Tarai ni Yalava e Duidui Nodra Vosa

1. Na cava e laurai nida vunau ena noda yalava?

¹ A tukuna o Jisu ni na vunautaki na itukutuku vinaka e vuravura “mei vakadinadina ki na veivanua kecega.” Era sega ni lecava na bibi ni vosa qori o ira kece na vakaitavi ena cakacaka vakavunau kei na veivakavulici. (Maciu 24:14; 28:​19, 20) Nida vunau tiko da veivakatisaipelitaki, eda na rairai sotavi ira na duidui matatamata e duidui nodra vosa. E veiganiti mera rogoca tale ga o ira qori na itukutuku ni Matanitu ni Kalou, ra qai dei ena ka dina ni bera na siga rerevaki i Jiova. (Mala. 3:​18) Ena tarai gona vakacava na yalava e duidui nodra vosa?

2. Eda na vakatotomuri Jiova vakacava nida vosa vei ira e duidui nodra vosa?

² Vakatotomuria na Rai i Jiova me Baleti Ira e Duidui Nodra Vosa: Eda na vakatotomuria nona lomani ira kece na tiko ena noda yalava o Jiova, ke gu na lomada meda vukei ira ena kilaka dodonu me baleta na Kalou dina, se mani vosa cava era vosataka. (Same 83:18; Caka. 10:​34, 35) Eda sa vunau ga ena gauna qo vei ira e vosataki na nodra vosa ena ivavakoso eda lewena, ia meda nanumi ira tale ga e duidui nodra vosa, se da rawa ni tukuna vakacava vei ira na itukutuku vinaka ni Matanitu ni Kalou. Noda vakawaleni ira e duidui nodra vosa e veisaqasaqa kei na inaki i Jiova meda vunau vei ira na lewe ni veivanua. Eda na vukei ira gona vakacava e duidui nodra vosa?

3. Na ivukevuke cava e tabaki meda vakayagataka, eda na vakavakarau vakacava ena kena vakayagataki?

³ Vakayagataka na iVola, Good News for People of All Nations: E tabaki na ivola qo me vakayagataki nida sotavi ira e duidui nodra vosa. Meda kauta gona ena vanua kece eda lako kina, da wilika e liu na ivola meda kila na lewena, da qai vakayagataka sara. Me rawarawa noda kunea na duidui vosa e vosataki ena noda yalava, meda makataka rawa na tabana era tiko kina ena ivola. Ke tabaki eso na noda ivola ena vosa qori, e rawa nida kauta me qai soli ni sa vakamacalataki oti na itukutuku ena ivola, Good News for People of All Nations.

4. Eda na vakayagataka vakacava ena cakacaka vakaitalatala na ivola, Good News for People of All Nations?

⁴ Ke da sotava e dua eda sega ni kila na nona vosa, meda vakaraitaka vua na waqa ni ivola e liu. Oti, da dusia na mape ni vuravura ena waqana e loma, da qai dusi keda kei na vanua eda tiko kina. Meda saga e dua na sala meda vakaraitaka kina vua nida via kila na vanua e cavutu mai kina kei na nona vosa. Ni sa kilai qori, meda cega sara na tabana era tuvai kina na ulutaga, da vaqara na tabana e ganita nona vosa, vakamuai koya ina yatuvosa e toka e cake ena tabana ya e volai ena matanivola kata, da qai kerei koya me wilika na itukutuku e rukuna. Ni sa wilika oti, e rawa nida solia vua e dua na ivolacebaceba ena nona vosa se dusia vua na yatuvosa e dravudravu na kena roka, e tukuni kina ni rawa nida kauta tale yani e dua na ivola ena nona vosa. Meda dusia sara na vosa “yacaqu” ena matanivola kata, da qai tukuna na yacada. Oti, dusia na vosa “yacamuni” ena matanivola kata, da qai waraka me tukuna na yacana. Meda vakadeitaka rawa tale ga na gauna meda lesuvi koya kina.

