Vunautaka na iTukutuku Vinaka e Veivanua Kece Ga

¹ Era dau vunautaka na itukutuku vinaka e veivanua kece ga na lotu Vakarisito taumada. Na levu ni nodra lomakatakata a yaco kina me “vunautaki vei ira na tamata kecega sa tiko e ruku i lomalagi” na itukutuku ni Matanitu ni Kalou ena loma ni 30 na yabaki ni oti nona vakaturi o Jisu Karisito.​—Kolo. 1:23.

² Oqori tale ga na nodra inaki na dauveiqaravi lomakatakata i Jiova nikua​—mera vunautaka na itukutuku vinaka ni Matanitu vei ira na tamata kece ga. Eda na rawata vakacava na isausau oqo? E levu era cakacaka ra sega ni tiko e vale nida vunau yani. Nira sega ni cakacaka, era na rairai gade, volivoli, se lakova e so na ka ni veivakamarautaki. Era na rogoca vakacava na itukutuku ni Matanitu o ira na tamata lomadina?​—Maciu 10:11.

³ E so era lakovi ena nodra vanua ni cakacaka. Ena so mada ga na tauni lalai e tu kina na tabana ni bisinisi era cakacaka tiko kina e so ena loma ni siga taucoko. Ena mua ni macawa, era rogoca e so na itukutuku vinaka, ra qai taleitaka sara ga, nira vakacegu voli ena vanua ni gade, ena vanua ni veivakamarautaki, nira wawa toka ena ikelekele ni motoka se ena vanua ni volivoli.

⁴ E dua na iwiliwili levu ni dautukutuku era saga mera vunau ena vanua e dau lakovi vakalevu, na vanua kece ga era na sotava kina na tamata. Taumada, era a vakatitiqa ra qai madua na dautukutuku ni sa matau tu ga vei ira na ivakarau ni vunau e veivale. E vakacava ena gauna oqo?

⁵ E kaya e dua na tacida tagane matua: “E vakabulabulataka noqu cakacaka vakaitalatala!” E kuria e dua tale: “E vukei au meu raica vakatabakidua na ka e bibi.” E dikeva e dua na painia qase: “E vakaukauataka na vakasama, na yago, kei na ka vakayalo tale ga, . . . au se kaukaua voli ga.” E tukuna e dua na dautukutuku ni sa qai vosa vei ira e levu era sega ni bau sotavi ira vakadua na iVakadinadina i Jiova. E bulabula tale ga nodra vakaitavi na itabagone ena cakacaka marautaki oqo. E kaya e dua na itabagone: “E marautaki dina nida vosa vei ira e lewe vuqa.” E kaya tale e dua: “Sa qai levu ga na ivola au solia ni vakatauvatani kei na gauna sa oti!” E yaco tiko oqo ena yalava e sa dau tarai wasoma.

⁶ Ni o sotava e dua e tataleitaki, vola na yacana, nona itikotiko, kei na naba ni talevoni. Mai na nomu taro tu ga vakadodonu, o rawa ni kaya: “Au taleitaka nodaru veitalanoa. E dua beka na sala edaru rawa ni qai tomana tale kina?” Se taroga: “E dua beka na sala meu na veitaratara kina kei kemuni e vale?” E levu era sotavi ena sala oqo era vakadonuya mera lesuvi tale.

⁷ Vunau ena Basi, se ena iKelekele ni Basi: Ena dua na mataka era navuca e vica na painia mera vunau vei ira na wawa basi. E marautaki sara nodra veitalanoa, ia e dua tiko na kena leqa. Ni na taladrodro sara tu ga na veitalanoa, sa na gole mai na basi, ena tini botoilevu tu kina na veitalanoa. Era walia na leqa oqori nira vodo tale ga ena basi na painia ra qai tomana na veitalanoa kei ira na pasidia. Ni yavoki mai na basi, era vodo lesu tale na painia. Ni oti e vica na yavoki, ra qai soqona kece na ka era rawata: E soli kina e sivia ni 200 na ivoladraudrau qai tauyavutaki e ono na vuli iVolatabu. E so na pasidia era vola na vanua era vakaitikotiko kina kei na naba ni talevoni mera sikovi kina e vale. Ena macawa e tarava, era lesu tale na painia ena vanua ni wawa basi ra qai muria ga na kena icakacaka era sa cakava oti. Era solia e 164 na ivoladraudrau qai tauyavutaki kina e dua tale na vuli iVolatabu. Ena dua na vanua a kele kina na basi e vodo sara kina e dua na pasidia qai dabe ena idabedabe ga sa lala tiko​—ena yasana e dua na painia. A raici tacida tagane qai kaya yani ena matadredredre: “Au kila, e tiko e dua Na Vale ni Vakatawa me noqu!”

