Ciqomi ena Marau!
1 E vuqa na vuvale lotu Vakarisito era vakaraitaka nodra ciqoma ena marau na vidio Young People Ask—How Can I Make Real Friends? E kaya e dua na tama mai Mereke ena gauna eratou sarava oti kina na vidio ni ratou dabe vakanomodi na luvena tagane ratou qai talanoataka rawa kece na veika eratou raica! E kaya e dua na itukutuku mai Malawi ni o ira na itabagone lotu Vakarisito e kea era vakadinadinataka na ka era sarava nira sotava sara tiko ga na leqa oya mai vei ira na nodra icaba e koronivuli. E kaya e dua na tama mai Jamani me baleta na vidio: “Au kila ni sa rogoci na noqu masu.” E tukuna e dua na itabagone: “Vinaka vakalevu na nomuni vakaraitaka tiko ga mai ni o Jiova e kauaitaki au dina.” E tukuna e dua na qase ni ivavakoso e Niusiladi: “E vukea nona lesu tale mai ina sala ni bula e dua na itabagone.” Rau kaya e dua na veiwatini gone ni rau sarava oti: “Au nuitaka mada ga mera raica kece na itabagone na vidio oqo qai uqeti ira mera bulataka na ka dina!” Kemuni na vuvale yadua, vakacava mo ni sarava tale mada? Ni oti oya, ni veivosakitaka sara na veitaro oqo.
2 Kena iKau: Na cava na itokani dina?—Vkai. 18:24.
3 Vakalatilati ina Veitokani: O na walia vakacava na nomu sega ni dau okati? (Fpai. 2:4) Na cava mo yalorawarawa kina ni vakavinakataka na nomu itovo, o cei ena rawa ni vukei iko? Cava ena vukei iko me so tale kina na nomu itokani, o na kunei ira e vei?—2 Kor. 6:13.
4 Veitokani kei na Kalou: E rawa vakacava ni o veiwekani kei Jiova, na cava e bibi kina oqo? (Same 34:8) O cei ena vaqaqacotaka nomudrau veiwekani kei na Kalou?
5 iTokani Cala: O cei na ilala ca? (1 Kor. 15:33) E rawa vakacava vei ira na itokani ca mera veivakamuai ina rusa vakayalo? Na cava o vulica mai na ivakaraitaki vakaivolatabu i Taina?—Vkte. 34:1, 2, 7, 19.
6 iVakaraitaki ena Gauna Oqo: E tarai Tara vakacava na galili? Na cava e kaya me baleta na nona veimaliwai kei ira na itabagone vakavuravura? Na leqa cava e sotava kina? Na cava erau sega ni raica rawa kina na nona itubutubu na leqa e sa mai tu kina, ia erau vukei koya vakacava me vinaka tale vakayalo? E itokani dina vakacava vei Tara na tacida painia oya? Na cava mera muria kina na lotu Vakarisito na Vosa Vakaibalebale 13:20 kei na Jeremaia 17:9? Na ka ni vuli bibi cava e vulica o Tara?
7 iTinitini: Na cava o vulica mai na vidio oqo? O rawa ni vakayagataka vakacava ena nomu vukei ira e so tale?—Same 71:17.