Kato ni Taro

◼ Na cava me dau nanumi ni vakayagataki tiko na mobile phone kei na pager?

E rua na sala oqori eda rawa ni veitaratara kina kei ira na tani se vanua cava ga eda tu kina. E dina ni yaga oqo, meda qarauna sara me kua ni vakayagataki na mobile phone kei na pager ena gauna ni cakacaka vakaitalatala se soqoni vakarisito baleta ni na veivakasosataki. E rawa ni yaco vakacava oqo?

Me dikevi mada na ka e rawa ni yaco ke taqiri na noda mobile phone se tagi na pager ena gauna sara ga eda vosa tiko kina ena cakacaka vakaitalatala. Na cava e nona nanuma o itaukeinivale? Na ivakaraitaki cava eda biuta ke cegu mada na noda vosa me rawa ni rogoci na qiri? Meda kua ni cakava e dua na ka me vakaleqa nodra rogoca na itukutuku ni Matanitu. (2 Kor. 6:3) O koya gona, ke kau tiko noda mobile phone se pager meda bokoca me kua ni vakasosataki keda se o ira na vakarorogo ena gauna eda cakacaka tiko kina vakaitalatala.

Vakacava na gauna eda wawa tiko kina ni dua e vosa tiko? Kevaka eda sa biuta vakatikitiki na gauna meda vunau kina, sega li ni dodonu me vakatabakidua sara ga kina na noda vakasama? Me rokovi na veiqaravi tabu, ena vinakati me qai qaravi na veika vakabisinisi se ka ni marau ena dua tale na gauna. (Roma 12:7) Oqo e sega ni kena ibalebale ni sa sega ni rawa ni vakayagataki na talevoni meda vunau kina se meda qiri me lalawataki na gauna meda qai veivosaki tale kina.

Me qarauni sara vakavinaka na vakayagataki ni mobile phone ena gauna o draiva tiko kina, ni so na vakadidike e vakaraitaka ni oqo e rawa ni vakavuna na coqa. Meda muria sara vakavoleka na lawa e soli me baleta na vakayagataki ni mobile phone ena gauna ni draiva.

Eda sokaloutaki Jiova, qai vakavulici mai vua ena gauna eda tiko kina ena soqoni vakaivavakoso, soqo ni tabacakacaka, kei na soqo ni tikina. Eda na sega ni doka na veiqaravi tabu oqo ke da vakalaiva na mobile phone se pager me vakasosataki keda kei ira na so tale. Kevaka e dua na itukutuku bibi qai vinakati meda qarava vakatotolo, e dodonu me lai qaravi oqori e tuba. Ke sega, meda lokuca e duatani tale na gauna me qai qaravi kina na veika vakaitaukei kei na noda cakacaka saumi, me kua ga ni gauna sa tuvai tu me caka kina na sokalou.​—1 Kor. 10:24.

Meda vakaraitaka mada ga na sala eda vakayagataka kina na mobile phone se iyaya vakalivaliva tale e so nida kauaitaki ira na tani kei na noda doka na veika vakayalo.