⁸ E dau laulau sara nodra vunau e levu na dautukutuku nira vodo basi, waqa, se waqavuka. O na tekivuna vakacava na veivosaki kei na pasidia drau dabe veitikivi? E dua na dautukutuku yabaki 12 a wilika tiko na Yadra! ena basi, ni namaka me na uqeta nona tataleitaki na goneyalewa gone erau dabe veitikivi tiko. A mana dina! A tarogi koya na goneyalewa se na cava e wilika tiko, a qai sauma na dautukutuku gone oqo ni wilika tiko na iwali ni leqa era sotava voli na itabagone. A kuria ni yaga sara vakalevu vua na ulutaga oya ena rawa tale ga ni vukei koya. A taura ena marau na ivoladraudrau na goneyalewa oqori. Erau rogoca tiko nodrau veitalanoa e rua tale na itabagone rau qai kerea tale ga me dua na nodrau ilavelave ni ivoladraudrau. Ena gauna oqori, sa vakelea na basi o draiva qai taroga se cava e taleitaki vakalevu kina na ivoladraudrau. Ena gauna e kila kina, a taura tale ga e so nona ilavelave. Sa macala ga ni sega ni na yaco e dua na ka vaka oqo ke sega ni tu vua na dautukutuku gone oqori na ivoladraudrau me solia vei ira na tataleitaki!

⁹ Vunau ena iKelekele ni Motoka, ena Makete kei na Vanua ni Gade: O sa bau tovolea mada na vunau ena ikelekele ni motoka, ena makete, se ena vanua ni gade? O ira sara mada ga era vakaitikotiko vakayawa ena veivanua e dredre na kena lakovi, era na dau kune ena makete. Ni bera ni o tekivu vunau ena vanua vaka oqo, vakararai vinaka mada. Raica e dua e sega ni vakusakusa tiko se wawa tiko ena loma ni dua na motoka e kele tu, qai saga mo tekivutaka e dua na veitalanoa ena sala matau. Ke sa toso na veitalanoa, okata kina na itukutuku ni Matanitu ni Kalou. Tovolea mo cakacaka duadua ia mo volekata tiko ga na dautukutuku drau cakacaka vata tiko. Kua ni kauta e dua na kato levu, me kilai kina na cakacaka o cakava tiko. Mo vuku. Ena vinaka me lekaleka ga nomu tiko ena dua na vanua qai toso sara tiko ina dua tale. Ke dua e sega ni taleitaka mo drau veitalanoa, tomana tiko ga nomu ilakolako qai vaqara e dua mo vosa vua. Ni muria na kena icakacaka oqo, a solia rawa e 90 na ivoladraudrau ena dua na vula e dua na tacida tagane ni vunau ena ikelekele ni motoka.

¹⁰ E so era lako ina vanua ni gade mera lai vakacegu; e so tale era lai qito se vagadetaki ira na luvedra. Mo kua ni vakacaraka na ka era cakava, qara ga na sala mo vunau kina vei ira. E dua na tacida tagane a veivosaki kei koya e dausamaka na vanua ni gade, a qai kila ni leqataka na turaga oya na vakayagataki ni wainimate gaga kei na nodra veigauna mai muri na luvena. A tekivu sara na vuli iVolatabu e dau vakayacori vakawasoma ena vanua ni gade.

¹¹ Vakasaqara na Sala Mo Vunau Kina: A sega ni yalana o Jisu na nona cakacaka vakavunau. A kacivaka na itukutuku vinaka ena gauna veiganiti kece ga. (Maciu 9:9; Luke 19:1-10; Joni 4:6-15) Dikeva na sala era vunau tiko kina e so na dautukutuku.

