelave vou?
5 Meda Vakavakarau Vakacava: iMatai, meda kila vinaka na ulutaga eda na via vakamacala kina. Eda na sega ni kila vinaka kece na ulutaga taucoko e tiko ena loma ni Vale ni Vakatawa ena gauna eda cakacaka vakavunau kina. Ia, me na laurai ena noda ivakamacala ni ka eda tukuna tiko e dina qai yaga. Ena rawa wale ga qo ke da vakavakarau vinaka ena ulutaga eda na vakamacala kina.
6. Meda vakarautaka vakacava noda ivakamacala?
6 iKarua, meda veiveisautaka na itekitekivu ni vosa. Taroga na taro vakavure vakasama e veisemati kei na ulutaga me rawa ni tekivutaki kina na veitalanoa. Nuitaka na Vosa ni Kalou me tara na lomadra. (Iper. 4:12) Digia e dua na tikinivolatabu e veiganiti kei na ulutaga, se vakayagataka e dua na tikinivolatabu e vakamacalataki tiko ena loma ni ulutaga. Vakamacalataka se rau veisemati vakacava na tikinivolatabu kei na ulutaga.
7. Meda vakavinakataka vakacava na iwalewale ni noda ivakamacala?
7 Gauna Kece Ga: Me na laulau noda ivakamacala ena gadrevi meda vakayagataka ena cakacaka vakavunau. Tomani ira na lewe ni ivavakoso ena soli ivoladraudrau ena siga Vakarauwai. Solia na ivoladraudrau vei ira na dau wilika noda ivola, noda vuli iVolatabu, kei na so tale era tiko e vale ena gauna eda veisikovi lesu kina. Rawa ni soli tale ga vei ira eda veitalanoa vata ena vanua ni volivoli, ena noda gade, se na gauna eda waraki vuniwai tiko kina. Meda vakavinakataka tiko ga na iwalewale ni noda ivakamacala ena veigauna.
8. Cava e vakasakiti qai duatani kina Na Vale ni Vakatawa?
8 E vakasakiti qai duatani duadua Na Vale ni Vakatawa. E vakalagilagi Jiova ni Turaga Cecere e lomalagi kei vuravura. (Caka. 4:24) E veivakacegui na itukutuku vinaka ni Matanitu ni Kalou vei ira na rogoca qai vaqaqacotaka nodra vakabauti Jisu Karisito. (Maciu 24:14; Caka. 10:43) Kena ikuri, e yadrava tiko na veika e vakayacori e vuravura, oya na vakayacori ni parofisai ena iVolatabu. (Maciu 25:13) Meda vukei ira na tiko ena noda yalava mera kila na yaga ni vola qo ena noda saga meda solia ena gauna kece ga!
9. Cava e rawa ni yavu ni veisikovi lesu?
9 Ni o sa solia rawa e dua Na Vale ni Vakatawa, se o veitalanoa kei na dua ena iVolatabu, vakarautaka e dua na taro vakavure vakasama mo sikovi koya lesu kina, mo drau tomana na veitalanoa ena iVolatabu. Ke da gugumatua ena noda kaburaka na sore ni ka dina, eda nuidei ni o Jiova ena dolava na lomadra era gadreva mera kilai koya, mera qaravi koya tale ga.—1 Kor. 3:6.