E Noda Cakacaka Bibi Duadua na Cakacaka Vakaitalatala
1 E levu na mataqali cakacaka e tu meda cakava. Me vaka nona qarava e dua nona vuvale, oqo e ilesilesi vakalou. (1 Tim. 5:8, VV) Ia, na cakacaka e vauca na ilesilesi oya e sega ni dodonu me vakaruguta na vunautaki ni Matanitu ni Kalou kei na veivakatisaipelitaki.—Maciu 24:14; 28:19, 20, VV.
2 E dua na ivakarau a laiva koto o Jisu meda muria, oya na kena ‘vakasaqarai taumada na Matanitu ni Kalou.’ (Maciu 6:33; 1 Pita 2:21) A lailai ga kina na veika vakayago a taukena o Jisu, ni a ogaoga ena nona cakava na loma i Tamana. (Luke 4:43; 9:58; Joni 4:34) E dau saga me vakatusa na nona vakabauta e veigauna kece. (Luke 23:43; 1 Tim. 6:13, VV) A uqeti ira gona kina na nona tisaipeli mera taleitaka tale ga na cakacaka ni tatamusuki.—Maciu 9:37, 38, VV.
3 Vakatotomuri Jisu Nikua: Eda rawa ni vakatotomuria na ivakaraitaki i Jisu ena noda saga me rawarawa ga noda bula, me rawa ni vakaliuci kina na cakacaka vakaitalatala vakarisito. Kevaka gona sa tu na veika meda bula kina, meda muria mada ga na ivakasala vakaivolatabu ena noda sega ni qara vakasivia na iyau ni vuravura. (Maciu 6:19, 20; 1 Tim. 6:8) Ena vinaka cake meda qara na sala meda vakaitavi vakalevu kina ena cakacaka vakavunau! Ke mani dredre na ituvaki eda sotava, meda gugumatua ga me vakataki Jisu, ena noda saga me kua nida laiva na lomaocaocataki ni bula me vakaruguta na noda cakacaka bibi duadua ni kena vunautaki na itukutuku vinaka.—Luke 8:14; 9:59-62.
4 O ira sara mada ga e levu na nodra icolacola, e se bibi tiko ga ena nodra bula na cakacaka vakavunau. E dua na tacida tagane e levu na luvena, e vakaitutu torocake ena nona cakacaka saumi, qai dua na qase ena ivavakoso lotu Vakarisito, e kaya: “Au raica na cakacaka vakavunau me noqu cakacaka bibi duadua.” Dua na tacida yalewa painia, e kaya: “E sega ni dua na cakacaka isaulevu e vuravura e uasivita na cakacaka vakapainia.”
5 Ke mani vakacava na ituvaki ni noda bula, meda vakatotomuria mada ga na ivakaraitaki i Jisu. Ena sala cava? Ena noda kotora na cakacaka vakaitalatala vakarisito me noda cakacaka bibi duadua.