¹² E so era vakamatauna mera vunau vei ira na itubutubu era waraki luvedra tiko ena matamata ni koronivuli. Nira dau yaco totolo yani e so na itubutubu, e so e 20 taucoko na miniti na dede ni nodra dau wawa, e tiko kina na gauna mera veitalanoataka e dua na ulutaga vakaivolatabu.

¹³ E levu na painia era kauaitaki ira na dau taleitaka e so na ulutaga e vakamacalataki ena noda ivoladraudrau. Me kena ivakaraitaki mada, ena vica na yabaki sa oti a vuavuaivinaka sara nona cakacaka e dua na tacida yalewa ni sikova oti e ono na koronivuli ena yalava ni nona ivavakoso ni vakayagataka na ulutaga “Schools in Crisis,” (Sa Ra Leqa na Koronivuli), ena Awake!, 22 Tiseba, 1995. A sikova tale ga na tabana ni matanitu e qarava na ka e baleta na vuvale qai solia kina na ivoladraudrau e baleta na bula vakavuvale kei na nodra vakacacani na gone, a vinakati me lesu tale yani kei na itabataba e vakamacalataki kina na ulutaga vaka oya. A kauta tale ga na itabataba ni Awake!, 8 Maji, 1996, ina valenivolavola e qaravi ira na sega tu ni cakacaka, e qai tukuni mai kina ni “totoka dina.”

¹⁴ E tukuna mai e dua na ivakatawa ni tikina ni rau dau vunau tawalokuci wasoma kei watina ena gauna ni nodrau volivoli. Erau dauvolivoli ena gauna e sega ni osooso kina na sitoa, nira taubale tu ga vakamalua e loma ni sitoa o ira na volivoli. E levu sara na veitalanoa vinaka erau vakayacora kina.

¹⁵ E vuavuaivinaka sara nodra cakacaka e levu na dautukutuku nira vunau e valenibula. Era sega ni biuta tu ga na ivoladraudrau ena rumuniwawa. E nodra isausau mera tukuna vei ira na tamata na itukutuku vinaka, ra qai saga mera vosa yadua sara ga vei ira era sotava e valenibula.

¹⁶ E dua na vanua ni vunau vinaka ena noda yalava na wavu, eda sa vunau tiko beka kina? E levu na vanua era dau waraka kina na lewenivanua na kele ni waqa, ena nodra ilakolako ina veiyanuyanu. Vei ira e so, oqo wale ga na sala e rawa nida veitaratara kina kei ira ni dredre na tarai ira ena dua tale na sala.

¹⁷ Gumatua ni Vunau e Veivanua Kece Ga: Noda tudei ena noda yalayala e okati kina noda kila na kena sa vakatotolotaki tiko na cakacaka ni kena vunautaki na itukutuku vinaka ni Matanitu ni Kalou. Me rawa nida sotavi ira na tamata ena gauna veiganiti, e dodonu meda biuta vakatikitiki na veika eda dau vinakata me rawa nida “vakabula eso.” E lomada na dauveiqaravi yalayala kece i Jiova me rawa nida kaya me vakataki koya na yapositolo o Paula: “Ka’u sa cakava na ka kecega e na vuku ni tukutuku-vinaka, me’u rawata vata kina kei kemudou na kenai sau.”​—1 Kor. 9:22, 23.

¹⁸ A kuria nona volavola o Paula: “O koya oqo sa yaloqu sara kina me’u rekitaka na noqu malumalumu, me tiko kina vei au na kaukauwa i Karisito. . . . Ni’u sa malumalumu, au sa qai kaukauwa.” (2 Kor. 12:9, 10) E sega ni dua vei keda ena vakayacora na cakacaka oqo ena nona kaukaua vakataki koya. E dodonu meda kerea vei Jiova na kaukaua ni yalona tabu. Ke da kerei Jiova me vakaukauataki keda, sa rawa nida nuidei ni na rogoca noda masu. Ena uqeti keda noda lomani ira na tamata meda qara na sala veiganiti kece ga meda vunautaka kina vei ira na itukutuku vinaka, ena vanua cava ga eda sotavi ira kina. Vakacava mo tovolea mada e dua na kena icakacaka e vakaturi tiko ena itoma oqo ena loma ni macawa ka tu mai?