Tara Kingdom Hall ena So na Vanua Vakaurope
1 A vakatabui tu ena vica ga na yabaki sa sivi na nodra cakacaka na iVakadinadina i Jiova ena vica na vanua vakaurope, wili kina na Tokalau kei Urope. Bau ca sara ga na vakatatabu oya ena so na vanua ni dredre nira soqoni kina e matanalevu na mataveitacini. Me qai dua li na nodra Kingdom Hall, sa sega tu ga ni rawa. Ia ena vica na yabaki se qai sivi toka ga oqo, “sa cakava na ka levu ko Jiova ena vukuda; eda sa marau kina.”—Same 126:3.
2 Tekivu ena 1983, sa via malumu na nodra dau tabaki sobu na iVakadinadina i Jiova. Ena 1989, rau sa vakadonui ira vakalawa na iVakadinadina i Jiova o Poladi kei Hungary. E Rusia, era vakadonui kina vakalawa na iVakadinadina i Jiova ena 1991. Mai na gauna oya me yacova nikua, sa toso vinaka sara na cakacaka e Rusia kei na veivanua era dau vakarurugi tu e liu ena lewa vakominisi. Mai na Maji 1996 kei na Okotova 1998, sa vakadonuya na iLawalawa Dauvakatulewa me soli vakadinau na ilavo vei ira na valenivolavola ni tabana era cicivaka na cakacaka ena 11 na vanua vakaurope. Oqo me rawa ni tara kina e 359 na Kingdom Hall.
3 Raica mada na iyaloyalo era tu oqori qai vakasamataka na veika uasivi qai totoka sa vakayacora o Jiova ena vukudra na nona tamata. (Same 136:4) Dua na ka meda marautaka ni sa vakayagataki tiko vakavinaka na nodra cau na mataveitacini mai na veiyasa i vuravura kece, qai vakaraitaka oqori na dina ni ka e kaya o Jisu me vaka e volai ena Joni 13:35: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”
4 O Romania e dua vei ira na vanua vakaurope sa yaga tiko kina na ituvatuva me baleta na tara Kingdom Hall. Na ituvatuva oqo e baleti ira na tacida ena veivanua e dredre nira tara vakataki ira nodra valenisoqoni. Me yacova na vula o Julai 2000, sa tara e Romania e 36 na Kingdom Hall. Dua ga na itaratara ni valenisoqoni e taurivaka o Ukraine. E tara rawa kina e kea ena 2001 e 61 na Kingdom Hall, qai 76 tale ena 2002. Vica vata na drau na Kingdom Hall sa tara rawa mai Bulgaria, Croatia, Masitonia, Moldova, Rusia, kei Serbia kei Montenegro.
5 E sega ni ka rawarawa na tara Kingdom Hall ena so na vanua, ni levu na ka ena caka rawa e liu ni se bera mada ga ni tekivu na taravale. Oqo e dau kania vakalevu na gauna. Kena ikuri, e sau levu cake na tara Kingdom Hall ena so na vanua vakaurope ni raici vata kei na levu na vanua e Aferika se o Sauca Amerika. Ia e se gadrevi tiko ga e drau vakadrau na Kingdom Hall ena veivanua vakaurope baleta na nodra tabili tiko ga yani vakayauyau o ira na sokaloutaki Jiova qai sega ni levu soti na ka e tu vei ira na tacida ena veivanua vaka oya mera tara kina vakataki ira nodra valenisoqoni!
6 Sa dua dina na ka totoka ni raici na toso totolo ni tara Kingdom Hall! Me vaka e laurai, dau yaco me ivakadinadina vinaka na tara ni dua na valenisoqoni. Ena so na vanua, e lauti ira na vakailesilesi vakamatanitu nodra raica na kena muri vinaka na idusidusi e tu me baleta na taravale.
7 Donu vinaka sara ga nona parofisaitaka o Aisea na tubu ni sokalou dina ena gauna oqo. E kaya na Kalou ena gusu i koya na parofita: “Koi au ko Jiova, ka’u na vakusarawataka e na kena gauna.” (Aisea 60:22) Io, na tini na yabaki sa sivi oqo e vakadinadinataka ni sa kena gauna vei Jiova me vakatubura na cakacaka ena Tokalau kei Urope. Me vakalougatataka tiko mada ga o Jiova na noda sasaga meda vakatotolotaka na tara ni Kingdom Hall ena levu na vanua, ena noda cuqena na soli ka me baleta na tara ni Kingdom Hall! Nida cakava oqori, ena tara rawa kina e levu tale na Kingdom Hall ena veivanua e dredre nira vakaduria vakataki ira nodra valenisoqoni. Ena tokoni kina na tubu ni sokalou savasava ena levu na yasa i Urope qai vakauasivi, na cakacaka ni vakadinadina levu cake “ki nai yalayala kei vuravura.”—Caka. 13:47.
[iYaloyalo ena tabana e 3]
Kingdom Hall e Moscow, Rusia
[iYaloyalo ena tabana e 4-6]
Kingdom Hall vovou ena Tokalau kei Urope
Strumica, Masitonia
Daruvar, Croatia
Bitola, Masitonia
Sokal, Tikina o Lviv, Ukraine
Sofia, Bulgaria
Krasnooktyabrskiy, Yasayasa o Maykop, Rusia
Bački Petrovac, Serbia kei Montenegro
Plovdiv, Bulgaria
Tlumach, Tikina o Ivano-Frankivsk, Ukraine
Rava-Ruska, Tikina o Lviv, Ukraine
Stara Pazova, Serbia kei Montenegro
Zenica, Bosnia kei Herzegovina
Sokal, Tikina o Lviv, Ukraine
Zhydachiv, Tikina o Lviv, Ukraine