Porokaramu ni Tara Kingdom Hall
1 Sa vakayacora dina tiko o Jiova na nona vosa ni yalayala me vakavulici ira nona tamata, me dusimaki ira ena nona sala. (Aisea 54:13) Eda vakadreti vakabibi ena iotioti ni veisiga oqo meda dau soqoni vata vakawasoma me sega wale ga ni vakavulici keda o Jiova, meda vakaitavi tale ga kina ena noda dau veivakayaloqaqataki kei na noda veivakatakatai ena loloma kei na cakacaka vinaka.—Roma 1:11, 12; Iper. 10:23-25.
2 Me tekivu mai na imatai ni senitiuri me yacova mai nikua, era sa dau vakasosoqoni vata na lotu Vakarisito ena vale vakaitaukei kei na vale era vakayagataka na lewenivanua me vanua ni nodra sokalou. (Caka. 2:42, 46; 12:12) Ia, ena yabaki 1935, a kacivaki mai Hawaii na tara ni dua na vale vou ni soqoni e vakatokai na Kingdom Hall, ra qai saga na ivavakoso iVakadinadina i Jiova e veivanua kece me dua tale ga na nodra vale ni sokalou vaka oya, e vakatokai ena yaca vata ga.
3 Se vanua cava era tiko kina na iVakadinadina i Jiova, era dau raica me vanua bibi duadua vei ira na Kingdom Hall. Ena totoka beka na kena irairai se itaratara, ia kevaka mada ga e tara ga vakarawarawa, ena se yaga tiko ga vakalevu me vanua ni nodra sokalou dina kei na vanua me qaravi kina na itavi vakayalo ena nodra itikotiko. Na kena tara e vakadinadinataka ni sa vunautaki tiko na itukutuku vinaka ena yalava e duri tu kina. E vanua ni vakacegu dina kei na nodra vakasalataki o ira na kauaitaka dina na nodra veika vakayalo.
4 Toso ni Tara Kingdom Hall e Viti: Sa balavu mai na gauna na kena dau vica wale toka ga na Kingdom Hall e Viti. E vica na ivavakoso era sa saga me dua ga na nodra Kingdom Hall qai so era rawata sara. Ia, ni sega ni veirauti beka na ilavo se so tale na leqa, na ka oqo e vakavuna me lai tara sara tu vakayawa na valenisoqoni, se sega ni veirauti na levu ni Kingdom Hall e tara. Era sa dau vinakata makawa tu na tacida e Suva me dua tale nodra Kingdom Hall. Ena voli vakacava na qele me tara kina? Na taro vata tale ga oqori e nanumi me baleti Nadi, Labasa, kei na so tale na vanua.
5 Eratou vakadonuya ena Okotova 1992 na iLawalawa Dauvakatulewa me voli e dua na qele e Nadi, mani tara rawa ena Okosita 1995 e dua na Kingdom Hall kei na nodra vale na daukaulotu ena nodra mai veivuke e dua na timi ni taravale era lewena na tacida mai vanuatani. Ena yabaki ga e tarava, era se baci vukei ira tale na tacida e Suva e dua tale ga na timi vaka oya me tara kina e dua na Kingdom Hall levu e Vatuwaqa. Sa bau yaga dina sara ga na Kingdom Hall era tara oqori vei ira na mataveitacini era tu voleka kina! Ni sa tara oti ga na Kingdom Hall e Nadi, era sa tekivu cau tale ga na lewe ni ivavakoso ena veivula me saumi kina na ilavo ni kena tara. O ira na mataveitacini ena lima na ivavakoso e Suva era vakaraitaka nodra vakavinavinaka ena nodra dau dina ena nodra cau me saumi lesu kina na dinau levu a solia vakayalololoma na iLawalawa Dauvakatulewa qai sega ni dua na kena tubu e lavaki. Me yacova mai oqo sa sivia tale na veimama na nodra sausaumi.
6 Ni tara oti na rua na Kingdom Hall lelevu oqori, e lesia na valenivolavola ni tabana, ena nodratou veidusimaki na iLawalawa Dauvakatulewa, e dua na Regional Building Committee (RBC), ra qai vakaitavi kina e so na tacida. Ena vanua sa vakatorocaketaki oti, e vakaitavi sara ga na komiti oqori ena qaravi ni veika kece e gadreva na ivavakoso me tara kina na Kingdom Hall. A tuvanaka sara ga na komiti oqori na kena vakailavotaki kei na tara ni Kingdom Hall e Covata, Labasa, sa qai vakaoti ena 1999. Mai na gauna oya me yacova mai nikua sa dau cau tiko ena veivula na ivavakoso e Labasa me saumi kina na nodra dinau e sega na kena tubu.