5. Na cava meda cakava mera kua kina ni vakawaleni na tataleitaki e duidui nodra vosa?

⁵ Veisikovi Lesu: Se mani vosa cava era vosataka, meda saga mera sikovi tale o ira era taleitaka na itukutuku vinaka ni Matanitu ni Kalou. Ke taleitaka e dua me kila na Kalou kei na nona Vosa, vakalewena na fomu Kerekere me Lai Sikovi (S-43), da qai solia vakatotolo vua na vunivola ni ivavakoso me vakauta ena valenivolavola ni tabana, me rawa ni gole e dua e kila na nona vosa me lai sikovi koya. Na valenivolavola ni tabana ena qai vakauta na fomu ena ivavakoso se iwasewase e vosataka na vosa ya. Ni tauri ga na fomu, sa na sikovi sara o koya e tataleitaki. Ena solia tale ga o vunivola vei ivakatawa ni cakacaka e dua na kopi ni fomu me kila kina na levu ni tataleitaki era sa tiko rawa. Me vakaleweni ga na fomu ke dua e tataleitaki dina.

6. Na cava meda cakava ke da sotava e dua na tataleitaki e duidui nona vosa?

⁶ Ena rairai taura toka na gauna na kena vakau na fomu (S-43) kei na nona kerei e dua e kila na vosa nei tataleitaki, me lai sikovi koya. Ni sega ni vinakati me seavu nona tataleitaki, e rawa ni lai tomana tiko mada na veivosaki o koya e vakalewena na fomu, me yacova nona lesuvi koya e dua e kila na nona vosa. Ena so na gauna, e rawa ni vuli iVolatabu sara o koya e tataleitaki. Ni waraki toka me qai sikovi koya e dua e kila na nona vosa, e vei eda na rawa ni kauta mai kina na ivola e tabaki ena nona vosa?

7. E vei eda rawa ni kauta mai kina nodra ivola e duidui na nodra vosa?

⁷ Nodra iVola e Duidui Nodra Vosa: Me kua ni mai bini wale tu ena ivavakoso na ivola ena vosa tale eso. Ke raica o ivakatawa ni cakacaka nira sa kune tiko na tataleitaki era vosataka e dua na vosa, ena qai rairai veiganiti me maroroi eso na ivola ena vosa ya mera vakayagataka na dautukutuku, ia me vakarauta ga. Ke sega ena ivavakoso na ivola, e rawa ni kerei. Ena rairai taura na gauna me qai tauri ena ivavakoso na ivola e kerei. Ena gauna va qori, e rawa nida lai tabaka mai na ilavelave ni ivola ya ena www.watchtower.org. E tu vakarawarawa e kea vei keda kei ira na tataleitaki e levu na ivola e tabaki ena drau vakacaca na vosa. Ena yaga dina qori ena noda saga mera vukei tiko ga na tataleitaki e duidui nodra vosa.

8. Na cava eda rawa ni cakava na lewe ni ivavakoso vei ira na tataleitaki e duidui nodra vosa?

⁸ iTavi ni iVavakoso: Ena so na vanua, sa levu sara na tataleitaki ena itikotiko e duidui nodra vosa, ia e sega ni tiko voleka e kea na ivavakoso e vosataka ena soqoni na vosa ya. Ena gauna va qo, era sa na sureti ga na tataleitaki mera gole ena noda soqoni. Na noda loloma kei na veikauaitaki e rawa ni uqeti ira mera tiko wasoma ena soqoni. Ni se qai tekivu, de na vaka toka e dua na ilati na duidui ni noda vosa kei na itovo; ia e sega ni dua na ka e rawa ni vakalatia na loloma dina vaKarisito e laurai ena keda maliwa na iVakadinadina i Jiova e veiyasai vuravura. (Sefa. 3:9; Joni 13:35) Vakacava e taladrodro na nomu vosataka e dua tale na vosa? Ke vaka kina o qai rawa ni sikovi ira na tataleitaki era vosataka na vosa ya, tukuna vua na vunivola ni ivavakoso, me rawa ni tukuni ena valenivolavola ni tabana. Ena yaga sara qori ke vinakata na valenivolavola ni tabana me lai sikovi e dua na tataleitaki.

