Rawa ni O Vutuniyau Vakayalo!
1. E rawa beka ni o painia tudei?
1 O dau qara na marau dina kei na veika me vakainaki kina nomu bula? O dau marau qai lomavakacegu ni o vukei ira na so? O dau vinakata mo vakarabailevutaka nomu veiqaravi vei Jiova? Ke o sauma na io ena veitaro qori, e rawa sara ga ni o painia tudei. Dina ni na gadrevi mo vakasamataki iratou rawa e vale, nomu itavi e virikotori ena iVolatabu, kei na ituvaki ni nomu bula.
2. Vakamacalataka e so na iyau vakayalo era rawata na painia tudei.
2 Na ivola uqeti vakalou a vola o Solomoni e semata na veivakalougatataki Jiova kei na iyau vakayago. (Vkai. 10:22) Nikua, na veivakalougatataki i Jiova e vu ni veivakavutuniyautaki vakayalo. Na veivakalougatataki qo era vakila vakalevu na painia tudei. Kena ivakaraitaki, era vakila na marau levu nira ‘volia nodra gauna’ mera solika mai na nodra vakaliuca na veika ga e baleti ira. (Kolo. 4:5; Caka. 20:35) Na cakacaka kei na loloma era vakaraitaka e raica qai marautaka o Jiova. Nira binia na “yau mai lomalagi” era talei tu ga kina. (Maciu 6:20; Iper. 6:10) Kena ikuri, ke ‘vinaka na matadra’ na painia ra qai nuitaki Jiova ena veika era gadreva, ena vaqaqacotaka tiko ga nodra veiwekani kei na Kalou.—Maciu 6:22, 25, 32; Iper. 13:5, 6.
3. E duidui vakacava na vakaliuci ni iyau vakayalo mai na iyau vakayago?
3 Na kena vakaliuci na iyau vakayago e vakavuna mera “bale ki na dauvere kei nai cori” e levu. (1 Tim. 6:9, 10; Jeme. 5:1-3) Ia e sega ni va ya na veivakalougatataki i Jiova. Nodra vakayagataka na painia tudei e dua na iwase levu ni gauna ena cakacaka vakavunau, ena vinaka nodra bula vakayalo ra qai vakaliuca na veika e bibi cake. (Fpai. 1:10) Dua na tacida e idinia a biuta nona cakacaka e kania vakalevu nona gauna me painia. E kaya: “E vakalomaocaocataki au noqu cakacaka saumi. E sega ni vaka na cakacaka vakapainia. Qo, au sa veivuke tiko ena nodra vakavulici na tamata ena ka dina. E veivakacegui dina qai marautaki.”
4. Era vakalougatataki vakacava na painia tudei nira vakacegui ira e so tale?
4 Veivakalougatataki: Nikua eda vakila kece “na veigauna dredre.” (2 Tim. 3:1, VV) Levu era gadreva tu e dua na nuinui. Era marau vakalevu na dautukuna yani na itukutuku ni Matanitu nira raica na veisau ni matadra o ira na yalolailai tu nira rogoca na itukutuku vinaka. Era dau marautaka dina na painia tudei nira raica na veisau vaka qori, nira vakayagataka tiko e sivia na 800 na aua e veiyabaki ena cakacaka ni veivakabulai qo!—1 Tim. 4:16.
5, 6. E rawa vakacava ni o painia tudei?
5 O sa bau vakasamataka mo painia tudei? Ena rairai gadrevi mo ‘volia na gauna’ mai na veika e sega soti ni bibi. (Efeso 5:15, 16) Levu era sa cakava qo nira bula rawarawa ga, era vakalailaitaka na gauna e vakayagataki ena cakacaka saumi me rawa ni levu na gauna era vakayagataka kina ena veika e vauca na Matanitu ni Kalou. O rawa ni veisautaka na ka o cakava mo tomani ira?
6 Kerea na veivuke i Jiova mo vakarautaka rawa kina e dua nomu ituvatuva. (Jeme. 1:5) Na ka ni veivakalougatataki cava o na vakila kina? O na vutuniyau vakayalo! Ena vakalougatataki iko tale ga o Jiova ena veika o gadreva vakayago. (Maciu 6:33) O ira na vakatovolei Jiova ena veika qo era na vakila na “veivakalougatataki, me na sautu dina sara.”—Mala. 3:10.