Meda Lomavinaka ena Ka e Tu Vei Keda
1 E veivakasalataki na iVolatabu meda vakarautaka ena vuvale na veika e gadrevi vakayago, ia e sega ga ni dodonu meda vakaliuca ena noda bula. Me vakaliuci ga na ka vakayalo. (Maciu 6:33; 1 Tim. 5:8) E ka ni sasaga toka meda veiraurautaka na ka eda cakava ena noda bula ena “veigauna dredre” eda bula tu kina oqo. (2 Tim. 3:1, VV) Na cava ena vukei keda?
2 Me Tiko Vei Keda na Rai ni iVolatabu: E vakasalataki keda na iVolatabu ni qarai ni vutuniyau e rawa ni veivakaleqai vakayalo. (Dauv. 5:10; Maciu 13:22; 1 Tim. 6:9, 10) E rerevaki ena gauna bibi eda bula tiko kina oqo meda sa rui vakaogai keda vakasivia ena cakacaka saumi se na veika vakailavo, me sa lai vakalailaini kina na veika vakayalo—na soqoni, vuli vakataki keda kei na cakacaka vakavunau—me ikarua ni ka ena noda bula. (Luke 21:34-36) Oqo e veibasai kei na ivakasala ena iVolatabu: “Kevaka sa tu vei keda na kakana kei nai sulu, me da lomavinaka kina.”—1 Tim. 6:7, 8.
3 E sega ni kena ibalebale oqo vei keda na lotu Vakarisito meda vakadravudravuataki keda. Ia e vukei keda ga meda kila se na ka vakayago cava eda gadreva dina—na kakana, isulu, kei na vale e ganita meda tiko kina. Ke sa tu na veika eda gadreva meda bula kina, me kua nida lai vakaotia wale tu na noda gauna ena qarai ni ivakatagedegede ni bula e tiko sara e cake. Kevaka eda vakasamataka meda volia e dua na ka se qara e dua tale na cakacaka, e vinaka meda tarogi keda, ‘e gadrevi dina meu cakava na ka oqo?’ Nida cakava oqo eda sa muria kina na ivakasala: “Mo dou kakua ni daukocova nai lavo: ia dou lomavinaka e na ka sa tu vei kemudou.”—Iper. 13:5.
4 Keda nuitaki Jiova ena vakalougatataki keda. (Vkai. 3:5, 6) Dina ga ni dodonu meda cakacaka vakaukaua meda bula rawa kina, ia meda kua ga ni vakaliuca oya ena noda bula. Kevaka e levu se lailai na ka e tu vei keda, meda vakararavi ga vei Jiova me vakacegui keda. (Fpai. 4:11-13) Eda na kunea na vakacegu ni Kalou kei na vuqa na veivakalougatataki tale e so.
5 Vakadamurimuria na Nodra Vakabauta na So: E veiveisautaka na nona bula e dua na tacida yalewa itubutubu le dua, a susugi luvena yalewa tiko ena dina. Rau taleitaka sara na totoka ni nodrau vale, ia erau toki ena dua tale na vale e veirauti ga, e muri rau qai toki tale ina dua na vale e lailai sobu. Oqo e vakalailaitaka kina na nona gauna ni cakacaka saumi me rawa ni levu na gauna e vakayagataka ena cakacaka vakaitalatala. Ni sa tubu cake na luvena yalewa ka vakawati, a vakacegu totolo mai na nona cakacaka, e dina ni sa na lailai kina na ivurevure ni nona ilavo. Ia sa vitu oqo na yabaki nona painia tudei tiko na ganeda, qai sega ni veivutunitaka na veika e vakayalia me vakaliuca tiko ga kina ena nona bula na Matanitu ni Kalou.
6 E dua na qase ni ivavakoso kei watina erau painia tu ena vica vata na yabaki, ena gauna vata oya erau susugi iratou tiko kina na tolu na luvedrau. Eratou vulica vakavuvale me ratou lomavakacegu ena ka ga e vinakati me ratou bula kina, me kua ni ratou vakaceguya na ka kece e lomadratou. E kaya na tacida oya: “E rawarawa ga na neitou bula. Dina ga ni so na gauna keitou dau sotava na dredre, e dau vakarautaka o Jiova na veika keitou gadreva. . . . Niu raica nodratou vakaliuca na lewe ni noqu vuvale na veika vakayalo ena nodratou bula, au vakila ni vinaka kece na ka, au sa rawata tale ga na noqu itavi.” E kuria o watina yalewa: “E vakacegu dina na lomaqu noqu dau raica nona vakaosoosotaki koya [o watiqu] ena veika vakayalo.” Eratou marautaka tale ga na gone ni rau qaravi Jiova vakatabakidua o rau na itubutubu.
7 Vei ira kece era digia mera qaravi Kalou mai na qarai ni iyau, e yalataka na iVolatabu nira na vakalougatataki vakalevu ena gauna oqo kei na gauna mai muri.—1 Tim. 4:8.