9. Ena gauna cava ena gadrevi kina me vulici e dua na vosa, ena tuvanaki vakacava?

⁹ Vulici e Dua Tale na Vosa: Nida vukei ira e duidui na nodra vosa, e daumaka meda uqeti ira mera lai soqoni ena ivavakoso e vosataki kina nodra vosa, ke sega ni yawa sara mai na nodra itikotiko. Ia ke sega ni rawa ya, era na rawa ni bole eso na dautukutuku mera vulica na nodra vosa na tataleitaki mera vukei ira vinaka kina. Ke sega na ivavakoso voleka mera soqoni kina, ra sa lewe levu tale ga era toki mai e duidui na nodra vosa, se dua na ilawalawa era via rogoca na ka dina ena nodra vosa ga, e rawa ni qai tuvanaka na valenivolavola ni tabana me vulici nodra vosa. Sa na qai tukutuku na valenivolavola ni tabana ena ivavakoso voleka me vakaraitaki kina ni gadrevi na veivuke, ena qai tuvanaka tale ga me kacivaki na ituvatuva ni vuli. O ira na tiko ena vuli qo me nodra inakinaki mera toki ena ivavakoso se iwasewase ni vosa e gadrevi me tarai na kena yalava.

10. E rawa ni tauyavu ena gauna cava na iwasewase me qarava e dua na vosa, ena kilai vakacava qo?

¹⁰ Tauyavu ni iWasewase: E va na ka e vinakati me tauyavu kina na iwasewase me qarava e dua na vosa. (1) Sa vica toka na tataleitaki ena yalava era vosataka e dua na vosa, qai rawa ni levu tale era kune. (2) Mera kila se ra sa vulica tiko na vosa ya eso na dautukutuku. (3) Sa tiko e dua na dauveiqaravi se qase ni ivavakoso e rawata na ivakatagedegede me liutaka na cakacaka, me rawa tale ga ni qarava na soqoni ni dua na macawa ena vosa ya. (4) E bole e dua na ilawalawa qase me tokona na iwasewase ni sa tauyavu. Ke laurai ni sa bau rawati na veika e gadrevi qori, na ilawalawa qase ena qai volavola ena valenivolavola ni tabana ena veika matailalai me kilai, me vakaraitaka tale ga ni sa rawa ni tauyavu na iwasewase. (Raica na ivola iSoqosoqo, t. 106-​107.) Na qase ni ivavakoso se dauveiqaravi ena liutaka na cakacaka ena vakatokai me “ivakatawa ni iwasewase lailai” se “dauveiqaravi ni iwasewase lailai,” me vakatawani ira na lewe ni iwasewase.

11. Na cava e itavi dokai kina noda vukei ira ena noda yalava e duidui nodra vosa?

¹¹ Nodra vukei na duidui vosa ena noda yalava e tiki bibi ni cakacaka vakavunau a tauyavutaka na noda iVakaraitaki, o Jisu Karisito. Meda gumatuataka ga noda itavi, ena qai yavalata na veimatanitu o Jiova me vakayarayarataki ira mai era ka domoni vua. (Akeai 2:⁠7) Eda na marau nida tokona vinaka na kena tarai na yalava e duidui nodra vosa! Me vakalougatataka mada ga o Jiova na noda duavata ni vukei ira ena noda yalava e duidui nodra vosa, da qai kua ni guilecava se mani vakacava na dredre ni noda veikilai vosa, na Kalou ga ena vakatubura na sore ni ka dina eda tea!​​—⁠1 Kor. 3:​6-9.