Kato ni Taro

◼ Na gauna cava e rawa ni tauyavutaki kina e dua na iwasewase lailai vou e duatani na nodra vosa?

Ke ra tiko ena yalava ni ivavakoso e dua na iwase levu ni lewenivanua e duatani na nodra vosa, e dodonu vei ira na qase mera saga ena nodra igu mera tuvanaka na cakacaka vakavunau ena vosa oya. (km-FN 7/02 t. 1; km-FN 2/98 t. 3-4) Ia, ke ra veituyaki o ira e duatani na nodra vosa oqo ena yalava ni rua, se sivia na ivavakoso, ena gadrevi e ke na nona veidusimaki na ivakatawa ni tabacakacaka. Ena vinakati me vukei iratou na ivavakoso eratou okati kina me ratou veitokoni ena cakacaka vakavunau ena yalava vaka oqo. Ena so na gauna e rawa ni tuvanaki me caka na vunau soqovi levu se Vuli Vale ni Vakatawa ena vosa oya, me kilai kina se vakacava na kedra levu e rawa nira na dau veitokoni kina.

O koya gona, e koto oqo na ivakatagedegede me sauvi taumada me rawa ni qai tauyavu kina e dua na iwasewase lailai vou e duatani na nodra vosa: (1) Mera sa tiko rawa e so na dautukutuku kei ira e so na tataleitaki era na kila vinaka na itukutuku vinaka ni vakamacalataki ena vosa oya. (2) Me sa tiko rawa e dua na qase e ganita me vakayagataki se dua na dauveiqaravi vakaitalatala me veitauri ena dua mada ga na soqoni ena dua na macawa. (3) Ke sa tiko e dua na ilawalawa qase eratou sa tu vakarau me ratou na dau tokona na iwasewase lailai vou oqo. Ke sa rawati kece na kena ivakatagedegede, me ratou qai tukutuku na qase ina valenivolavola ni tabana me vakadeitaki kina ni sa tauyavu vou na iwasewase lailai oqo, me rawa tale ga ni qai so tale yani na veidusimaki.

E levu na iwasewase lalai vaka oqo era dau tekivu taumada ena kena caka na soqoni ni Vulivola ni iVavakoso e veimacawa. Toso na gauna, sa rawa nira vakadonuya na qase me kuri oqo ena kena caka na vo ni soqoni, me vaka na Vunau Soqovi Levu kei na Vuli Vale ni Vakatawa. De dua e rawa ni vakayacori na iLesilesi Nb. 2, 3, kei na 4 ni Koronivuli ni Vuli Vunau ena dua tale na rumu ke tiko e dua na qase e ganita me vakayagataki se dauveiqaravi vakaitalatala e kila vinaka na vosa oya me kena qasenivuli. Ia, me baleta na ivakarau ni vosa, na Vosa Nb. 1, veitikina bibi mai na wili iVolatabu, kei na Soqoni ni Cakacaka, me na caka vata ga vakadua ena ivavakoso. Rawa tale ga ni tuvanaki na nodra cakacaka vakavunau na iwasewase lailai oqo.

E nuitaki nira na cakacaka vakavoleka na lewe kece ni iwasewase lailai kei iratou na ilawalawa qase eratou veitokoni kina. Me veiraurau na nodratou veidusimaki na qase, ratou vakaraitaka tale ga ni ratou kauaitaka na ka era gadreva na lewe ni iwasewase lailai oqo. Ni sikova na ivavakoso na ivakatawa ni tabacakacaka, e dodonu me tuvanaka tale ga na nona gauna me cakacaka kei ira na lewe ni iwasewase lailai oqo me tarai ira cake vakayalo. Ena veivakalougatataki i Jiova, e namaki ni toso na gauna ena yaco me dua na ivavakoso vou na iwasewase lailai oqo e duatani na nodra vosa.