7 Ia, ena Sepiteba 1999, eratou vakatulewataka na iLawalawa Dauvakatulewa me sa kua tale ni qai cicivaki tiko ena tabana o Viti na Regional Building Committee, ia me sa wili vata ga o Viti kei ira na veimatanitu era vakararavi ena veivuke e vakarautaki mai vei ira na tacidra mai vanuatani. Na veivuke e vakarautaki e sega wale ga ni veivuke vakailavo, era gole sara tale ga mai na mataveitacini era bolecakacaka mera tara na valenisoqoni. Erau cakacaka vata na valenivolavola ni tabana e Viti kei na Regional Engineering Office mai Ositerelia ena kena vakarautaki na peleni me na ganita na tara ni Kingdom Hall ena veiyasa i Viti taucoko. Mani duri e dua na matailawalawa e nodra cakacaka vakatabakidua na tara Kingdom Hall, qai vakadonuya oqori na iLawalawa Dauvakatulewa. A vakatarai vei keda meda vakayagataka na ilavo era cautaka na tacida mai valagi me tara kina na nodra Kingdom Hall, ni sa oti nodra sausaumi qai vo tu na ilavo oya. Mani tara kina e Viti ena tolu na yabaki sa sivi e vitu na Kingdom Hall vou. Era sauma tiko ena gauna oqo na ivavakoso na ilavo era dinautaka oya e sega na kena tubu, se ra cautaka tiko e veivula ina Kingdom Hall Fund e dua na umailavo tudei era lalawataka vakaivavakoso. Na cava na Kingdom Hall Fund oqo? A tekivu e naica, eda na tokona vakacava? Meda suka tale mada ena rauta na 20 na yabaki sa sivi.
8 Gadrevi Vakalevu na Kingdom Hall: Ena soqo ni tikina ni 1983, na kena usutu “Duavata ni Matanitu ni Kalou,” a kau cake mai ena dua na ivunau na parofisai vakasakiti ena Maika 2:12, e kaya: “Au na vakatikori ira vata me vaka na sipi ni Posira, me vaka na qele ni sipi e loma ni vanua veico: era na ue vakalevu e na vuku ni tamata.” Salavata kei na ivunau oya, a kaya na tacida a matataka na iLawalawa Dauvakatulewa ni sa dua na ituvatuva vou me vakatotolotaka na tara Kingdom Hall e Mereke kei Kenada, ena vakarautaka tale ga na veivuke vei ira na ivavakoso mera vakalevutaka se vakavoutaka na nodra vanua ni soqoni. Sa yaca ni ituvatuva oqo na Kingdom Hall Fund (KHF), qai tete yani ina levu tale na vanua, wili kina o Viti.
9 A kau cake mai ena vunau oya na ka e cavuti ena ivola na Cokonaki me Vakayacori Noda Cakacaka Vakaitalatala, ena tabana e 61: “Na Kingdom Hall e vanua ni sokalou, me kua ni vale vakaiukuuku mera vaqoroqoroya na tamata. E dina ni na duidui na kena itaratara ena veivanua, e kena inaki ga me rawarawa ni vakayagataki. (Vakatauvatana Cakacaka 17:24.) E dodonu me vanua tuvanaki vinaka, me kilikili me vakayacori kina na veisoqoni vakarisito, me vukei keda meda tubucake vakayalo, meda vulica kina na veika me baleti Jiova, me vakauqeti tale ga meda tokona vata na nona Matanitu.” Na inaki levu ni Kingdom Hall me vulici kina na iVolatabu, qai dau vakayagataki vakalevu ena kena tuvanaki na vunautaki ni itukutuku vinaka ena yalava ni noda ivavakoso.
10 Sa dau uqeta na iLawalawa Dauvakatulewa na tara ni Kingdom Hall, qai vakarautaka na ilavo me dinautaki ena inaki oqo kevaka e tu. E vakasakiti na ituvatuva ni Kingdom Hall Fund ni vakarautaki kina na veivuke ena sala e ganiti keda kece, ra qai sega ni vakaicolacolataki kina vakasivia na mataveitacini era kere dinau. E yavutaki ena ivakavuvuli vakaivolatabu e cavuta o Paula ena 2 Korinica 8:14, 15. A vakatura kina o koya e so na tikina veiganiti mera veivuke kina na lewe ni ivavakoso e Esia Lailai vei ira na tacidra ena so tale na vanua.
11 A dusia na sala a karoni ira kina na Isireli o Jiova nira lako voli ena vanualiwa ena 40 na yabaki. E kaya: “Me vakatautauvata ga, me rauta na nodra dravudravua na nomudoui yau levu e na gauna oqo, me na rauta na nomudou dravudravua talega na nodrai yau levu: me rawa kina na vakatautauvatataki: me vaka na ka sa volai, O koya sa kumuna vakalevu sa sega na ka e vo vua; kei koya sa kumuna vakalailai sa sega na ka e yali vua.”—Vakatauvatana Lako Yani 16:18.
12 Eda na Tokona Vakacava na Kingdom Hall Fund: Ni sa tekivutaki mai valagi na ituvatuva me baleta na Kingdom Hall Fund, era vakarautaka na ivavakoso e dua na katonicau e baleta vakatabakidua na cau oqori. Me sa qai vakatau vua na tamata yadua na ka e via cautaka kina. Ena icavacava ni vula kece, e dau vakau na cau oya ina valenivolavola ni tabana, qai vakayagataki vakatabakidua na cau oqo me vukei ira na ivavakoso era gadreva na ilavo me tara kina nodra Kingdom Hall. E sega ni veisau na ituvatuva oqori me yacova nikua. E dau vakadeitaka vakaivola na valenivolavola ni tabana ni sa ciqomi na cau kece vaka oya, qai biu sara ena Kingdom Hall Fund.—Vakatauvatana 2 Tui 12:13-16.
13 Me vaka eda sa raica mai, e vica na ivavakoso ena noda vanua era sa vakila na yaga ni Kingdom Hall Fund. Na vitu na ivavakoso sa tara oti na nodra Kingdom Hall o Nausori, Navua, Tavua, Vaileka, Sigatoka, Savusavu, kei Taveuni. Edaidai, sa tekivu tiko mai Lautoka na cakacaka, qai tiko na lalawa me baleti Ba, Korolevu Baravi, Bavu, kei Korovou. E dua na Kingdom Hall vou a tara mai Funafuti, Tuvalu ena 1994, e dua tale mai Tarawa, Kilivati ena Maji 2002. Sa ra vakadeitaka na ivavakoso kece oqo ena dua na nodra inakinaki vakaivavakoso mera tokona na Kingdom Hall Fund ena nodra cautaka e veivula e dua na umailavo tudei. Era cautaka tale ga na ilavo e saumi kina na veika e vauca na cicivaki ni Kingdom Hall e veisiga kei na kena dau vakavinakataki.
14 E rawa tale ga nida lalawa meda tokona na Kingdom Hall Fund, kevaka mada ga e se sega ni tara e dua noda valenisoqoni vou mai na tobu ilavo oqori. E rawa ni vakarautaki noda cau oqori mai na dua na noda inakinaki vakaivavakoso, se noda inakinaki o keda yadudua sara ga da qai vakauta vakadodonu ina valenivolavola ni tabana, ia me vakatakilakilataki ni baleta tiko na Kingdom Hall Fund. Me dua sara ga na katonicau me baleta na Kingdom Hall Fund ke ratou nanuma na ilawalawa qase ni ganita. Me ratou vakadeitaka tale ga ni sa matata vei ira na lewe kece ni ivavakoso na inaki ni katonicau yadudua.
15 Ni sa vakau ina valenivolavola ni tabana ena veivula na cau ni Kingdom Hall, ena volai sara ga ena kena laini e vakarautaki ena fomu na Contribution Remittance Form [S-20]. Me vaka sa tukuni oti mai, na cau kece e soli mai ina Kingdom Hall Fund ena ciqomi vakatabakidua ena inaki oqori.
16 Na ituvatuva me baleta na Kingdom Hall Fund e vakarautaka vei keda kece na sala meda vakaraitaka kina nida duavata dina. Eda na sega gona ni vakaliuca ga na ka e gadreva tu noda ivavakoso, ia eda na kauaitaki ira tale ga na tacida ena so tale na vanua era gadreva tu na veivuke vakailavo me tara kina nodra Kingdom Hall. Ena vakavolekati keda oqori kei ira na tacida vakayalo meda tiki ni ‘veiwekani sa tiko voli e vuravura.’—1 Pita 5:9.
17 Dua na ka meda dui cakava sara ga oya meda dau masulaka mai vu ni yaloda na porokaramu ni tara Kingdom Hall oqo. Meda qara tale ga na sala me vakavatukana kina na ka eda masulaka, me tara rawa na Kingdom Hall e gadrevi ena gauna edaidai. Ena iotioti ni veisiga oqo, sa dolava tiko ga na sala o Jiova mera kumuni kina e levu na nona ‘sipi tale eso’ ina duabau ga na qelenisipi era lewena ena duavata na nona tamata. Ena kauai tiko ga o koya me veirauti vinaka na vale ni soqoni mera vukei kina o ira kece na ka vou oqo mera vakataudeitaki ena dina ra qai tubu vakayalo. Meda vakaraitaka mada ga na noda vakavinavinakataka na isolisoli loloma oqo ena noda cakava na ka kece eda dui rawata meda tokona kina na porokaramu ni tara Kingdom Hall. Na noda veitokonitaka na tikina oqori ena vu ni veivakalougatataki levu vei keda, qai vakalagilagi kina na noda Kalou dau loloma o Jiova.